سالفة لها ثلاث ايام شيل وحط وتوها تنحل اليوم بس تحتاج تركيز لانها فوضى في فوضى ومواضيعها مشربكة في بعض،، تراها سالفة مخيسة اللي ماله بالمواضيع الطويلة لايدقق ،،اقولها لأني فاضي وعاجبتني تطوراتها ،، المهم انها تبي تركيز وفضاوة ،، انا مافهمتها الا يوم شرحلي ابوي مثل ماتشرح الاستاذة
جارنا (فهد) ارسل بالغلط لجارنا الثاني (توفيق) الرسايل اللي بينه وبين جارنا الثالث (ابو نايف) ،،كلها ملفات صوتية مليانة حش وتسفيل ،، توفيق طلب من فهد يرسل مقاطع صوتية لطريقة التعليم عن بعد عشان يرسلها لعياله ،، فهد راح لمحادثته مع ابو نايف لانه هو اللي ارسلها له وبدل مايرسل خمس
مقاطع فقط لعله سوا تحديد لكل المقاطع وارسلها لتوفيق ،، واللي بدوره استمع للمقاطع بعناية حتى اصيب بصدمة يمكن اقوى صدمة تعرض لها بحياته ،، مشكلة توفيق ككثير من الاشخاص في حياتنا ،، يعتقد انه شخص محبوب والكل يتمنى الجلسة معه لكنه في الحقيقة غثيث وملقوف وتصرفاته مزعجة وعياله اغث منه
وجيرته تغث الكبد من يومنا بزران وحنا مانحبه ،، مو راعي شر بالعكس يحاول يصير طيب بس تعرفون الطيبة الغثيثة؟؟ مدري شلون اشرحلكم بس اللي يفزع لك ويشيل معك اكياس المقاضي وانت عارف انه فازع لك عشان بس يعرف وش جوا الكيس ،، هذا هو ،، غير انه مايعترف بشي اسمه حدود اجتماعية يعني عادي يشوف
عندنا مناسبة يدخل يسلم كان اللي جايينا ضيوفه (هو يعتبرها كرم منه انه يرحب بضيوفنا) ابوي ساكت له وتعود عليه المهم الرجال عايش في وهم طول هذي السنين انه الشخص الألطف في الحارة وانصدم يوم سمع المحادثات الصوتية يتشكون منه ومن طريقة تشجيعه للكورة ومن تنسيقات مناسبات ابدوا فيها عدم
رغبتهم بحضوره وهذي اكثر حركة خلته يخرج من طوره ويفتح ابواب الجحيم على ابو نايف مع ان اكثر الحش جاي من فهد بس هو في قرارة نفسه متأكد ان ابو نايف هو السوسه اللي محرض فهد على إضعاف مكانته في المشهد الاجتماعي بحارتنا ،، اتصل على ابو نايف وسفل فيه وجاب كل مشاكل جيرته من اول ماسكن ،،
ابونايف كان مندهش من الموقف فاتصل على فهد وقاله ليش ترسل وانت شقصدك بهذي الحركة وكذلك سفل فيه ،، تشابكت المواضيع فهد بارد جداً ودايم ياخذ الامور بهدوء وضحك،، راح اتصل على توفيق وقاله يبن الحلال شفيك مكبر الموضوع حتى انت تحش فيني مع ابو نايف ومازعلت ،، هو يقول كذا يبي يهدي الموضوع
مادرى انه طير عقل توفيق وقام توفيق يحلف أيمان مغلظة ان مابينه وبين ابو نايف محادثات وان ابو نايف يوم نقل له هذا الكلام نقله بقصد انه يخرب بينهم ،، فهد حس انه جاب العيد بدل مايهدي الموضوع زاد الطين بله فقال اسمع انا قاصد ارسلها لك عشان ماناخذ اثمك وتصير نميمة ونبيك تحللنا بس
الدنيا حياة وموت وكورونا يجتاح العالم ومانبي يكون في خاطر احد مننا شي على الثاني ،، ماش توفيق مارتاح للعذر لكن بلعها ورضخ امام اهمية التعايش في ظل تداعيات ازمة كورونا ،، راح دق على ابو نايف وقال معليش سامحني تلفظت عليك وفهمني فهد انه قاصد يرسلها عشان احللكم وانتم في حل
هنا اشتعلت حريقة جديدة من ابو نايف ،، هو اصلاً ماكان مقتنع بعذر ارسال الملفات انها بالخطأ وكان شاك انها مقصودة لانه مش معقولة واحد يرسل 19 ملف بالخطأ ،، والحين تأكدت شكوكه فتحولت المشكلة بينه وبين فهد ،، اتصل على ابوي يتشكى له ويقول انها حركة ليست طيبة من فهد ،، ابوي نفسيته
بريال هذي الايام لأسباب كثيرة آخرها هزيمة الحزب وتهديدات السفارة (ماكلة وشاربة معه سالفة تهديده بالسفارة وحقوق الانسان) العادة مثل كذا يجتمعون عندنا بالبيت وبسبب الحظر وبعد مداولات عديدة قرر ابوي يجمعهم في مكالمة جماعية لحل الموضوع بشكل ودي خاصة انهم يرضون دائماً بأحكامه
تحسبونه جمعهم في مكالمة مثلنا؟؟ لااا ،، اخذ جوالات اخواني واختي وحطها على المركا واتصل على كل واحد وشغل السبيكر😭😭😭ومقتنع انه يعيش عصر التقنية وان حركته ذي حركة متقدمة وكيف ان التقدم التقني ساعده على تجاوز صعوبات منع التجول ،، المهم نقاشات ومشادات واستطاع بحنكته المشهودة انه
يرطب العلاقات بين فهد وابو نايف ،، باقي توفيق ينهي موضوعه معهم وخلاص تنحل المشكلة ،، لكن للاسف جت الطامة الكبرى : الكلام الجاي على لسان اختي حاضرة الموقف ،، تقول ان ابوي كان متحمس ومشدود ويبي يسكت فهد وابو نايف عشان يسترضيهم قام طفى سبيكر توفيق واخذ جوالاتهم والتفت على جنب وقال
ياعيال الحلال عينوا خير كلنا عارفين ان توفيق غثيث من خلقه الله ومحد يداني تصرفاته (اختي تقول اني حطيت يدي على فمي وطيرت عيوني وصرخت لا ارادياً) توفيق طلع يسمعهم وقال تراني سمعتك يابو عادل ايش هذا الكلام ماتوقعتك تقول عني غثيث ،، ابوي استوعب الطامة واستوعب انه جاب العيد بحركته
راح وكعادته في مثل هذي المواقف وعصب عليهم كلهم ولعن الطيب فيهم وقال عيب انتم كبار وعشرة عمر يصدر منكم تصرفات ومشاحنات (قلب الطاولة على الجميع وجلس يمارس دور الحكمة وانه طالع منها) ويعجبني هذا الاسلوب من الوالد دايم واحاول اطبقه ،، اذا جبت العيد اقلب الموجه ،، عاد اللي صار انه سفل
فيهم ووعد كل واحد فيهم ذبيحة رضاوة بعد كورونا وقال (هذا ان كانكم حيين مافطستوا هههه) يعني فوق الغلط قوي عين ،، قفلوا المكالمة الجماعية الافتراضية #قمة_المطفرين هههه #قمة_العشرين واختي ميتة ضحك وهي تشرحلي عصب عليها وقال قومي انا بشرحله هذي سوالف رجال شدخلك وهذي الكلمة تنرفزها
قامت زعلانة بس تسوي نفسها تضحك عشان تستفزه
جلست انا وياه وشرحلي كل السالفة يوم خلص فقعت ضحك وزعل علي قال قم الحق اختك ،، ولاشوفك معلم احد ،، وعدته ان الموضوع يبقى بينا محد يدري عنه وهذا وجهي اضيع سالفة مثل هذي ماعلم احد عنها ،، الحين علمت تويتر وبكرة واتساب وتراك ياتوفيق غثيث😘
جلست انا وياه وشرحلي كل السالفة يوم خلص فقعت ضحك وزعل علي قال قم الحق اختك ،، ولاشوفك معلم احد ،، وعدته ان الموضوع يبقى بينا محد يدري عنه وهذا وجهي اضيع سالفة مثل هذي ماعلم احد عنها ،، الحين علمت تويتر وبكرة واتساب وتراك ياتوفيق غثيث😘
بعض الاخوان المتحمسين اللي يردون بردود على بتهزيء وان السالفة مخيسة تراني كاتب وداري انها مخيسة ،، تكفون لاتتحمسون قد قلت ان الشهرة جتني بالصدفة واني ادخل تويتر اسولف وماخذ راحتي ولا اعامله معاملة اعلانات وعلاقات ومتفاهم مع متابعيني على هذا النسق غريب الأطوار ،، هدوا طيوركم😂😎
جاري تحميل الاقتراحات...