طيب يا شباب بما أنه الحالات أبدت تتزايد ودخلنا في الانتقال المجتمعي ، وبما أن وزارة الصحة غيرت استراتيجيتها من الكورونا الصغيرة بنقدر عليها، وسودان بدون كورونا ل #استعدادات_الحظر ،وبما انه التايم لاين والشارع شوية شوية ابتدا ينتبه لانو الحصل عند غيرنا اصبح ما بعيد مننا ، فمن هنا
مفترض نبتدي نقاش جادي علمي واقعي بعيد من العاطفيات والامنيات الطيبة والغيبيبات لانه الدور الجاي علينا كمجتمع كل فرد واسرته واصحابه ونفسه وجيرانه ، ايوا نعم الحكومة عندها دور وبالبقدرو عليهو شغالين لكن من تجارب جيرانا العالم المسمي اول حيفشلو ، والدور الاهم للمجتمع ، فحقو نبتدي
جرعات صغيرة صغيرة من المعلومات والردود والمشاركات من ناس بتمني يضيفوا لينا بس بكلام علمي لو سمحتوا والما عنده لينا اضافة يساعدنا بالريتويت ما اللايكات ، وهنا بحب اشير لاتنين عرفتهم من التايم لاين مهتمين بحقيقة الوضع صريحين فيهو @mjaaade @Abeerahmed4e
طيب لحدي ما نتاكد من معلومة الحالات ما نتسرع ، ونقول انه الاسبوعيين الجايين اهم الاسابيع لاحتوا الفيروس من الموجة الاولي وبنفس الوقت اسبوعي ظهور الحالات والوفيات ، لانه من الاصابه للوفاة في 3 اسابيع ، بس نطمئن لانو 80% من حامليين الفايروس ما بحتاجو ترقيد مستشفي حتي
مبدئيا اتفقنا في الثريد الفات ماف علاج ، واملنا حاجتين يا اللقاح متوقع بعد 12 الي 18 شهر ، او اصابة 50 ل 80 من السكان وتعافيهم وبكدا تلقائيا حتتناقص سرعة انتشار الفايروس ، والقفلة الاسي دي ما حل دائم بعد الثلاثة اسابيع لسا حيكون الفايروس قاعد وحايم ، لكن احتمال يقللو المرعي دا
بما انو الحالات العشرة اتاكدت ، لازم نفهم الفرق بين الحالات المؤكدة ، والحالات الحقيقية ،والمشتبه بيها ،،المؤكدة دي نسب ضئيلة جدا من الحقيقية وبتختلف باختلاف مقدراتك كدولة لانك تجري فحص شامل لقطاع كبير من سكان البؤرة المعينة ولان امكانياتنا ضعيفة ، وماف دولة حاليا بتتديك قشة
فالفرق دا شاسع جدا عندنا ، ولو عايز تقدره ارجع عكس من الوفيات ، بما انه نسبه الوفاة 1% بعد فمعناها قبل 3اسابيع كانو 100 والبعديهو 300 والاسبوع دا 800 حالة حقيقية . المشتبه بيهم ديل ناس شاكيين فيهم لمخالطة او غيره وماف طريقة فحص ليهم لانو قلنا الفحص محدود شديد والموضوع حيطول شديد
طيب الحظر مهم في شنو ، دا اهم سلاح للدولة حاليا في احتوا بؤرة المرض لو اصبح معاهو فحص مكثف للناس ،وتتبع عنيف للحالات ومناطقها الاولي دي صعبة شديد علينا حاليا ، والتانية ممكن ببرامج زي برنامج ترحال مثلا لو اشتغلو عليهو ناس البرمجيات ، بعد الحظر لسا في اجراءات لازم تواصل اكيد .
غير الحظر الخارجي دا اي واحد فيكم لازم يعرف انه غالبا ما حيموت هو لانكم لسا اصغر من مرحلة الموت لكن ولكن دي مهمة افترض انك شايل الفايروس واعزل نفسك جوا البيت احمي ابوك وامك والمرضي وضعاف المناعة غسل يدك البس كمامتك افصل حمامك وما تهبش حاجاتهم وعقم مقابض الابواب ،ما الا تظهر اعراض
طيب نرجع لفكرة التقصي والتتبع ممكن تحصل كيف من غير تحنيس المرضي انهم يدونا ارقامهم او يجوا العزل ببساطة جهاز الامن كان بحدد موقع الناس زمان باستخدام 3 ابراج وبعدهم من كل واحدة منها الفكرة هنا انو يتنزل App يحدد لكل واحد فينا تحركات الحالات المؤكدة والمشتبه بيها وقربها من مكانك
والزمن الاتحركت فيهو ، ودا اهم حاجة خلت سنغافورة تقدر تسيطر علي الانتشار لانو الليلة لو قالو لي كان في حالة س عبرت الشارع القدامك دا قبل ساعة مثلا اكيد ما حامر بيهو وانا عارف انو الفايروس بعلق في الهوا 3 ساعات صح ، ودا طبعا بافتراض السيطرة علي الموجة الاولي دي بعد 3 اسابيع.
طيب نواصل المتوقع شنو بعد الحظر دا يا نجحتو بالتزامكم بيهو في اننا نحتوي الفايروس موقتا ونرجع لانتقال هادي شوية من الحالات وصراع مستمر لسنة ونصف جاية ، يا فشلتو بتفلتاتكم وسماحكم للكيزان وغيرهم بتشتيت الناس وبدل تتضافر جهودها يصارعو بعض وينتصر الفايروس ، يعني شنو ؟؟!
ببساطة لو قللنا عدد الحالات الخرافي المتوقع وجوده حاليا في الخرطوم دا بسمح بتخفيف الضغط شوية وفك الحظر موقتا لمعاش الناس لحدي ما تتكون لينا بورة تانية وحتتكون ، ويستحسن وقتها نكون مستعدين اكتر من اسي لانو مع كل موجة جاية مواردنا وامكانياتنا وقدرتنا الجسدية والنفسية حتكون اضعف ،،
اما لو فشلنا فهنا بجي الطوفان بعد دا حتنهار منظومتكم الصحية وانسوا وقتها الكورونا لانو عندكم مليون حاجة حتبلكم وقتها عقارب وكهارب ودبايب وكيزان ومشاكل صحية مزمنة وحوادث وذبحات وجلطات واقتصاد وامن وغيرها وغيرها وغيرها ، وخيار الحكومة حيكون يا تمدد الحظر يا تعلن الاستسلام والفشل
جاري تحميل الاقتراحات...