هذي الرسالة جتني على الخاص "السلام عليكم سارة ودي تعرضين موضوعي على العام وياليت تطلبين من المتابعين ما يجرحون بالحكي حابة أفضفص ومنها أسمع تعليقهم على موضوعي قبل سنوات كان أبوي الله يرحمه يتعالج بألمانيا ومعه أخواني الإثنين مرافقين ومافي في البيت إلا أنا وأمي
قبل يسافرأبوي كان واعدني يسجلني بجامعة البحرين دراسات عليا مع صديقتي وشاءت الأقدار إنه ينفتح التقديم وماعندي أحد يوديني وخبرت أبوي إني حابة أروح مع صديقتي فقالي لا قولي لخالك دام بيته بالحارة مانبي يقول ليش رحتي لغرب وتركتيه وكانت ثقيلة على نفسي جدا لأنه ما بحياتي طلبت من أحد شيء
وخالي شخص نقاد وعلاقتي معهم رسمية وما أشوفهم إلا بالمناسبات بس هو وزوجته مهايطية عساس كلهم أكاديميين وعيالهم أطباء ويعملون زمالة بمستشفيات أوروبية.. المهم كلمته وياليتني ما كلمته قالي وأنا أقول أول مرة يطلع رقمك عندي بالشاشة وقفلت منه وشاهقت وكلمت أبوي في ألمانيا
كان توه مخلص جلسته قالي ولاكأنك سمعتي شي أجي وأقدم لك ولا تقولين لأمك حتى ماتزعل منه بعدشوي دقت زوجةخالي وقالت الساعةكم بتروحين تعرفين خالك مشغول بإجتماعاته وياليت بالضبط عشان نعرف متى نوديك وكم يبيلك لين تخلصين كانت تقولها بشينة نفس وحسيت إني مرة ثقيلة ولا مرة مريت بتجربة مماثلة
فقلت لها جزاكم الله خير بس الان كلموني الجامعة وقالوا إنهم رحلوا القبول لأن ما تقدم إلا عدد قليل وكنت أكذب قالت إيه خيرة .. والصدق إني مابيهم يمنون علي ولو أبوي فيه ماكان احتجتهم .. إدارة الجامعة عطوني استثناء أسبوع زيادة لكني اعتذرت منهم وطويت الموضوع ومن لحظتها كرهتهم ..
توفى أبوي الله يرحمه بألمانيا ورحت أدور على وظيفة وكل مكان كنت أقدم فيه كانوا يقولون ما عندنا شواغروكنت أتحاشى اللقاءات العائلية لأنهم بيسألون عن شيء ما أملكه.. وحسيت إن زوجةخالي تتعمدإحراجي لما يكونون كل قريباتي مجتمعات ها للان مالقيتي وظيفة؟واضطر أكذب وأقولها جاني أكثر من عرض..
وهنا تلتفت على قريباتي الي أكبر مني وتطيح وجهي عندهم وتقول طيب ليش تقدمين؟ وعندك بنات خالك اشتغلي عندهم.. هي تشوفني قاتلة نفسي بالدورات وتطوير الذات وحابة أكمل دراسات عليا فإيش بسوي بمقهى ولا صالون أو معهد حاسب.. كملتها بخسة وقالت خليك واقعية تخصصك غير مطلوب فارضي بأي شيء ..
لحظتها دق تلفوني وقمت كانواشركة تسويق فاستغربت لأني ما قدمت عليهم لكني قدمت عالبنك وقلت لهم لاوماني مسامحة الشخص الي أخذرقمي وعطاكم إياه وأثرهاسمعت المكالمة وقالت أنتي تحبين الكلام الكثير وهالوظيفةتناسبك أساسا أناكلامي قليل غيركذا ليش تستمتع وهي تحط من قدري مع إنها تعرف إني العكس
بعد بأسبوع جاء تكريم بالجامعة لزوجة خالي وأمي بالحداد ونفسيتي مدمرة ومع كذا رحت لمحل شوكولاتة وطلبت منه ينسق شكولاتة بشكل مبتكر من واقع تخصصها كانت غالية بس حبيت أعمل بأصلي حضرت التكريم ومديت لها هديتها وبعدها سألتني عن جامعة البحرين وعن تخصص لأن بنتها حابة تدرسه قلت والله صعب ..
هنا قالت بنغمة إنه بسم الله عليها بنتي شاطرة وذكية ويارب تكون أحسن منك .. أنا ما عقبت لأنها كشفت نفسها بكونها مشغولة فيني وأنا يا غافلين لكم الله .. بعدها ربي كتب لي إبتعاث لأستراليا ورحت مع أخوي وجلسنا سنوات هناك أول إجازة بالمجاملة رحت لهم البيت عساس أول مرة أجلس سنة ما أشوفهم
وحسيت إنها هي ما تغيرت بالإضافة إلى إني كرهت خالي من موقفه الي حسيته مو رجولي كنت أظنه ليتكلم معي بلطف بحكم إن لا أبوي ولا أخواني عندي يودوني لكنه خر السالفة لزوجته وهي الي كلمتني وأسلوب إني ثقيلة خلاني أقولهم إن البرنامج رحل والحقيقة ما أبي منهم منية .. بعد هالنزلة صرت ما أجيهم
قلت بنفسي خل يقولون قاطعةمايهمني تعاملت بطيب لكنهم نهائي مايستحقون أي تقديرخالي متغطرس ويرى النجاح محصوربعياله ويقلل من الاخرين وهي نفس الشيءودايم ترى أن الفتات عليك كثيروخلك واقعي لكن عيالهابرى يعملون زمالةبأوروباعادي!وتقول لأمي كل هالوقت بنتك بأستراليا !ليش تحسب علي وعيالهاعادي
٧ سنين ما شفتهم لأن كل إجازة أجي من أستراليا أقضيها في بيت جدتي بحكم إن بنات عمي قراب من نفسي وخلاص أمي صارت تسلك لهم لما يسألون عني وشكلهم فهموها قبل ٣ شهور بنت خالتي تزوجت ومافي مجال أعتذر عن الحضور فاضطريت أشوفهم وكانت أثقل ساعة بنفسي سلام من ورى القلب ..
ومن القرادة إن الطاولة الي أنا فيها كانت جنبي زوجة خالي وبناتها الثنتين الطبيبات الي جايات إجازة من فرنسا .. زوجة خالي ما جلست تدور الهوامير دوارة كود أحد يخطب بناتها وتعرفهم عليهم .. لما قمت بغرف لي من البوفيه قلت لبنات خالي تبون أجيب لكم شيء ردت زوجة خالي لا بناتي مابيهم يسمنون
لهاللحظةما أعرف ليش تتلذذوهي تقط كلام وتحط من قدر الواحدوليش تحطني بميزان مع بناتها عندكل أحدولازم ترفع فيهم وتتكلم بالنيابة عني لما أحديسأل عني وتقلل من مؤهلي!الغريب إن كل تنظيرهاونقدهاتبخرالي كانت تنقدعلى الي يركبون مع سواق صارت تخلي بناتهايسوقون والي تقول عاللبس بناتهامخربينها
حاولت ما أأثر على أمي بكراهيتهم لكن فيه موقف حز بخاطرها كانت أمي زايرتني بأستراليا برمضان لأن أخوي اضطر يرجع لمقر عمله يخلص أوراق له .. وكان من زمان ما جاء ومن المطار على بيت خالي مباشرة ما مر بيتنا دق الجرس لكن زوجة خالي من سماعة التلفون قالت خالك نايم تعرف جاي من الدوام ..
أمي ذهلت من الموقف لو قايلة له تفضل حياك تلقائي أخوي بيشكرها وبيقول جزاك الله خير بس من سنين وهو بغربة ويجي يسلم قبل يروح بيتنا وكذا تقابله! ماهو طوع لأنها لما يجون أصدقاء مع زوجاتهم تسلم عليهم .. والغريب إنهم لما عمروا بيتهم أهلي رفضوا إنهم يستأجرون وفرغوا لهم دور كامل من البيت
وكانت زوجة خالي تداوم وشغالتناترضع ولدهاوتنومه وتسوي غداهاوتجي من دوامها وتحط راسها وتنام ولا بيوم حسسناهم بضيق بالعكس كل شيء سخرناه لهم لكن مابان..أمي ما حبت موقفهامع أخوي زيادة على كذا كان رمضان بالغلط يعني قولواله تعال افطر عندنا ترى بنفس الحارة! الحمدلله أستراليا خلت أخوي شيف
من بعد الزواج الي من ٣ شهور ما شفتهم واساسا ما عندي لبنات خالي اي رقم ولا اشعر بأي عاطفة تجاههم مو لسوء فيني لكني حابة أحافظ على نفسي من أي مشاعر سلبية أو دق بالكلام .. خالي قام كلم خالتي يقول من عقب العرس ما سمعنا لهم حس هم ماخذين بخاطرهم علينا ؟ هالحكي قالته لي بنت خالتي..
بنت خالتي مشخالة وما تمسك الهرج عشان كذا ما علمتها الصدق قلت لا مافي شيء بس جدتي تعبانة وحابة أكون حولها.. اليوم خالي دق على جوال أخوي ! زين صار يعرف رقمه يقول أبي أكلم أمك حاب اسلم .. أمي عادي كا وقت ووقت تكلمهم وتمر عليهم بس الخاطر مهب مثل قبل ..
الحين أنتظر الطيران يفتح وأرجع أستراليا لأني علقت والى إن أروح موحابة أشوفهم..شكرا يا سارة إنك عرضتي موضوعي وماأعرف ليه قلت هالحكي هل عشان ارتاح أوأبين سبب تبني هالموقف لكني أحس إني بقرارمقاطعتهم الغيرمعلن أحمي نفسي من أي إساءةوموحابةأجامل على حساب صحتي خاصة إنهم خذلوني بوقت حساس
لحد يقول صارحيها بسبب صدك لأني ما أبي لت وعجن بمرحلة مضت من سنوات طويلة وماراح ترجع لكنها كشفت عن معدنهم ... غير كذا المشكلة منها هي تلذذ بجرح الاخرين وترفيع من شأن عيالها ولا أنا هذاي باخر مرة التقيت معهم عاملتهم بكل ود بس هي الى اخر لحظة تأبى أن ترتقي." انتهت رسالة منيرة ??
جاري تحميل الاقتراحات...