بعلمكم تحت ذي التغريده قصتي وكيف جاني المرض لن كثير سالوني و بسم الله نبدا
الحمدلله على قضائه وقدرته وقدر له ما أخذ وله ما أعطى اصبت بالمرض بسبب مخالطه وكانت بداية عزلي في البيت تقريبًا من تاريخ 15/3/2020 وتكلمت عنها في تغريدة سابقه اللي هي هذي
بعدها قعدت اربع ايام في البيت وفي عزل الحمدلله ماعانيت من اي مشكله صحيه الى يوم الخميس تقريبًا تاريخ 19/3/2020 كنت اغرد الفجر والحمدلله بخير بس نمت وقمت من النوم ودرجة حرارتي مرتفعه و ضيق في التنفس بشكل كنت اختنق يوم قمت قلت يمكن هذا الجاثوم لنه ماقد جاني شوي الا اكح وضيق
التنفس زاد عندي واحس جسمي متكسر احس بحاجه على صدري وجسمي مهلوك اتصلت على 937 والحمدلله خلال فترة قصيره الاهم موجودين تحت نزلت لهم ورحنا مستشفى التعليمي في الخُبر دخلت ودخلوني غرفه زي العزل وخذوا مني تحاليل وقالوا انتظر والتحليل طبعًا ياخذ وقت وقالوا النتيجه ايجابيه توترت وخفت
قالوا لا تشيل هم بناخذ لك تحليل ثاني وخذوا وطلعت ايجابيه ايقنت بالله وذكرت الله صحيح مصدوم وخايف بس كان ايماني بالله قوي ان هذا الشيء مب سهل وناس كثير راحت فيه بعدها نقلوني لغرفة العزل النفسيه صارت في الحضيض تدمرت نفسيًا قررت ابتعد عن كل شيء حتى جوالي حاولت اخذ اكثر
ممكن مع ربي اول خمسه ايام بالنسبه لي هي اصعب ايام كنت اتالم فيها بشدة بسبب ضيق التنفس ودرجة الحراره اللي عيت تنزل كانوا يعطوني الادويه اللي هي مضادات ومسكنات للالم عشان تساعدني ارتاح وماقدرت ارتاح بسبب شدة المرض الكادر الطبي الموجود عندنا عظيييم وعظييم جدًا كانوا يساعدونك ويرفهون
عنك بشكل كبير صحيح انا كنت اتالم واتوجع بس كانوا يسون كل اللي يقدرون عليه انت تحس يوم تشوف وجههم انهم متاثرين معك وخايفين عليك اكثر من نفسك كانوا يعطونك حافز ويحفزونك انك تصبر وتتخطى ايام كانت صعبه ومؤلمه ومستحيل انساها الم الظهر والبطن واكرمك الله الاسهال وضيق التنفس شيء مؤسف
لدرجة في يوم من الايام ضاف عندي التنفس لين اغمى علي بس الحمدلله ايام عدة وقدرت اتخطاها بفضل الله ثم بفضلهم كانوا يوفرون لك كل سبل الراحه امر تدلل وش تبي نجيبه لك اقسم بالله العلي العظيم ان الدوله مب مقصره وان دولتنا عظيمه اعجز عن وصفها وشكرها وشكر وزارة الصحه بدون استثناء
كان يومي عن صلاه ودعاء و اتحرك شوي في الغرفه او في ممر بعد ماخذ الاذن منهم كنت حاب اجلس مع نفسي طبعًا نقصت تقريبًا 15 كيلو الى 13 كيلو مو من قل الاكل او ان الاكل مب ممتاز لا والله الا من قل الشهيه عديت الفتره الخطره على كلام الاطباء
كان في دكتوره اثرت فيني مصريه اسمها ايمان اتوقع دكتوره كبيره في السن وكنها امك تواسيك وتطبطب عليك بكلامها وتحسن نفسيتك ولا انكر جهود كل الدكاتره ماقصروا والله بس هي اثرت فيني بشكل الله يسعدها طبعًا في ليله من الليالي في قروب اهلي مرسلين لي فيديو لك واحد فيهم يتكلم ويحفزني من امي
وابوي وزوجات ابوي واخواني وعيالهم كنت اشوف في عيونهم الخوف علي بس يحاولون يواسوني يعني من الاعترافات اللي اثرت فيني اعتراف امي وعمتي زوجة ابوي يقولون ترا كنا نسمعك يوم تدق العود في غرفتك وكنا نسمع وننبسط بس ماعلمناك يمكن هذا سر ولا تبي احد يعرفه شيء اثر فيني واشياء كثير مثل ولد
اخوي وهو يقول عمي ابيك ترجع وتوديني الاسطبل عند الخيول والخ اشياء حلوه حسستني بنعمة الاهل اللي كنت ماشوفها شيء تقريبًا ولا انسى نعمتكم انتوا ياعز الناس لقلبي واقربها لي الا والله ثم والله لو احاول ارد جميلكم ماقدر اوفيكم حقكم ياعظم ناس في حياة نمر
عدة الايام بحلوها ومرها الى يوم السبت 4/4/2020 اللي مفروض ينتهي فيه العزل وارجع البيت كانوا يتحمدون لي بالسلامه ويقولون لي غمه وراحت كنت في اشد لحظات الفرح سويت هذا اليوم اللي كنت اعد واحسب له قالوا تسوي تحليل عشان نتاكد من شفاءك سويته وطلعت النتيجه موجبه وجوا علموني
طبعًا هنا انصدمت لدرجة تاثرت من الصدمه كيف انا طيب كيف كذا يعني بقعد اكثر هنا قالوا لي معليك بناخذ تحليل ثاني بكره ان شاء الله ونتاكد هنا رجعت لغرفتي بعد مارتبت كل شيء اني بطلع ان شاء الله ورجعت منكسر بس قعدت اتحمد الله قلت خيره يمكن ارجع وانا باقي حامله وينتقل لاهلي ولا لاحد
جاء يوم الاحد سويت التحليل الثاني واخذ وقت انا خفت اكثر واكثر بسبب تزايد الحالات في المختبر وبديت اتوتر واخاف اكثر واقول شكلي ماتشافيت منه شكله باقي فيني طلعت النتيجه يوم الاربعاء الظهر تقريبًا والحمدلله سلبيه انا هنا انبسطت وفرحت وكان الدنيا مب شايلتني طاير من الفرح
بشروني وكل الكادر الموجود طاير من الفرحه تحس ان ولدهم او اخوهم اللي تشافى يباركون ويشكروني اني قدرت اعديه حتى في مسؤول من الصحه كان موجود يقول صح فيه ابطال في الحد وابطال في الصحه وانتوا ابطال هذا البلد بعد وامير المنطقه يتحمد لك بالسلامه ويتمنى الشفاء لباقي المصابين
ولا تنسونا من دعاكم والتزموا بالاومر طبعًا اخوي كان موجود ينتظرني لاحكيلكم كيف الفرحه يوم شفته وضميته حسيت ان الحياه رجعتلي
طبعًا اشكر الله على نعمته علي وعلى فضله علي واشكر خادم الشريفين الملك سلمان ولي عهده الامين الامير محمد بن سلمان واشكر وزارة الصحه وكل الاطباء الابطال اللي بعد الله هم وراء كل انجاز وحالة تعافي والله انهم يتعبون ويتاثرون نفسيًا وجسديًا بس حظهم بالاجر ولا انسى اهلي وقفتهم
واكيد انتم ودعاكم وقفتكم معي انكم عطيتوني من وقتكم قليل ودعيتوا لي والله ماوفيكم حقكم طول عمري ويارب ياعزيز يارحيم انك تلطف بباقي المصابين وتخليهم يتجاوزون كل الالم والصعاب يالله ادعولهم تكفون هم محتاجين لذا الدعاء
ونصيحه من اخو التزم بيتك تجنب كل شيء من برا لا تطلع لضروره اقسم بالله العلي العظيم والله ان كل ذا في مصلحتك وفي مصلحت البلد البلد قاعده تخسر ناس وتخسر ماديًا اقل شيء نسويه لهم نحافظ على انفسنا من كل شيء ، اعتذر على الاطاله وشكرًا لكم وقبله على راس كل شخص وقف معي❤️❤️❤️❤️
جاري تحميل الاقتراحات...