"الأمان" ... سلعة تُباع و تُشترى ! على حس الأمان ، فيه ناس عملت ثروات طائلة .. و ناس إتجننت عشان بعد ما عملوا كل حاجة ، فهموا إنه وهم كبير ! فى الأزمات ... هاتلاقى ناس كتير بتدخل مرحلة الصدمة ! عشان بيفهموا الحقيقة ! مش عيب إننا نقول إن الحياة مافيهاش أمان
طول ما الإنسان مطمئن ، هاتلاقيه "مضحوك عليه" ... لكن لما بتيجى الأزمة ، بيفوق من الغيبوبة ! يمكن يكون فيه أمان فى بعض الأفكار أو المعتقدات ، أمان فيما سيحدث للإنسان بعد الموت ! لكن "سلعة" الأمان على الأرض ... ليس لها وجود ! مش معنى كده إنك تعيش مكتئب ! لأ ... تبقى فاهم غلط
المفهوم الزائف للأمان هو اللى بيسبب الإكتئاب ... عشان عاجلاً أم آجلاً ، الإنسان بيكتشف إنه مشى ورا سراب ! لكن لو إنت فاهم الحياة ، و إنك واخد بطاقة الحياة / الصحة / الوقت .. كل ده ببلاش ! هاتخاف على إيه؟! عيش حياتك و إستمتع بها ، ما تضيعش وقت و مجهود فى الجرى ورا الأوهام!
فى وقت الأزمات بنشوف ناس عندها حالة هلع من فكرة الموت ! مش باتكلم عن اللى خايفين على عائلاتهم و لا اللى بيحبوا الحياة ! باتكلم على ناس "فعلاً" متفاجئين بفكرة الموت و كأنها لا تنطبق عليهم ! أنا شايف إن فترة التوقف دى "فُرصة" مش هاتيجى تانى .. عشان كل واحد يراجع حياته
إبحث عن جودة الحياة ... سيبك من الأرقام ! عندك كام صديق ، و كام فلوس و كام سيارة و كام ... ! الأهم هو "جودة" و "مذاق" الحياة ! أهم سلعة موجودة فى بيتك هى "الوقت" ! حياتك = وقت ! مش فلوس و لا ممتلكات ... و الوقت مالوش وجود من غير ما تكون بتتنفِس! لازم تعيش كل لحظة فى حياتك!
حاول تعيش صح ... مش لازم تكون مرتاح عشان تبقى عايش "صح" ! ممكن تكون تعبان عشان شخص بتحبه ... بس المهم إنك تكون راضى عن نفسك و عن حياتك و مواقفك و سلوكك مع الناس ! و الأهم ... يكون قلبك نضيف و بيعرف يحب و يسامح الناس ! الوقت مش متأخر! لسه عندك فرصة ...
جاري تحميل الاقتراحات...