ياخخوانا بمناسبة الزهج الحاصل دا قررت اكتب ليكم تجربتي فالدايت من ١٠٠ -٧٠ كيلو في ثريد بسيط خفيف ?⭕️
طيب يااخوانا بالمختصر المفيد كدا اقسم بالله السمنه دي حاجة متعبة نفسياً وشكلياً واي حاجة وماحتعرف الكلام دا الا بعد ماتضعف وتشوف الفرق
طبعاً دي صورتي انا في 2017 ? سمن كدا دررعه المهم بدت قصة الدايت من ود جيرانه برضو كان سمين زيي الزول دا قرر انو يضعف بدون مايوريني المهم اختفى مني لمده اسبوعين طبعاً اول ماشفتو لقيت الزول متغير وظاهر فيو حبه ضعفه كدا
المهم قلتليو الحاصل شنو .. قالي والله بديت رجيم وكدا وبدا يحمسني اخش معاو فالموضوع واقنعني الصراحة ? المهم وجا اليوم الاول مشينا الممشى ورياضة وكدا وخلص الاسبوع الاول بالنسبة لي وهو كدا تم ٣ اسابيع
من هنا صحبي دا بدا يكسر الحنك وانا لسه الحماس عندي فل ?? قلتليو ياصحبي على كيفك مرت الايام والحمدلله يوميا بمشي اجك وامشي والامور باسطة والحاجة الكانت مخلياني كل مره اتحمس زياده اني قعد اشوف النتايج من خلال الميزان كل اسبوع بلقى نفسي ناقص كيلو او نص كيلو
طبعاً عارفك داير تعرف النظام الغذائي الكنت ماشي بيو... الايام ديك انا فالثانوي طبعاً وبداوم فالمدرسه طبيعي فطوري بكون ساندويتش وعصير طبيعي .. الغدا كنت برجع البيت والقى الحجة مامقصرة ? ماكنت بحرم نفسي لكن مابقعد معاهم فالصينيه بشوف لي صحن واشيل من اي حاجة حاجة معقوله كدا
طبعاً الكلام دا كلو مابنجح لو ماشربته ليك فاليوم لترين مويه او لتر ونص ولو معاها ليمونه كمان يكون احسن لانو المويه الكتيره بتحسسك بالشبع وف نفس الوقت بتنزل من دهونك .. نرجع لموضوعنا العشا دا صراحة كنت بشد على نفسي فيو كنت بتعشى كباية بتاعت لبن و٥ بلحات يومياً
⭕️ معلومه مهمة جداً لازم يكون عندك وجبه مفتوحه فالاسبوع لاحظ اني قلته (وجبه) ما يوم مفتوح عشان تخش الاسبوع البعدو بنفس الحماس والعزيمة ??
وضروري جدا جدا جدا تبعد عن السكريات بقدر الامكان الي هيا المشروبات الغازيه والحلويات والحاجات دي برضو ممكن تكافيء نفسك بيها مع الوجبة المفتوحة نهاية الاسبوع
طبعاً مااكضب عليكم كل فترة تمر كنت بفكر اكسر الحنك لكن اي زول يشوفني وبكون مطول مني طوالي بتخلع ? ضعفته يامان ومن الحنك البرفع المعنويات دا سواءاً من اهلي او فردي والكلام دا كان بحفزني لدرجة بعيده جداً?
وفالنهاية الحمدلله قدرته اصل للحاجة الدايرة انا وماحكضب عليك واقليك الموضوع ماصعب.. الموضوع فيهو شوية صعوبه لكن لو عندك صبر وهدف ماحيبقى ليك صعب والله ??♥️
كل ماحسيت نفسك بديت تكسل حاول حفز نفسك من خلال تجارب غيرك ولو كتبته فاليوتيوب بتلقى مئات التجارب انا شخصياً كنت بتحمس كدا ? وشد حيلك يااصلي ??
انتهى
انتهى
جاري تحميل الاقتراحات...