ثريد: ماتدخلش سباق مش بتاعك ..
#قعدة_صحاب
#قعدة_صحاب
عزيزي القارئ الجميل الثريدات الخاصة ب (#قعدة_صحاب) ما هي الا محاولة افتراضية للفضفضة معاك بشأن مسائل تاعبة دماغي او شاغلة بالي ف معلش خدني تحت جناحك. موضوع النهارده عن السباق الوهمي اللي دايماً مجبر انك تجري فيه وقبل ما نبدأ ماتحاولش تاخد اي فكرة بشكل عام وخليك مرن احنا في ٢٠٢٠.
مؤخراً من بعد ما ناس كتير قعدت في البيت بقي يطلع علينا نظريات وشعارات ساذجة كده لكنها تبدو مهمة كنا محرومين منها في زحمة الشغل والدراسة زي انك لازم تستغل وقتك وتتعلم ٧٠ لغة او تلعب بيانو او تصنع صاروخ منزلي لصعود القمر لأن لو ماعملتش كده لسبب ما انت فاشل وبلا قيمة.
بعيداً عن الافلام الهندي اللي هتنتهي زي اي حاجة الا ان الموضوع ده يخلينا نركز علي نقطة مهمة وهي محاولة الانسان الغلبان المميتة في دخول اي سباق وتحدي حتي لو مش شبهه ولا بيمثله او حتي هيفيده في اي حاجة بس اللي هو انا لازم اعمل، لازم اجري مع اللي بيجروا، لازم حتي لو مش عارف مش مهم.
لويز هاي مرة قالت:
We're all victims of victims
يعني كلنا ضحايا لضحايا وبالرغم انها تبدو جملة مأساوية في تركيبتها الا انها حقيقية بشكل كبير لأن ببساطة قد تكون ضحية قسوة ابوك او اهمال والدتك اللي كانوا ضحية ناس تانية اللي هما ضحايا ناس تالتة ويبدو ان القصة مش بتقف عند شخص.
We're all victims of victims
يعني كلنا ضحايا لضحايا وبالرغم انها تبدو جملة مأساوية في تركيبتها الا انها حقيقية بشكل كبير لأن ببساطة قد تكون ضحية قسوة ابوك او اهمال والدتك اللي كانوا ضحية ناس تانية اللي هما ضحايا ناس تالتة ويبدو ان القصة مش بتقف عند شخص.
ولو مش هتبقي ضحية اسرتك ممكن تبقي ضحية استاذ جامعة غلس او مدير في الشغل اهبل او مدرس معقد اوشريك اناني والامثلة هتزيد ومش هنخلص. الفكرة انك لو ركزت هتلاقي ان اغلبنا بينزل يجري في سباق مش بتاعه ويبذل مجهود كبير والاخر يستغرب من النتيجة، يستغرب انه ليه مش مبسوط مع انه تعب وطلع عينه
انت هتنزل السباق هتنزله عزيزي القارئ صديق الكنبة سواء كان بتاعك او لأ الفكرة في امتي تقف وتخرج من السباق وتبحث عن سباقك الخاص اللي في ناس عندها نفس الطموح والمهارات ومن خلالها هتتطور وتبدع وتنافس وهل لو لقيت سباقك هيبقي عندك الشجاعة انك تنسحب من القديم من غير ما يتقال عليك فاشل!
في الواقع المسألة معقدة لأن الانسان غلبان وضعيف جداً ومش كل الاشخاص ظروفها هتسمح لها انها تخرج من سباقات كتير دخلت فيها مش شبهها. وأكيد سمعت عن واحد مرمي في وظيفة هباب بسبب التزاماته المادية او ست مستمرة في علاقة زي الزفت عشان كلام الناس وغيره من القصص..
وعشان الفئة المنفتحة اللي هتنزل في التعليقات تقولي أووه وندر الانسان لو مش بيعمل حاجة بيحبها يسيبها فوراً! هنا انا هحضنك واقولك عزيزي دي رفاهية مش عند كل الناس مع انها منطقية لكن للأسف في ناس بتجري في اكتر من سباق في نفس الوقت كنوع من جلد الذات فلو طلع من الاول لسه التاني..
طيب عشان ننجز، انا عايزة اقول ايه من كل ده؟ عايزة اقول ان كل شخص فينا بالفعل في سباق يمكن بتاعه ويمكن مش بتاعه وقبل كل ده لازم تسأل نفسك هل انت بتجري وبتبذل مجهود في المكان الصح ولا لأ؟ لو انت في سباقك ثقتك في نفسك عمرها ما هتتهز وهتحس انك في معدنك حتي لو بتتعب وتواجه تحديات.
لكن لو انت مش في سباقك هتبقي متوتر بسبب وبدون وحاسس انك محتاج تجري وتتعذب حتي لو مش محتاج تعمل كل ده. احنا في مرحلة صعبة لأنها مليئة بالانجازات الالكترونية الوهمية اللي لسبب ما بتحسسك انك محتاج تعمل شئ اصعب، تشتري حاجات اكتر وتتحول لشخص لا يختلف عن اي حد يعني بتفقد قيمتك تدريجياً
انا مش بقولك اطلع من السباق واتمرد ولا امتلك حل عزيزي القارئ لو متعشم فيا يعني لأني زيك بالظبط! بجانب ان كل بطل فيكم ليه حكايته ف مفيش حل هيساعد الكل. لكن قدرتك علي مساعدة نفسك وايجاد حل يناسب وضعك جداً كبيرة، هتحتاج وقت وشجاعة بس كل ما تلحق نفسك بدري كل ما الخسارة تقل وده المهم.
ماتخليش شوية شعارات هبلة من اشخاص تايهة توهمك انك مش بتعمل اللي عليك او انك محتاج تسابق عشان توصل لمكان مش شبهك ولا هترتاح فيه. استثمر في نفسك، اعرف انت مين، انت شبه ايه وده لازم تعرفه لوحدك فانتظارك لشخص اخر انه يقولك " ده يا معلم شبهك ولايق عليك" كارثة هتدفع ثمنها بعدين.
ولو عندك اطفال او اخوات صغيرة حاول تلهمها وتشجعها علي ايجاد سباقها ومش "تجبرها" لأن زي ما احنا شايفين العيال دي من سن صغير خياراتهم محدودة مع ان امكانياتهم كبيرة بسبب ان النجاح بقي متمثل في اطار معين فكله عايز ينزل نفس السباق حتي لو مش بتاعه فساعده قبل ما يجري ويتعب علي الفاضي.
مش حابة اطول عليكم أكتر من كده بس بصدق انا ممتنة وفخورة جداً بالاشخاص اللي بتحاول و تعافر في انها تلاقي نفسها مع انها ممكن تكون اي حد وتريح دماغها، الاشخاص اللي بتتعب وتشتغل في صمت، الاشخاص اللي بتحترم الوقت ومهتمة بجودة اللي بتعمله وتنتجه في حياتها. انتم الأبطال الحقيقية بصدق?
جاري تحميل الاقتراحات...