#مليونية6أبريل و #مليونية_30يونيو أيام قيامة لأمة السودان. في الأولى: ضد نظام ما ترك طريقة لقتلهم ووفرها. وفي الثانية: شعب كامل رفض الركوع وإرهاب #مجزرة_القيادة_العامة وبلّغ العسكر (بيان بالعمل) انو شعب حي ما بتذل. يومين استعدنا فيهم احساسنا بالوطن..والبجمعنا أكتر من البفرقنا.
+

البناء أصعب من التفكيك والهدم. ومن نافلة القول إنو الأكثر أهمية. الوضع النتج والنحنا فيهو دا ليس أبدع ما كان. لكنو الواقع القبيح والما ممكن نقفز عليهو بالهتافات وبالظن الرغبة في الشئ تكفي لتحققه! الحق ما بنتصر لأنو حق. بنتصر لو تملك أدوات التقدم.
+

السودان ما مرت بيهو لحظة في تاريخو الحديث أخطر من اللحظة الحالية. الضباع تبتسم بخبث ولحيتها تقطر من ماء وضوء لا يطهرهم... لوردات حرب في كل ركن عايزين يعيدوها لما عهد قبل الدولة المركزية الواحدة.
+

دا ما وقت ألاعيب وتكتيكات السياسة. ولا وقت نقض غزلنا. عندنا فرصة حقيقية لبناء عقد اجتماعي جديد على اساس مواطنة تكون مناط الحقوق والواجبات.
البلد شيلتها تقيلة ومخطئ من يظن لوحدو قادر يحكمها أو يطلعها من وهدتها.
+

التوحد ما معناتو عدم اختلاف الرؤى! الديموقراطية من أركانها: تقبل الاختلاف في الرأي والتسامح مع المختلف عننا. بناء نظام ببدء من كل واحد فينا. يتقبل الآخر. النقاش ما يكون على جسم الخصم. يكون على الافكار وكل واحد يطرح حجتو والناس تتفق على الأسلم والأصوب. لا مهزوم وكلنا كسبانين بلد.