انت لسة بتتفرج؟ انتى لسة بتتفرجى؟ Are you still watching؟ ليه نتفليكس بيسأل السؤال الرخم دة ولو مجاوبتش خلال كام ثانية بيوقف الفيديو اللى بتتفرج عليه؟ وليه يوتيوب مابيعملش نفس الحاجة وبيسيبك تتفرج براحتك؟ الحقيقة فى أسباب مهمة ومضمونها يكمن فى ازاى الشركتين بيعملو فلوس (ثريد ?)
أى موقع أو تطبيق عشان يشتغل ، بيحتاج سيرفر. السيرفر هو ببساطة جهاز كمبيوتر متسطب عليه الموقع وليه رقم ، لما بتكتبي اسم الموقع فى كروم أو فايرفوكس ، المتصفح بيروح يجيب رقم السيرفر بتاع الموقع ويبعتله طلب بالصفحة ، يقوم الموقع يرد بالمحتوى بتاع الصفحة عشان انت تقدر تشوفها.
الشركات كل ما تكبر بتحتاج سيرفرات أكتر عشان عدد المستخدمين ، والتكنولوجيا بتزداد تعقيدا فبدل ما يعملو هما الداتا سنتر بتاعهم ويملوه سيرفرات ، بيروحو يأجرو سيرفرات من شركات تانية. أكبر شركة فى الكوكب دلوقتى الناس بتأجر منها سيرفرات تفتكرو مين؟ أمازون. اللى بتمتلك موقع سوق فى مصر.
مين بقى أكبر زبون لسيرفرات أمازون؟ نتفليكس. نتفليكس مش موقع سهل ، محتاج يخزن مكتبة أفلامه اللى عبارة عن آلاف التيبرابايتس (التيرا 1000 جيجا) ، ويخزنها فى كذا مكان عشان المسلسل مايقطعش ، ويعمل كذا سيرفر عشان يعرف يخدم كل المستخدمين.
المشكلة فى الموضوع دة إنه مكلف جدا ﻷن أمازون بتدفعك على كل حاجة ، كل جيجا ، كل سيرفر ، وكمان مواقع الفيديو أصلا بتنقل داتا كتير جدا (افتكر الباقة بتخلص فى اد ايه) ، ساعتين على نتفليكس ممكن جهازك ينزل فيهم 4 جيجا داتا ، ونتفليكس بيدفع دم قلبه ﻷمازون عشان ينقلك الكلام دة.
فى الواقع أكتر من 50% من الداتا اللى بتتنقل عالإنترنت بتروح عالفيديو ، ويوتيوب ونتفليكس ليهم نصيب الأسد من كمية البيانات دى.
وهنا بيجي أهمية سؤال إنت لسة بتتفرج؟ لو انت فعلا مابتتفرجش ونتفليكس مستمر فى تشغيل الفيديوهات فإنت عمال تكلفهم فلوس عالفاضى بنفس ال100 جنيه اللى دفعتها أول الشهر. فليه التبذير مانوقف الفيديو ولما تبقى مركز شغله تانى.
الصراحة ممكن يكون فى أسباب تانية للخاصية زى انهم ممكن يكون جزء من اتفاقهم مع صانع المحتوى إنهم يدفعوله فلوس اكتر على حسب نسبة المشاهدة وبالتالى مش عايزين يحسبو مشاهدات مش حقيقية ، وممكن يكون عشان احصائيات المشاهدة ماتبقاش مش دقيقة ﻷنهم بيحتاجوها فى تحديد ينتجو إيه ويوقفو ايه.
أنا وجهة نظرى إن الهدف الأساسى من الخاصية هو توفير الترافيك اللى بيترمى فى الأرض ﻷن على حجم نتفليكس الموضوع دة ممكن يكلفهم ملايين الدولارات شهريا.
نيجى بقى ليوتيوب ، ليه مش بيعمل زى نتفليكس؟ يوتيوب بيعمل فلوس من الاعلانات اللى بيشغلهالك كل ما تتفرج. عادة عدد الإعلانات بيبقى نسبة من عدد الدقايق اللى بتشوفها. يوتيوب عايز يطلعلك اكبر عدد اعلانات ممكن من غير مايزهقك فى عيشتك فاتسيب الموقع.
عشان يعمل كدة ماقداموش غير حل من اتنين: يا يزود الإعلانات بالنسبة لعدد الدقايق ، يعنى مثلا بدل كل 4 دقايق اعلان يخليها كل 3. والحل التانى إنه يخليك بدل ما بتتفرج على 10 دقايق فى اليوم تتفرج على 20 أو 100 دقيقة.
الحل التانى (زيادة مجمل عدد الدقايق اللى بتقضيها عالموقع) هو السبب اللى بيخلى يوتيوب يسيبك مشغله فى الباكجراوند حتى لو مابتتفرجش ، ﻷن طول ما انت مشغله ، هو بيقدر يعرض إعلانات ، وكل ما بيعرض اعلانات ، بياخد فلوس من المعلنين ، مطبعة فلوس وجمعية ودايرة يابا على رأى الفنان الراحل.
بس كدة ، فالمرة الجاية اللى تنسى فيها الفيديو شغال افتكر انك لو على يوتيوب فانت بتخسر معلن غلبان ﻷن جوجل هتسيبك ، ولو على نتفليكس فإنت عمال تبذر داتا ونتفليكس بيقولك أبوس إيدك ركز عشان أمازون فاتورتها لا ترحم. نتمنى لكم مشاهدة ممتعة وتكونو استفدتو من الثريد. تمت.
للى مايعرفش: جوجل تمتلك موقع يوتيوب.
جاري تحميل الاقتراحات...