رتبها

#ثريد ⛓ مين افضل سيرفس برو ولا ايباد برو
" بقلك كل شي حسب تجربتي الشخصية وعطيك انطباعي النهائي للجهازين "
وبعض الامور الطيبه والشينه

سيرفس برو : له سبع اصدارات
لما اشتريت هذا الجهاز كنت اشتغل بمحل جوالات خاص فيني وكنت ابيه يقضي كل طلبات البرمجه للزبائن وكنت اكره الاب توبات نهائيآ وهذا الي خلاني اشتريه بصراحه
ابي شي خفيف وقوي في ادائه وسريع يخلص برمجتي بسرعه ... وفعلآ ابهرني الجهاز وزادت مكاسبي ولله الفضل...

الي يفهم بالبرمجه ويعرف يحل المشكله يبغاله جهاز بطل زي سيرفس برو ، المهم مشت الامور وصارو المحلات يحولون علي زباينهم اذا يبون برمجه سريعه وواحد يفهم واسعارك زي السوق ماعد بيجون لغيرك ، بذات الي عندهم نسخة احتياطيه فوق ٤٥ قيقا تنقلها لهم بفلاش او لجهاز ثاني بسرعه بيجونك دايم❤️

المهم كنت ابرمج اي شي وصمم وفرمت ونقل وحدث كل شي بجهاز سيرفس برو وكرفته كرف الله يعلم به " كنت اكشخ بالقلم الي يجي معه وستخدمه يعنني ولد صاحب شركة مايكروسوفت 😌
ويقضيها الجهاز بالراحه وماقد احرجني اوعلق او فشل بمهمه ولله الحمد ومره بالفاره ومره بالقلم وبدون كيبورد استخدمه 🙂

اذكر ايامها قفلت المحل وجيت رايح واتصل بي شخص مهم
اخذ رقمي من المحلات الي جمبي 🤦🏻‍♂️
اشترا ايفون جديد ويبي ينقل كل شي فيه
وعنده رحله بعد ثلاث ساعات وقالي اذا خدمتني بدفعلك الي تبي ،، رغم اني تعبان
ومرهق وافقت وواعدته بمقهى ، وجبت البطل سيرفس برو في شنطته مع الاسلاك وجاهز ...

جاني وشرح لي كل شي وفعلآ رحلته طيران بعد ساعتين ونص والوقت مرره ضيق
وعلى طول بديت وحنا نتقهوى المهم انجزت له المهمه في ساعه تقريبآ ورجعت الحمد لله بصراحه اكرمني بالمدح والدراهم 💰
يعني بيفيدك والجهاز مظهره عصري وخفيف وتضبط كل شي قدامه بسرعة الانجاز
بلا لاب توب بلا هم وتعب وثقل

تقلي طيب خذلك لابتوب بمواصفات عاليه واقلك اكره الاب توب وابي شي عصري يجمع الايباد ولاب توب بويندوز برو بذات
نجي الان للفرجه والتسليه والالعاب عليه
لما اشغل فلم وتفرجه عليه اشوفه عادي مثله مثل الاب توب مافي حماس رغم انه كل شي فيه ممكن وسهل ومتوفر لكن والله انه ماعجبني بذي مدري 🤷🏻‍♂️

نظام ويندوز نفسه موحق الاشياء ذي صدقني
مع ان شاشته رهيبه ودقه تشق الوجه وصوت عالي لاكن مررره ماعجبني بالفلام والفرجه
نجي للألعاب عليه : تصدق انه عندك اربع متاجر !!
متجر العاب اكس بوكس / نفس بلاي استيشن
متجر مايكروسوفت للتطبيقات / نفس ايباد
متجر برامج ويندوز
متجر اندرويد

يعني من الآخر كل شي تبيه من كلمة متجر مباح لك لانه ويندوز ياحبيبي ❤️
ويازينها داون لود منجر ولعبة فيفا 20 حقت اكس بوكس وتطبيقات اندرويد بمحاكي تشغلها وتحمل تطبيقات زي الايباد خاصه بالجهاز يعني قمة الفله صراحه واذا طفشت شفلك منتدى برامج وعيش ومر سجل الي يبون بحافز اكسب اجر 😭

تركب فيه ذاكرة جوال من الخلف ويبرمجلك الايباد والايفون وكل الجوالات وتركب فيه ماوس وعندك كامرتين امام وخلفيه وتقدر تشبكه عالتلفزيون عشان تسوي مسابقات من سيربح المليون مع الخبراء الي معك جالسين
فكرة اخوي الكبير عاد وطلعت ممتعه 😂✋

سيرفس برو بمواصفات واصدارات شوف الي يناسبك وقد فلوسك واشتريه اذا تبيه لشغلك
البرمجي او كنت يوتيوبر تمنتج وتصمم وتتنقل به ،قدامك ويندوز برو اغلا نسخ الويندوز وتقدر تحوله ايباد من النظام زي مركز التحكم ويصير كل شي زي الايباد بالضبط التصفح والبرامج وسطح المكتب والاستخدام وغيرها ...

نجي للايباد برو فيه منه اصدارات واحجام
واغلبنا يعرفها
ايباد برو رفيقك اليومي اتحداك تمل منه
ونت تاكل تشغل شي تتفرجه وانت منسدح تتفرج واذا طفشان بتلعب عليه واذا تبي تتصفح مره سلس كانه ايفونك الضخم
كل شي تعرفله ومتمكن منه
الافلام والمباريات واليوتيوب عليه شي خرافي
وصوته قوي

ايباد برو ايضا خفيف لكن عيبه مافيه مداخل
عكس سيرفس برو
وابل مستحيل تخليك تكلم به زي الايفون
سيرفس برو في منه بشريحة ولكن برضه انترنت بس وفيه برامج تخليك تتصل به طبعآ دام نظامه ويندوز مادورت الاشياء ذي 🤷🏻‍♂️
ايباد برو بطاريته تكفيك فوق ٦ ساعات كرف
سيرفس برو لا يادوبك كرف ٣ ساعات

ايباد برو النظام محمي وبطل وماله تطبيقات حماية فيروسات بالمتجر لانه ماله فيروسات اساسا واي مشكله تلاقي ابل رسلتلك تحديث
وقضت عليها ،سيرفس برو لا يبغالك يابو ويندوز برامج حمايه وتجلس تدور مفتاح يشتغل بين منتدى والآخر اذا ماودك تشتري برنامج حمايه وياشين تحديثات ويندوز تنفخ الجهاز

ايباد برو من الآخر حق العاب وافلام ومشاهده
اي نعم فيه تطبيقات مايكروسوفت وتطبيقات مونتاج وغيرهااا لكن ماهي مثل اذا فتحت الويندوز من سيرفس برو صدقني
تعرف اذا قدامك ويندوز برو والبرامج في جهازك تفرق اشد الفروقات عن الايباد
ولعلمك ويندوز برو الي بسيرفس برو هوافضل انظمة مايكروسوفت

ايباد افضل من سيرفس برو ولكن سيرفس برو يصلح الايباد اذا تعطل برمجيآ 🤷🏻‍♂️
افضل في المشاهده
▫️ايباد برو
افضل للشغل
▪️سيرفس برو
افضل لإنجاز البرمجه
▪️سيرفس برو
مداخل اكثر وذاكره
▪️سيرفس برو
صوت عالي
▫️ايباد برو
بطاريه اطول
▫️ايباد برو
ارخص بسلك الشاحن
▫️ايباد برو
بصمة وجه
=بالجهازين

طبعآ سيرفس برو فيه شركات زي HP عندها نفسه وبذات التصميم شي يخليك تلبس ثوبك وتنزل تشتريه من جمال التصميم وفكرة الجهاز
وفيه شركات كثيره بافكار وتصميمات رهيبه
كلها داخلها ويندوز برو ونفس سيرفس برو
ابحث وتلاقيهم بصدارات 2020

المواصفات والانظمه لها طريق آخر انت تحدده
وماحبيت اذكرها بالتفصيل لانها مدرجه بموقع الجهازين ، المهم عطيتكم كل شي حسب استخدامي وانطباعي الشخصي وفوقها موقف خرجت منه بنصيب الأسد 🙂✋
اي استفسار اكتبه تحت الثريد وبرد عليه باذن الله 🌹

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد