قد استمريتوا على دعوة هود عليه السلام؟ تجنن توكلي يصير مليون اذا كررتها اللي هي : إِنِّي تَوَكَّلْتُ عَلَى اللَّهِ رَبِّي وَرَبِّكُمْ مَا مِنْ دَابَّةٍ إِلا هُوَ آخِذٌ بِنَاصِيَتِهَا إِنَّ رَبِّي عَلَى صِرَاطٍ مُسْتَقِيمٍ} كرروها كثير بيومكم وخلوها من دعواتكم مره احبها وقوية??♥️
طيب بعلمكم قصتها وسبب حبي الكبير لها : طبعا تعرفون كل نبي له دعوة دعى فيها مثلا موسى عليه السلام دعوته: ربي إني لما أنزلت إلي من خير فقير ورزقه ربي العمل والزوجة والناس حالياً يكررونها ويعرفونها بكذا نية و هكذا باقي دعوات الانبياء بس ماشفت احد ابداً يتكلم عن دعوة هود عليه السلام!
هود عليه السلام ارسله الله سبحانه الى قوم عاد وكانوا مشهورين بقوة البدن و قيل انهم عمالقة وبأسهم شديد وعندهم مال كثير ومواشي كمان كثير وجوا بعد قوم نوح عليه السلام وكانوا جبارين ويعثون فساد بالارض ويتابهون بنيتهم الضخمة وجبروتهم وتكبرهم!!
قال الله عز وجل {أَلَمْ تَرَ كَيْفَ فَعَلَ رَبُّكَ بِعَادٍ * إِرَمَ ذَاتِ الْعِمَادِ *الَّتِي لَمْ يُخْلَقْ مِثْلُهَا فِي الْبِلَادِ} 8-الفجر، زي ماقلت تكبروا على نعم الله واغتروا باللي هم فيه وارسل الله سبحانه هود عليه السلام عشان يصحيهم من غفلتهم وينصحهم بعبادة الله.
والاستغفار ووضح لهم انه ماله مصلحه ولا يبغى اجر مادي منهم وعاندوا واصروا على ماهم فيه،واتهموه بالجنون وانو سفيه حتى انهم قالوا انه عقله فيه شيء واستمر هود عليه السلام بدعوته وكانوا مصرين ان دين ابائهم هو الصح وتحدوا الله ينزل عليهم العذاب،استجاب الله البداية حبس عنهم المطر ..
لين اراضيهم اللي تفاخروا فيها اجدبت،وما اعتبروا استمروا بالتكبر فارسل الله سبحانه الريح عليهم وفرحوا يحسبونها ريح رحمة وطلعت ريح عذاب استمرت ٧ ليالي و٨ ايام وكانت قوية لدرجة تشيلهم لٰ اعلى مكان وتقذفهم بالارض وتنكسر اعناقهم حتى شبهم سبحانه بالنخل الخاوي ! كلنا نعرف لين هنا .
الجديد وانا أتامل بسورة هود امس قعدت اقرا الحوار بين هود عليه السلام و قومه و وصلت عند دعوة هود واستوعبت نقطة هود عليه السلام قال"إني توكلت على الله ربي وربكم الى اخر الاية" كان بمواجهة قبيلة كاملة ضخمة البنية،قوية الجسد،ومتحدين كلهم عليه ومتآمرين على قتله وهو ما ضرب حساب ابد..
بغض النظر انه نبي،الموقف عصيب كان يعني ولكن التوكل هو اللي صنع المعجزة عشان كذا اموت بكل شيء يربطني بالتوكل ، وعشان كذا احب كل دعوة فيها توكل مثل الحوقلة ودعوة هود و حسبي الله ونعم الوكيل وتتبعوا كل اية بالقران فيها توكل اش يصير بعده؟ اقرب شيء بسورة ال عمران اخر الصفحات .
الَّذِين قال لَهُمُ النَّاس إِنَّ النَّاسَ قَد جَمَعُوا لَكُمْ فَاخْشَوْهُمْ فَزَادَهُمْ إِيمَانًا وَقَالُوا حَسْبُنَا اللَّهُ وَنِعْمَ الْوَكِيلُ فَانقَلَبُوا بِنِعْمَةٍ مِّنَ اللَّهِ وَفَضْلٍ لَّمْ يَمْسَسْهُمْ سُوءٌ وَاتَّبَعُوا رِضْوَانَ اللَّهِ ۗ وَاللَّهُ ذُو فَضْلٍ عَظِيمٍ
اذا خايف وقلقان وقلبك مفزوع او في امر مسوي لك اعياء و مرهقك بس فوضه لله وتوكل على ربك مع فعل السبب ان وجد وكرر دعوة هود وحوقل و قول حسبي الله ونعم الوكيل تحس جبل يطيح من قلبك وتفرج?، لما توصل درجة توكل عالية تشوف اثر عظيم يبتدي بقلبك وراحته وينتهي بفرج مبهر و طبعاً من واقع
مافي شيء اقوله عبث، استمروا على دعوة هود و شوفوا كيف شعور التوكل يوصل ل مستوى عالي وترتاحون مره و يصير بالمقابل اليقين مرتفع ايضاً ولاتستعجلون شيء واستمتعوا وانتو بمناجاة ربي بكل ذكر تدبروا افهموا ولا تعاملون الله سبحانه بعجاله او قلق على مهلكم وتطمنوا والله يريح قلوبكم يارب ?✨
جاري تحميل الاقتراحات...