ثريد لاستقعاد الوالد ايام الحجر الصحي وحظر التجوال⭕️⭕️
اول ٣ ايام بالحجر الصحي يقفل النت الساعه ١١ الليل ويخلينا نقوم الصبح وفيك خير جرب تتأخر عن الساعه ٨ والله ان تشوف نجوم الليل بعز القايله
بعدين صار يداوم ويرجع يتحلطم ليش مخلينهم يداومون وطبعاً محد ماكلها الا انا وامي يدخل علينا بالمطبخ ويلعن سمعة كل من يطلع ويدخل
يوم جا الويكند اللي طاف ركبنا السياره وجينا الديره طبعا المعتقدات والعادات والتقاليد تنص على أن الديره مطهره من الفايروسات والميكروبات، أي اعتراضات انت برا العايله
ونقعد بهالديره ونسلم ع القرايب وهه هه نشوف الاوضاع لين صار حظر التجول وهذي مصيبتي انا
اول يوم بحظر التجول راح للبر هو واخوياه الظهر وقعد لين الليل قلك الديره مافيها انظمه زي العاصمه وباقي المدن وجتهم الدوريات ورجعوهم البيت
ورجع يتحلطم علينا وحط حرته بالعشاء ماخلا صحن بالمطبخ ماطلعه ولا علبة بهارات وفلفل ماحطهم بالدجاج وقعدنا ناكل ونشرب وراه مويه بارد لين اذن الفجر واذا انت صاحي قل طعمه مو زين
وتونا مامدانا قلنا بسم الله وضعت جنبي بننام الا يقومنا الساعه ٩ يبغى غداء بيروح البر مره ثانيه طبعا السعاوده ما يتوبون
وراح البر ورجع العصر وهذا يعني مرررره بدري بس عشان الدوريات لا يتلونهم زي امس شفيكم اهم شي احترام الانظمه
والله ويتكي بالصاله اللي اخر مره قعد فيها قبل ١٢ سنه ويغصبنا كلنا نقعد فيها ويقعد يسألنا اسئله دينيه أي جواب غلط ينتقل دينك من الاسلام للمسيحيه
بعدين محاضره عن بر الوالدين كالعاده اطول مني ومن اخواني كلهم وكلام ماله نهايه عن الديره والاثار التاريخيه اللي محد يهتم لها
وامي تترجاه يروح يجيب اغراض العشاء لا نقعد مشردين بعد حظر التجول يوم صارت الساعه ٦:٥٥ جا الفرج من رب العالمين وطلع من الباب وراح اخيرا يجيب لنا بلعه
وتجي ٧ ونص والوالد ما جا وامي تسوي دراما وتقول مسكوه الدوريات الحين بنفلس واختي تصيح تقول بينسجن واخوي يقول يعني اخذ سيارته؟
اخر شي جا الوالد بسيارة الدوريات وطلعوا فعلاً ماسكينه بس اللي بالسياره طلع ولد خالتنا العسكري اللي مانشوفه الا بالعيد وقعدوا يسولفون مع بعض واخذهم الحنين الى الذكريات وهكذا وحنا اللي اكلناها
وعجزنا لا نقعده بالصاله دخل المطبخ وسوا لنا اكله والله مدري وشهي بس اهم شي مانموت وبلعناها غصب كالعاده
وهربت من هذا البيت الفضيع الى بيت عمتي العزيزه عشان ينقذوني من مصيبتي وابتلائي اللي طحت فيهم والفجر دق علي قال يلا ارجعي قلت هههه حظر تجول يلا انا بنام باي وتحسبونه خلاني لا والله جا الظهر وفجع المسلمين مليون اتصال على جوالي وكله رسايل تهديد ووعيد انه لو جت ٧ وانا نايمه ياويلي
ونروح بعز القوايل لمحلات الكهرب ندور لمبه للحمام توه يستوعب اننا ندخله بفلاش اخر الليل
انا مدري وش ذنبي ماينزلني للبيت اول شي بس شكله عقاب ع الصامت لاني منحاشه لعمتي بس عاد شسوي من قال له يستقعد
ارجع البيت يستقبلوني اخواني بالاحضان مسوين فاقديني بس عشان ماعندهم احد يجيب كورتهم اذا تسطحت ويركب الغاز المهم وانام لين المغرب ويوم صحيت لقيت الوالد فوق طاولة الاكل ومعه مكنسه كهربائيه قاعد يكنس الغبار اللي فوق الدواليب ويمسح لمبات السقف بكلوركس وللان ماني متأكده من صحة مايفعله
المهم وارجع غرفتي ويلحقني يقول الحين انتي ليش ما تدرسين عن بعد؟ طيب الحين اخوانك هذولي بيرفعون روسنا ولا بيرسبون؟ طيب وش عندك شاريه آلتين للكوفي وانتي بس تسوين قهوه بارده؟ طيب اسمعي تعالي نطلع القطاوه اللي بسطحنا اشغلونا وبيتنا ذا بآخر الديره حتى جنانوه مافيه
وقعدنا بالصاله وامي تقول الحين الحرامي اذا طب بيتنا بيجي من حوش الرجال ولا حوش الحريم؟ طيب تتوقعون بيسرق الذهب حقي؟ وابوي توه يدري انه حاط حوش للحريم من الجهه الثانيه للبيت واختي قاعده تقارن شاشة الصاله بشاشة الملحق اللي برا وتشوف هل لو حاول الحرامي يسرق وش بيصير اسهل عليه
واخوي قاعد يصيح عشان الرسول صلى الله عليه وسلم ميت وشرهان على امي ليش ماقومته من النوم قبل لا يموت الرسول وانا للحين ماني عارفه من وين جاب السالفه طبعا اهلي سافهينه جته الحاله خلوه
عاد قلت بعطيهم وجه اليوم واسوي العشاء وسويت كيك وحركات لان بدت تزق معي من الاوضاع المهم يوم خلصنا جمعنا الوالد بالصاله وقعد يعلمنا عن مستوى اخوي كيف ارتفع وكيف شد حيله وكيف انهم حفزوه واشتروا له سياره عشان نسبته كانت ٦٦ وصارت ٧٤
لا تطقطقون تراهم جد مستانسين فيه ويحسبونه شاطر الحين وهو من يجي يحط الكتب بهالسجاده ويلفهم ولا اشوفهم الا ايام الاختبارات طبعا يطلعهم عشان امي تحطهم مع حاوية الورق اللي عند مسجد الحاره
ومخلينه مثال لاخواني الصغار عشان العظه والعبره وعشان نسبتهم ما تصير زي ذالحمار ٦٦ لازم تصير ٧٤ وكذا طبعا يعاملوني معاملة المزهريه المستمعه واحياناً اصير كنبه على جنب
بس عادي والله يعني اهم شي اني عايشه واتنفس واحدثكم حاليا وانا بحوش الحريم اللي ابوي مايدري عنه منحاشه مابغى يسوي لي محاضرات وقاعد يرسل لي ع الواتس، يحدث الان:
فوق ما انه مرسل لي نفس الرساله ٣٠ مره من حملت الواتس يبغاني اقراها واحفظها ويبغاني اسمع مقاطع الشيخ يوم انه يسولف عن اهله وكيف بر فيهم ولزوم اصير مثل ذالشيخ ولا بصير ملحده
انا اقول يخلونه يرجع يداوم زي اول لان مو معقول الحين قاعد يمسح كفرات السياره بالحوش الثاني واخاف اروح ويخليني اغسل الشارع اللي قدام بيتنا
هذا وهو يداوم بس يوم الثلاثاء والخميس، الاوضاع مزريه جداً وانا اُطالب الحرس الوطني ياخذون رقيبهم هذا ويخلونه يقعد حتى لو بالمكتب مايسوي شي اهم شي لا يقعد بالبيت
أي ابديت للاستقعاد بكتبه لكم الايام الجايه الله يستر
جاري تحميل الاقتراحات...