البوست ده مش محاولة مني لكتابة شوية نصايح علشان الCoronaVirus.. بس فيه شوية حاجات بتدور في دماغي وقولت لازم أقولهم.
١-أنا زي أي مصري أصيل كنت متشكك في موضوع الڤيروس ده وواخد الموضوع بضحك وههخه، من أسبوعين كنت بصّور في سلطنة عمان وكنت أنا وفريق التصوير بنهرج على إن ازاي العالم مكبر الموضوع.. وكنت بقول لنفسي وأنا ماشي ع البحر بالليل إن "ما الدنيا أمان أهو والناس ولا كأن فيه حاجة"
وكان وقتها السلطنة أعلنت إن فيه ٤ حالات مكتشفة بس..عمري ما تخيلت إن التمشية بتاعت البحر دي ما حدش هيعرف يعملها دلوقتي.. مش تقول لي العالم كله يقفل القفلة السودة دي! الحياة اللي انت عايشها دلوقتي ومطمئن وفاكرها شيء مُسلّم بيه ممكن ما تلاقيهاش بكره!
٢- لحد ما رجعت لندن كنت شايف الموضوع مبالغ فيه وايه الهبل ده ما هو دور انفلونزا عادي وخلاص.. لحد ما دردشت مع بعض الأصدقاء الأطباء المصريين اللي شغالين في لندن ونقلوا لي الصورة من أرض الواقع بدون أي تجميل.. وللأسف بدأت أقلق وفعلاً دلوقتي العالم بين ايدين ربنا..
٣- فكرة إن فيه دول ربنا حاميها بسبب الطقس، أو الجينات، أو المناعة، ده شيء كل إنسان بيتمناه حقيقي لدولته ومجتمعه، لكن للأسف ما فيش حتى الآن أي دلائل علمية تدعم هذا الكلام.. بالعكس الڤيروس انطلق في دول فيها برد دلوقتي، ودول معتدلة الطقس، ودول الطقس حار دلوقتي..
انطلق في كل القارات وفي كل الأعراق.. انطلق في الدول الغنية والدول المخربشة.. الفكرة إن فيه ناس لبست الموجة بدري عن ناس بس. فأرجو ما حدش يروج لهذا الكلام ال"مطمئن" وقتياً لأن ممكن يكون ضرره كبير جداً وأنت مش واخد بالك.. مش كل الكلام.. العالم لسه بيفهم المرض ده فما نستعجلش.
٤- حسب ما فهمت، المشكلة مش في الڤيروس. هو مش خطير أوي.. لكن مشكلته إنه بينتشر بسرعة كبيرة أكبر من الانفلونزا العادية.. وللأسف حسب الإحصائيات فيه حوالي ١٥٪ إلى ١٨٪ من المصابين هيحتاجوا يتلقوا العلاج في المستشفيات.. وهنا المشكلة..
إن ما فيش نظام صحي في العالم كله هيقدر يصمد قدام الضغط ده.. طب يعني ايه النظام الصحي ينهار؟ يعني المريض اللي محتاج فوراً سرير في مستشفى وعلاج فوري مش هيلاقي في البلد كلها مكان له..
والنظام الصحي بيضطر يخلي الاستشاريين هم اللي يقرروا مين يخش ياخد الرعاية ومين يسيبوه يواجه مصيره بناء على السن والحالة الصحية العامة وحاجات تانية، يعني لو اتنين عيانين وواحد فيهم مدخن بيقولوا للمدخن انت شكراً ما لكش مكان حتى لو حالته نسبة شفائها أعلى وهكذا.
ده اللي بيحصل في إيطاليا دلوقتي، والخطة اللي قالوها لأصدقائي الأطباء هنا في بريطانيا.. وده كابوس طبعاً
٥- الحل زي ما كلنا عارفين هو إبطاء معدل الانتشار.. لذلك لازم فعلاً نلتزم بقرارات الحكومات وخلاص نكتفي بالهزار بقى وهاها وشعب مالوش كاتالوج دي خلاص خلصنا منها..
٥- الحل زي ما كلنا عارفين هو إبطاء معدل الانتشار.. لذلك لازم فعلاً نلتزم بقرارات الحكومات وخلاص نكتفي بالهزار بقى وهاها وشعب مالوش كاتالوج دي خلاص خلصنا منها..
٦-توقعات العلماء إن المرض ده هيصيب تقريباً ٨٠٪ من البشر خلال الفترة القادمة.. فالصح أننا نقوي المناعة قدر المستطاع بالنوم الجيد والأكل الجيد ونبطل تدخين وشيشة وأي حاجة تضعف عمل الرئة عشان لما ييجي يبقى عدو خفيف نتغلب عليه بسرعة. ونسأل الله السلامة لنا ولأحبابنا.
٧-الشراء والتخزين وارتفاع الأسعار ده شيء هيحصل كده كده وما نلومش الناس عليه ولا نوصمهم بالأنانية لأن كلنا غالباً هنعمل كده، لكن أرجو أرجو أرجو، كل واحد يتمم على جيرانه لو حد ناقصه حاجة أو محتاج حاجة مش لاقيها في السوق وهي عندك بالأكوام يعني.. لو ما عملناش كده تبقى هي دي الأنانية.
٨-الصدمة الاقتصادية هتكون ضخمة وحقيقي مش عارف أبعادها ايه، وما أعتقدش فيه حد عارف أبعادها ايه وهتستمر أد ايه.. لكن على الأقل الصدمة على الكل.. ما فيش حد مستفيد من اللي بيحصل ده في العالم كله.. فنتعكز على بعضينا بقى وربنا يعديها على خير وندعو من كل قلوبنا إن ربنا يرفع البلاء ده
٩-للأسف الدول اللي زي حالاتنا هنقف على أبواب الدول العظمى اللي عندها بحث علمي وشغالين على مصل أو علاج للڤيروس ده، وهنبقى تحت رحمتهم.. فياريت الأزمة دي تفوقنا كأمة في الطراوة كل همها الأكل الشرب والاستهلاك والكراسي والعروش.
١٠- الناس البركة يدعوا لنا.. يدعوا لنا.. يدعوا لنا.
١٠- الناس البركة يدعوا لنا.. يدعوا لنا.. يدعوا لنا.
جاري تحميل الاقتراحات...