عندكم علم إن الكويت فيها آبار ما اكتشفوها؟ آبار عظيمة جدًا لا زالت بعيدة عن التنقيب و أكاد أجزم أن يه الوقت إلي لازم فيه ثروتنا الحقيقية??! العالم كله حاليًا يعيش مُنافسة و سباق عظيم بس احنا مو ضمن المنافسة بل في صفوف الجماهير لا أكثر،سباق علمي و مضمار شرس من الأبحاث العلمية!
يحدث بين الدول حاليًا عشان يوجدون علاج للڤايروس بس هني الجمهور مكبل الأيدي مو لأن ما يقدر بس لأن يقدر بس ماكو عون له، أي جمهور أقصد بالضبط؟ أقصد أصحاب التخصصات العلمية في العلوم الأساسية خل أربطلكم الموضوع عشان توصل الفكرة: الڤايروس بخواصه و تاريخه و أسلوبه يُدرس في تخصص موجود في
كلية العلوم جامعة الكويت اسمه Microbiology?أما الخريطة الجينية حق الڤايروس و تاريخه و أصله و إمكانية مساعدته في العلاج فبتخصص اسمه Molecular Biology? أما شلون الڤايروس يأثر علىٰ العمليات في الجسم و شلون اذا انوجد العلاج بيتفاعل مع الجسم فبتخصص اسمه Biochemistry?
أما دور علم الحيوان zoology? المتمثل في التجارب بالدور الأول تحتاج حيوانات بالمختبر قبل أن تُطبق علىٰ الإنسان و دور علم النبات botany☘️ في مساعدته لإيجاد علاج و الكيميا الي تفهمكم شلون ممكن تغيير الروابط يغير المسار مثل المعقمات و الصابون الي قاعد تستخدمونها! فكرتها كيميائية⚗️!
أما تخصص الإحصاءالمطلوب حاليًا عشان يسويلي إحصائيات حق المصابين و غيره الي مهمة بظل مرض قاعد يصيب أعداد كبيرة، و تخصص الرياضيات إلي عن طريق المعادلات الرياضيات انا ممكن اعرف سلوك الازمة هل بيزيد هل بيقل و للعلم في دول قاعد تتخد قراراتها و إجراءاتها على هذا الأساس?!
و لكم أن تتخيلوا إن حتى الفيزيا لها دور، الڤايروس و تكوينه حق نفسه ممكن يُفسر بطريقة فيزيائية للعلم! المعرفة بهذي العلوم كنز موجود عند قلة لنفرض كانت تخصصات كلية العلوم موجودة بدون تطبيق، الشخص الشغوف سواء خريج باحث دكتور راح يشبع فضوله في العلم لا أكثر?!
إنما إذا خليته يطبق راح ينقذ بعلمه آلاف، ما لاحظتوا إن الڤايروس مو خايفين إنتوا منه كثر ما ناطرين علاج يطلع عشان تتطمنون؟ ترىٰ العلاج ينوجد بس الموضوع مسألة وقت لا أكثر و كل ما الوقت يزيد احنا قاعد نضيع علينا ناس متخصصة ممكن تجتمع عشان..
توجد العلاج كون للعلم ما يقدر الشخص بروحه يسعى لان مدخوله الفردي غير كافي ان يسوي حتى دراسة بسيطة العلم مكلف و يحتاج عون و سند يساعد الشخص + كل الي تشوفونه الحين إهوا نتيجة جنود مجهولة من التخصصات العلمية الأساسية إلي تمد يد العون و تقوي التطبيقي مثل الطب و الصيدلة و المختبرات ..
العلاقة مابين التخصصات في العلوم الأساسية و العلوم التطبيقية علاقة جدًا متكاملة ما يطغى فيها تخصص علىٰ آخر، تخيلوا معاي وردة تقدر الوردة تعيش و تكون بأجمل حالاتها و الجذور إلي إهيا تخصصات العلوم الأساسية مُهملة بدون ماي؟ طبعًا لا لازم يكون في تكامل بين العلوم عشان ننتج أبحاث?
و هٰذا الأساس من طرحي للموضوع، مافي بيئة علمية حقيقية بميزانية تليق بمقام الأبحاث العلمية هدفها تحتضن العقل العلمي الشغوف إلي قيمته في عصر قائم علىٰ على العلم تُقدر بكون ليش احنا نخلي هالعقول تروح برا فقط لأن البيئة هني ما قدمت لها ابسط حقها الاهتمام بالعلم الاساسي؟
تخيلوا لو كان في مركز أبحاث علمي يجمع بين التخصصات في العلوم الأساسية و التطبيقية باسم الكويت و يكون هدفة أن يكون العلم سلاح تتسلح فيه الدولة بعصر التقدم العلمي و يكون فيه استغلال لعقول تكون إهيا الوقود للمنافسة شي حلو صح؟
شنو إلي ناقصنا عشان نكون ضمن الدول إلي من أول يوم طلع فيه الڤايروس و إهيا تسعىٰ تكون السباقة؟ عندي إيمان عظيم متى ما اجتمعت التخصصات تحت مكان يهمه تقدم الكويت العلمي بالمقام الأول مع أشخاص يقدمون طاقاتهم المكبوتة
راح يصير عندنا طفرة علمية عظيمة لأن أفضل استثمار إهوا الاستثمار في عقل الإنسان، متىٰ ما حرمنا العقل إن يطلق قوته في تخصصه بالبيئة الصح إلي موفرلته كل احتياجه من مكان معدات مبلغ و قدره راح نكون حرمنا نفسنا كدولة من تقدم علمي عظيم، الطاقات موجودة كل شي ممكن يصير!
بس يحتاج خطوة جريئة فعلية تُطبق و نشوف المركز يظل هالتخصصات بالواقع و يكون بيئة حق العالم الصغير إلي بداخل الأشخاص، أتوقع يه الوقت إلي كلكم استشعرتوا فيه قيمك العلم و ضرورة وجوده ضمن المستقبل??!
الحين أفضل فرصة عشان الكل يحس بقيمة التخصصات العلمية و أهمية إنها تتضافر في الأبحاث و شلون الأبحاث لما تكون أساسها الشعب إلي عطيناه الثقة في قدرته بتخلينا ممكن يوم من الأيام مو مكتوفين الأيدي و مشاهدين فقط بل ممكن نكون ضمن المنافسة العلمية??♂️?!
لأن حرام نركز على الجامعة و شكلها و تقدم عمارتها و ننسىٰ أن تطور العلم قائم علىٰ العقول و ليس المباني الجديدة، أتمنىٰ جدًا إن الرسالة وصلت آنا كطالبة بكلية العلوم تخصص بيولوجيا جُزيئية? حسيت إن أمانة إن أوصل هالشي حتىٰ لو مر مرور الكرام و ما سبب تأثير بس كافي إني قلته..
إي و كلمة بخاطري إلي يقولون لكم كلية العلوم مقبرة قولوا لهم : طلبتها الحقيقيين إلي مقدرين عظمة علمها ما عندهم مشكلة يندفون في علمها و لا يذوقون مرارة الجهل بدونها?❤️
شي أخير: ترىٰ كلش ما كانت راح تكون خطوة صعبة و لا مستحيلة بس الواقع صعبها و خلاها حلم، و مجرد اهتمام إضافي حق التخصصات العلمية و بناء مركز فعليًا هدفه علمي بميزانية عظيمة تساوي أهميته راح يخلي الأشياء إلي ما كنتوا تسمعونها تنسمع ..???✅?????:
جاري تحميل الاقتراحات...