صباح الخير ثريد النهاردة دعوة لتدوين قصصكم مع الاخوان اللى حواليكم .. كلنا اتعاملنا مع اخوان كتير علنيين من 2011 وما بعدها فعلوا هاشتاج #قصتى_مع_الاخوان واحكوا حكاياتكم مع افراد الاخوان الذن يقولون ما لا يفعلون والدين بالنسبة غطاء وانا حبدأ
انا باكتب مقالات كهواية من 2007 وبعد 2011 فوجئت بمهندس معانا لقبه "أ" بيتعامل انه زعيم ودقنه ابتدت تطلع رغم انه ماكنش بيقول السلام عليكم قبلها .. قرأ دراستى المتواضعة "تطور فكر الجماعات من الاخوان الى السلفية الجهادية" عبر اصدقاء ليا كانوا متعودين يقرأوا مقالاتى
اتضح انه قيادى اخوانى كبير عندنا فى اسكندرية وبالذات فى منطقة غرب ولقيته بيجى لى المكتب يقولى دراسة ممتازة بس نسيت تكتب ان الاخوان جماعة ربانية تدعو بالحسنى وترفض العنف ... طبعا قولت له ايه اللى بتقوله ده الكلام ده مش صحيح اخد بعضه ومشى ..
لما ابتدأوا يعملوا الحزب كنا فى وردية ليل نادانى لمكتبه وقالى انت عارف اننا بنعمل حزب وانا عايزك تيجى معانا ..قولتله مبدأى لا تسمح ..قالى احنا حزب جامع وبلا بلا بلا وكل الاطياف ممثلة ..قولتله آسف ارفض لان ببساطة انا يسارى وحزبكم يمينى ..قالى مبقاش فى يسار
الاهم انه ابتدى بعدها يقولى انت عارف الدنيا حتمشى ازاى وان احنا اللى جايين جايين وحرام حد زيك ميستفيدش ويبقى اسمه فى المعارضة وبعدين انا مش حاعوز منك كتير حاديك 8-10 شباب تدربهم يطلعوا زيك او قريبين منك وخلاص .. اكدت الرفض واعتذرت
جت بعدها هوجة لم الفلوس بتاعة محمد حسان ..وقف فى وسط الكونترول روم وقال ان الكل حيتبرع وان حيبعت للشركة تخصم من مرتباتنا مباشرة ..طبعا وقفت رفضت وقلت ان الكونترول روم مش مكان الكلام ده وانى رافض اساسا مليم يتخصم منى ويروح لحسان واللى حيعمل كده حاحبسه
كنا دخلنا فى مرحلة انتخابات النقابات وساعتها مديرى وقتها طلب انى اساعد فى انتخابات نقابة العلميين فى تشكيل جبهة ضد جبهة الاخوان .. مش حاحكى بقى على سحب الميكروفون فى اللقاءات الانتخابية لان النقابة العامة اللى كانت خاضعة ليهم اختارت اتنين اساتذة اخوان فى الكلية يشرفوا
والمرشح على منصب النقيب وقتها- الله يرحمه- تم استدعاؤه لمقر الاخوان فى سيدى جابر يمضى استمارة الترشح هناك مش فى النقابة .. ولا حاتكلم على التعنت فى تسليم بيانات الناخبين ولا حتى حملة طرق الابواب ونشر اشاعات ضد المرشح المضاد تتهمه فى ذمته المالية بعد ما كانت نفس النقابة كرمته ..
الانتخابات دى ب 7 شهور بالظبط باعتباره بطل حرب اكتوبر وموقعة كبريت ورئيس مجلس ادارة احدى اكبر شركات البتروكيماويات اللى رفض تخصيصها ..الخ . بس لم يتورعوا عن سبه ونشر الاشاعات حوله .. ويوم الانتخابات نفسها مهزلة.. سحبوا كارنيهات الناخبين ومنعوا دخولهم لحين وصول
اوتوبيس اتباعهم من العجمى واللى اغلبهم كان ستات اتحججوا ان ليهم طابور منفصل وقفلوا باب النقابة ودخلوهم الاول علشان يحكموا التصويت.. ده غير انهم زحموا مدخل النقابة بدبلومات ومحامين علشان الناس تزهق وتمشى ..لسة فاكر الراجل ابو جلباب قصير ولحية وهو بيقول
حنكسب دى وكل النقابات وكل الانتخابات ونحط الكفار تحت رجلنا .. والراجل الستينى ابو لحية بيضا اللى ضرب بنت المرشح المنافس فى صدرها لقيامها بتوزيع ورق الدعاية .. بعد الانتخابات وبعد نشاطنا انا وصديقى العزيز عمر ..ابتدت تانى سياسة "سيف المعز ودهبه"..
اتصالات مباشرة من الاخوان العلنيين فى المجلس بينا وطلب اننا نتعاون مع المجلس الجديد "علشان دى الديمقراطية" وطبعا رحبنا لنفاجئ ان التعاون ده مشروط اننا نخش تحت جناحهم ..لما رفضنا وقولنا يحكمنا مصلحة العلميين "وماكناش لوحدنا" ابتدت البلوكات من على صفحة وجروب النقابة واتبعت تهديد من
نسيب واحد زميلنا على صفحتنا علنا على الوول اننا لو عتبنا النقابة تانى حيكسروا رجلنا ..و مديرة ادارة البيئة فى المحافظة وقتها لمزوا ولمحوا عليها لما رفضت كدب احد اعلاناتهم المتعلقة بمشاركتهم فى الدراسة البيئية لاحد مشروعات البتروكيماويات الجديدة
فى الشغل بقى اخينا ده "أ" كان ماشى يقول انه احد افراد اللجنة المسئولة عن متابعة القطاع وبعد انتخابات مرسى بقى واحد من اللى بيحددوا مرشحى القيادات ورؤساء الشركات والوزير .. وطول النهار بالتليفون ايوة يا د. مدحت "الحداد"..وايوة يا د. حسن "البرنس" علشان الناس تعمل له حساب
وبعدين تم ترويج الدعاية العلنية للانتخابات فى الكونترول روم .. كان فجر حقيقى وكان هو واتنين كمان بيضربوا اجازات بلا حساب تحت حس تفرغه للدعاية وادارة الانتخابات ..ولما اعترضت على الدعاية الانتخابية وكتبت مذكرة بكده ..اتبعت لى ان لو مرشحيك ليهم شعبية كان زمانك بتوزع ليهم
ابتدت حرب الاشاعات عليا ..انا علمانى ابقى انا ملحد ..والناس اتفاجئت بيا لما طلعت عمرة وقالت لى كده فى وشى .. انا بيتقال عليا انى باشرب خمرة علشان كده مش باسقع .. وانا مش خريج علوم انا خريج زراعة وامن الدولة زرعنى فى الشركة وبيحمينى علشان ضد الاخوان رغم انى غير مؤهل
مديرى اتصل بيا وقتها فى قمة الثورة لما وصلت له قصة كلية الزراعة وطلب شهادتى ضحكت قولت له انا عارف اللى بيتقال قالى ابعتها علشان طبعا المعر**ين اللى ربوا دقنهم 11 فبراير 2011 وحلقوها 30 يونيو 2013 بقوا بيقولوها فى اجتماعات رسمية ادامه .. وبعتها له
لما الناس ابتدت تعترض على حركة المحافظين "أ" الوسطى الكيوت الناس بتسأله على الست اللى جحش منهم استفرد بيها على باب المحافظة فى المنصورة وفضل يضربها لحد ما قلعها الحجاب ..وقف قالهم دى "شرم**طة" واى حد يقف ادام الحكومة وقرارات الرئيس مالهوش حل غير ده
مع ازمات البوتاجاز والكهرباء وغيره وقف فى وسط الكونترول بيكلم حسن البرنس "نائب المحافظ" بيقوله ان فى مركب بوتاجاز واقفة ورئيس الشركة موقفها علشان فى خلاف على الفلوس ..كلم الوزير يتصرف ..وقفل وقال متقلقوش كلها بسيطة .. عدى رئيس عمال اسمه الحاج محمد
قاله انه يتلقى تقريعا من والديه بسبب فشل اداء مرسى ليبتسم "أ" فى ثقة: د. مرسى جاى يبنى النهضة فى 8 سنين بتوعه وبعده يكون م. خيرت الشاطر جهز تشوفوا النهضة على اصولها" ..كان واقف جنب باب مكتبى وقتها انفجرت ضحك بشكل بشع ..جه "بتضحك على ايه يا باشمهندس" قولت له "على اللى اتقال
"اصل قول يارب تكملوا سنة".. راح بلم وكل المعر*ين اللى حواليه اختفوا بعد الجملة دى.. بعدها بكام اسبوع كتبت سلسلة مقالات مجملها ان التخلص من الاخوان مش حيتم غير بالجيش ..واخر مقال كان نسخة من قرارات 3 يوليو .. فلما ابتدت حملة تمرد بقيت عميل مخابرات وأمن دولة فى نفس الوقت
القصص دى كلها شخصية وشهودها وابطالها احياء يرزقون ..اعضاء الاخوان فى مجلس النقابة بين هارب مطلوب القبض عليه فى مصر او هارب فى تركيا ..ماعدا واحد هو اللى بيقود الجبهات الجديدة فى انتخابات 2016 ..عينوا مدير شعبة الاخوان فى العصافرة بدبلوم تجارة مدير للنقابة اللى فيها شعبة
كاملة اسمها ادارة علمية ..واتقتل فى النهضة .. وعملوا اجتماعات لحزبهم وحزب النهضة التابع ليهم جوة النقابة فى سابقة وبالمخالفة للقانون .. اما "أ" ففى احداث الاسبوع السابق ل 28 يونيو كان بيروح من ضمن "اللى بيدافعوا عن بيتهم" امام مقر الاخوان فى سيدى جابر وكان شاهد
على الاعتداء الوحشى على المتظاهرين هناك وقال ان ده طبيعى وان حتى ضرب النار من حقنا وكان واقف وابو العز الحريرى الله يرحمه بيضرب وبتتقطع هدومه فى سنه ده ..وبعدين اتنقل لرابعة من يوم 28 ورجع قبل الفض ب 48 ساعة ..بعدين صدر قرار بحظره امنيا ومنع دخوله المواقع الانتاجية
والمعر**ين اللى حواليه حلقوا دقنهم وبقوا يسبحوا بحمد السيسى ويشتموا فيه وفى الاخوان ..رئيس النقابة "الله يرحمه"..هرب للسعودية وأمريكا لانه كان بيعمل صابون فى شقة بدون ترخيص وصاحبة الشقة بلغت عنه انه بيعمل مفرقعات مرجعش غير لما اتوسط له دكاترة الكلية زمايله علشان ينفوا التهمة
ويقدم استقالته من الحزب والنقابة .. مش باقول ان كل الاخوان شريرين بس قبل الهجوم .. بس اللى بيوصل فيهم لمنصب قيادى لازم يبقى خبيث ومريض نفسى على الاقل..ليا اصدقاء اخوان غلابة حرفيا بس عمرهم حتى ما حيمسكوا اسرة .. وبالمناسبة مهندس زميلنا ماكنش بيفتح بقه ولما كان
يلاقى الهجوم شديد عليا ييجى يضحك ويهزر معايا ويقولى مش كلنا بنكرهك بس اتمسك متلبس فى اجتماع تنظيمى بسلاح وخطط ارهابية ومتفجرات .. احكوا يا جماعة احكوا الكويس والوحش وحتلاقوا الوحش نسبته اكتر .. احكوا اللى تعرفوه علشان الناس متتخدعش فيهم كفاية كده
جاري تحميل الاقتراحات...