واحدة من التسائلات الكانت بتراودني زمان
هو ليه كل الانبياء نزل عليهم الوحي وهم في حالة عزلة
يعني شنو سر الارتباط بين العزلة وبين الصفاء النفسي والروحي
والموضوع ما مقتصر على الأنبياء
فمثلا في الثقافة الإسلامية بنلاقي مفاهيم ذي
الاعتكاف
قيام الليل
الخلوة .... الخ

وفي ثقافات تانية ذي الهندوسية حنلاقي حاجات ذي الاسترخاء و التأمل
كلها مفاهيم بتدلل على اهمية الاختلاء بالنفس والانفصال عن الناس والحياة
يمكن الفترة الفاتت دي انا كنت مشغول جدا
بطلع الصباح وبرجع اخر اليوم مرهق وعاوز انوم بس ?

ياخ فجأة لقيت نفسي داخل دوامة غير مفهومة من الروتين والملل
حسيت اني محتاج افصل من كل حاجة
ومحتاج اقعد مع نفسي اراجع الفات واشوف الجاي شنو
وبما اني ما ملتزم بدوام
قمت رسلت طلب اجازة لنفسي وعملت عليه موافقة طوالي ??

بس في ناس كتار بكونوا مرتبطين بدوام والتزام وكدة
وما بيتمتعوا بالامتياز دة ?
لكن الناس دي لو فكرت في الموضوع حتلاقي انه الصلاة البنأديها خمس مرات في اليوم دي
هي في النهاية عبادة وانفصال برضو
فالموضوع ما طلس بتاع تنمية بشرية والله
فعلا نفوسنا محتاجة لصيانة من حين لاخر ?