فيه كلام عمال ينتشر عن تقوية جهاز المناعة بأطعمة معينة لمواجهة الفيروس ..
ماشي، مش هيضر ..
بس يمكن فيه ناس يهمها تتعرف بشكل أوثق على جهاز المناعة دة (اللي ما هواش جهاز واحد أصلا) وبيعمل إيه بالضبط
ماشي، مش هيضر ..
بس يمكن فيه ناس يهمها تتعرف بشكل أوثق على جهاز المناعة دة (اللي ما هواش جهاز واحد أصلا) وبيعمل إيه بالضبط
بشكل عام، فيه 3 آليات كبرى للمناعة في الجسم
أولا، مناعة غير خصوصية (non-specific) يعني خلايا وجزيئات في حالة حرب مستمرة مع أي جسم غريب يدخل، بتهاجمه وبتحاول تقضي عليه دون سابق معرفة .. لمجرد إنه غريب
ثانيا، مناعة خصوصية خلوية (specific, cell-mediated) يعني خلايا متخصصة في مهاجمة خلايا الجسم نفسه عند احتلالها من قوة أجنبية (غالبا فيروس)، بتتطلب المعرفة المسبقة، وظهور بروتينات أجنبية معروفة ومحددة على سطح الخلية المصابة
ثالثا، مناعة خصوصية ضدية (specific, humoral or antibody-mediated) يعني أجسام مضادة بتنتجها خلايا متخصصة، بتروح تمسك في مستضداتها (antigens) وهي عايمة في سوائل الجسم خارج الخلايا، وبتسلمها لخلايا متخصصة تانية تلتهمها قبل ما تحتل أي خلية
الآلية الأخيرة رقم 3 هي الأكثر فعالية في الوقاية من الميكروبات، لأنها بتحيدها قبل ما يحصل الغزو أصلا .. والآلية رقم 2 بتقوم بدور كبير في الضرر اللي بيحصل لبعض الأعضاء في بعض الأمراض الفيروسية بالذات
يعني مثلا التهاب الكبد مع فيروس سي، جزء كبير منه بسبب المناعة الخلوية اللي بتؤذي خلايا الكبد لما يحتلها الفيروس .. وكذلك الالتهاب الرئوي مع الكورونا، جزء كبير منه بسبب خلايا المناعة اللي بتهاجم الرئة لما يحتلها الفيروس
والوراثة بتلعب دور كبير في اختيار الجسم بين الآليات: فيه ناس بتتولد بمناعة خلوية نشيطة جدا، بتنطلق وتكتسح كل اللي قدامها في بداية المرض، والعواقب هنا ما بتكونش دايما سليمة
وفيه ناس بتتولد بمناعة ضدية أنشط من الخلوية، بتدي فرصة لتكوين الأجسام المضادة فتعدي العدوى غالبا بإذن الله على خير
جدير بالذكر كمان إن تكوين ذاكرة المناعة الخلوية بياخد وقت طويل نسبيا من عمر الإنسان، يعني نشاطها في الأطفال أضعف .. وربما يكون دة تفسير لعدم معاناة الأطفال تحت سن 9 من مضاعفات جسيمة من الكورونا
الحالة المثالية اللي بيحاول اللقاح (vaccine) إنه يخلقها في الجسم هي تغليب الآلية الضدية على الآلية الخلوية، لتحقيق مناعة بأقل الأضرار .. وربنا يحفظ الجميع
جاري تحميل الاقتراحات...