رتبها

ثريد: ضريح الحسن و مسجد الختمية ، كسلا

الختمية ، او الختمية القديمة ، المكان دا مرتبط بمعتقد ديني و اولياء صالحين عند اهالي الختمية ، مسجد الختمية و ضريح الحسن قصتهم مرتبطة ببعض و رغم انهم اتهدموا الا انو لسه الناس بتجي هناك للذكر و العبادة و لحفظ القرآن كمان و ناس بتجي عشان الضريح و سيدهم الحسن

كان لقينا(حاجه خديجة)هناك و هي الكان حكت لينا قصة المكان دا ع اساس انها اتولدت هناك و عاشت و ح تعيش باقي عمرها جمب الضريح دا "طبعاً بسببها الزوله دي" اصلها من الغرب وقت الحج كان سفر شهرين و تلاته بالابل جدودها جو بكسلا و عجبتهم شديد فحجو و لما رجعوا من الحج نزلوا في كسلا

في الثريد دا ح نشوف ضريح الحسن ، و ح تشوفوا المسجد و ح نعرف قصة اي واحد براه شنو ، يلا اي حاجه اتقالت في الثريد دا حاجه خديجة هي القالتها لينا [بعد اذن التصوير و اخذ الموافقة شفاهةً] و العهده عليها في الصحة و الخطاء،نبدا بي قصة المسجد بعد ما نشوفو اول حاجه عمران المسجد دا و صموده

يلا هنا (١) و (٢) ديل المسجد و (٣) دا الزقاق الصغير الفاصل بينو و بين الضريح و الضريح دا(٤) هو المكان الدفنو فيه سيدهم الحسن ، اللي هو فيه القبة دا.
المسجد والضريح ديل اتهدموا و دا الاداء قصتهم معنى ، المسجد اتهدم اول بعده اتبنى الضريح دا و برضو اتهدم ، و كل واحد بسبب هدمه براه

دي بوابة الضريح ، وقت جينا كان لقيناها مقفولة لكن كان عادي بفتحوها و كان بيخلوك تشوف جواها في شنو ، طبعاً جواها في قبر سيدهم الحسن ، و جزء من اغراضو الشخصية و بتبركوا بيها اذا لقوا طريقة ? وهم معتقدين فيه بطريقة تخوف ، والله تخوف

المسجد دا فيه عمران جميل شديد ، عمران لحدي اليوم صامد ، فيه طاقات "شبابيك" من جميع النواحي اعدادها متساوية و من جوه العمدان موصله في شكل ارش ، و ثبتو بعد الهدم الحصل فيهم ، و البيحيرك انو ليه اكتر من ٨٠٠ سنه بالحال دا و هم ما عايزين يعيدو بناه براهم لا الاولياء ولا التابعين ليهم

[طيب نجي نشوف: كسلا في الزمن داك كان اسم لـ الختمية القديمة و كانت بلد حيوانات من اسود و نمور و فيها الشكلوتة ، و في نفس الوقت ما كانت فيها موية ، فلما اهل حجه خديجة حجو و جو راجعين كسلا و اختلطوا باهلها ، السيد الحسن كان ليه رفيق اسمو عثمان طلعوا الجبل يفتشوا لي موية ولقوها]

لقوها في مكان معين و الموية نابعه كويس فقالت:(صلوا ركعتين هناك و شالوا الفاتحه و قالو بالبركة ، فبعدها بزمن الناس جات و سكنت كسلا وعاشت هناك ، البيوت كانت سعف و دندور و بروش ،لكن اصلاً كسلا بلد جميله وفيها رحمة و محنه)
"قاصده الختمية القديمة"
بعدين الحيوانات بقت تجيهم و المرفعين

بقى يحوص في البيوت ويشيل البهايم فكان الرجال بسكوه بالحِّرب ويطلعوه الجبل ، ونحن بس مع الصباح بنعرف انو المرفعين امس جاء فالاسود و النمور والشكلوتة ديل اداهم الفاتحه تاني مشو و ما جو ، فضل القرد ما مشى و هو كتير هنا" دي قصة من قصصو وهم معتقدين فيه اعتقاد يخليهم يزوره ويتقربوا بيه

[طيب قالت انو المسجد دا ، بناه السيد محمد عثمان الاغرب قبل اكتر من ٨٠٠سنه،لما الاهالي قالت ليه: ابني الجامع دا بقدرة رب العالمين ، فقام خت الجامع دا و كلم الطليان و الاتراك يبنوة ، بعد بنوه هو عدل الجامع و كملو ، كملو من اي ناحية و اول جمعه صلى بيهم و شال فيهم الفاتحه وقال ليهم:

(الجامع دا يبنيه عثمان و يهده عثمان و يعمرة عثمان)
فقصدوا انو: بناه هو زاتو محمد عثمان الاغرب ، و فعلاً هدمو عثمان، اللي هو امير الشرق "عثمان دقنه"
عثمان دقنه و انصار الشرق في الوقت داك هدمو المسجد دا بالمنجنيق ، جاهم من قباله المسجد "اللي هسي فيها الضريح دا" و رجم المسجد(الفديو)

فالمسجد اتهتق هتق من فوق و كان شكل القذايف واااااضح شديد من فوق و حجم القذيفة الواحده كان واضح برضو قدر شنو ، اما عثمان الـ ح يعمرة دا قالت: نحن راجينو يجي وهو لي هسي ما جاء وما عارفاه بيجي متين ولا عارفه ال ح يحضرو منو ، الا هو بيجي وانا من زمان قاعده هنا جمب النشابة منتظراه

سالتها: ما عارفه لشنو عثمان دقنه عمل كدا ؟؟
ردت بحرقة كده: بالحيل عارفه؛ عثمان ما بدور الاولياء الصالحين ، و هو كان رئيس الشرق "امير الشرق" ،لكن الرئاسه ماااا مرض و القرش ماااا مرض ، وهو جانا بسلطانه و بقروشو و بي جيشو ، و عمل القصة دي ، الا هم ما سألوه"قصدها ناس الختمية القديمة"

لكن ياهو دا الجامع ياهو دا واقف ، تاني خرب طوكر و خرب وين و ين ، اها الناس بقو يفتشو فوق عثمان دقنه ، قبضوة و كرفسوه و دخلوه في قفص لما مات"
انا ما عرفتها هنا قاصده منو تكون قاصده الانجليز يا ربي ؟؟
ختمتها بـ:هو رئيس الشرق و ما عادل ، و ما بدور للصالحين

دي فديو للمقبرة القاعده فيها هي و الفيها قبور اولاد الاسياد، خصوصاً قبر فاطمة النشابه وهي قاعده جمبهم هنا منتظرة عثمان التالت.
اول حاجه ديل بنات السيد جعفر ، و فيهم واحده بنت السيد عثمان البنى المسجد و قبر اخوها هو الصغير و قدام داك ، معظم شديد عندهم الود دا رغم انو مات صغير

سالتها منو الماسك الولايه هسي قالت لي:
السيد حسن عندو ٣ اولاد بالترتيب: طه ، ابراهيم و عبدالله ،عبدالله دا اصغرهم و هو الماسك الولايه ليه ١٢ سنه.
قالت انا ما بعرف الخرطوم ولا كانت عندها نية تمشي تفارق الختمية عشان يمكن تكون من المحظوظين الحيشوفو عثمان التالت.
قلت ليكم اعتقاد يخوف

دي صوره لاي حاجه انا حكيت عنها في الاستوري دا (١)، المسجد و القبة و القبور ، في القبور دي في قبر النشابه فاطمة(٢) ، اللي هي بنت السيد حسين ، كانت بتجي تزور ابوها محاطة بالناس و راكبة هودج و بتشيل لي ابوها نشاب ، عشان كدا اتسمت فاطمة النشابة

في الفاصل برضو في ناس بيدعوا و بيتعبدوا (١) بس منهم الزول دا (٢) كان بدعي و بجيب سيرة الحسن في دعاه دا ، فربنا يبعث فيهم من يهديهم الى صراتة المستقيم.
فضلت اخر حاجه :

و انا طالع كان في صوت قراية قران طالعه من الخلوة (١) ديل طلبة خلاوي ، لاقيت منهم محمد ادريس (٢) من حته اسمها الجبراب غرب ، في كسلا ، جاء يتعلم القران في نفس المسجد دا ، الفيه نفس الضريح و الاولية ديل ، الحيين و الميتين ، فشكلها بتبدا من محمد دا و بتمشي لقدام??

(٢) دا محمد ادريس بيحفظ القرآن هناك و تعاليم اخرى ?

دي كانت اخر حته ح امشيها في كسلا و منها ح ارجع البيت ، لاقاني الراجل دا(١) وهو متكيء علي عصايتو دي ، في لحظات خفت و قعدت احسب فيها كذا مره: لو كنت في مكان محمد إدريس(٢) ولا في مكان الراجل العجوز دا (١) و ما عارف روحك انت شايل الدين و اليقين صح ولا غلط ، وريني بس ح تعمل شنو ؟؟