الناس وقت الأزمات خصوصا لما يكون في وباء زي فيروس كورونا بيحتاجوا يتطمنوا ويتابعوا بخوف لحظة بلحظة وطبعا ده أنسب وقت تنتشر فيه الإشاعات وحالات هلع غريبة، منها مثلا الرسايل اللي بتتنقالها الأمهات على واتساب.
في نفس الوقت وزيرة الصحة كانت كل ما تخرج على الإعلام ترد بعصبية ويخونها التعبير وأكتر من مرة بيبقى واضح إنها محتاجة تراجع كلامها قبل ما تصرح لأنها المصدر الرسمي اللي المفروض الكل يعتمد عليه سواء أشخاص أو مؤسسات.
مع تفشي فيروس كورونا في بلاد محيطة طبيعي تبقى الناس قلقانة وقلقهم وخوفهم منطقي، اللي مش منطقي أبدا هي ردود الوزيرة، دايما بتكون حادة وبتعتبر أي سؤال/نقد هو هجوم شخصي وبناء عليه الرد بيكون مش مناسب للسؤال وعليه تم اصطياد العناوين المختلفة ليها.
في مصر مش دايما لما حد بيجي له برد يروح يكشف في مستشفى، ناهيك عن التعامل مع الفيروس وواضح إن طريقة الكشف كانت محتاجة متابعة وتحديثات أكبر من كده تجنبا لأي سيناريو سوداوي، خصوصا مع تخوف دول حواليك وظهور حالات خارجة من عندك.
إيه المطلوب؟ حملات توعية على مدار الساعة بالفيروس وطرق العلاج والعزل وتوفير نقاط مختلفة جاهزة للكشف في أسرع وقت تجنبا لأي مشاكل، والتوعية ضرورية لأبعد حد حملات بقى سوشيال ميديا وشارع وتلفزيون وبرامج لازم يحصل ويكون في حالة استنفار.
مينفعش قلق الناس يتاخد بشكل شخصي، مينفعش وزيرة الصحة تتعامل طول الوقت بالشكل ده مع الناس، الوزارة محتاجة المتحدث الإعلامي يقوم بدوره وكمان محتاجين توضيح تام لزيارة الصين وليه الحاجة تطلبت زيارة رغم إنها كان ممكن تتم من بعيد.
أخيرا، المتحدث الرسمي باسم وزارة الصحة عرفت اسمه صدفة، المفروض يبقى في بيانات ومؤتمرات شبه يومية للحد تماما من الشائعات والرد على أي مخاوف ده الطبيعي في الأوقات دي، مع حملات توعية في كل حتة خصوصا البرامج، كام إعلامي شارك في أي حملة حاليا؟ كام برنامج بيتكلم بجدية عن الفيروس؟
فلازم فعلا حملات على مدار الساعة عشان احنا عندنا مفيش أكتر من التجمعات، لازم يكون في توعية وحتى اختبارات وكشف وأي حاجة تم اتباعها في باقي الدول، مش معنى إنه مكانش في حالات إنك مُحصن ولا مناعتك أقوى من الناس، فياريت تحركات أكبر ومجهودات أكبر تجنبا لأي قلق.
جاري تحميل الاقتراحات...