((1)) ((ثريد)) الوعي في التعاملات والشخصية بيتمثل لما الإنسان يكون عنده معايير مسير بيها تصرفاتو ، فقبل ما يتصرف أي تصرف أو يقول أي كلمة ، يسأل نفسه أول هل التصرف الحعمله دة حيكبرني ولا حيصغرني
هل هو حيضيف حاجة لقيمتي ولا حيقلل مني هل الكلمة الحقولها دي تحسب لي ولا ضدي!
هل هو حيضيف حاجة لقيمتي ولا حيقلل مني هل الكلمة الحقولها دي تحسب لي ولا ضدي!
((2))الإنسان عشان يكون واعي ويمثل الوعي ويكون صاحب ثقل وشخصية قدام الناس لازم الوعي والتميز ديل يبدأو من عنده ومن جواهو الأول ، لأنه حتمآ حتمآ, الشخص البهزر والسلام ما زي الشخص العارف كيف يحكم هزارو وكيف يهزر ومتين ومع منو ، ما زي الشخص البعرف يستخدم ياتو ألفاظ ومتين يشارك برأيه
((3)) ومتين يمتنع ، والخلطة السرية تكمن في إنه الشخص عشان يكون مميز ظاهريآ وإجتماعيآ لازم يكون مميز جوة نفسه الأول ويعاملها بتميز ويخت لنفسه حدود ، فالتصرفات البيعملها الناس العاديين بدون وعي يكون واعي هو لمدى تأثيرها فما يفتعلها أو يكررها هو بدوره ولا يقع فيها
((4)) الشخص الواعي بحق والبمثل الوعي ، ما بيسلك طريق الناس العادية ولا بيتعامل بمعاييرهم ، رغم إنه الطريق دة متاح ليهو إلا إنه بيشوف نفسه بمنظار كبير جدآ فلا بيخوض الصراعات العادية ولا بيختار إختيارات عادية ولا بيمشي ورا التوجهات العادية ودة لأنه بينظر لنفسه وقيمته بنظرة أكبر
((5)) فكل كلمة أو رد أو فعل بيصدر منه بكون مر على مراحل فلترة كتيرة قبل ما يطلع منو أو يظهر للناس ، لأنه في فرق بين الشخص الواعي والشخص السبهللي الما عنده ولا قواعد ولا معايير مسيير بيها نفسه وشخصيته وتصرفاته فمنتشر جدآ وجودة تصرفاته وأفعاله وأقواله رديئة لغياب الرقابة والأسس
((6)) في مثل بيقول (( إن أردت أن يتذكرك الناس كعملاق تصرف كعملاق)) وأنا بدوري بقول إنه العملقة دي حاجة بتبتدي من الداخل يعني بينك وبين نفسك ودي بتحصل لما تحاسب نفسك محاسبة الناس المميزين ف أي كلمة أو فعل يصدر منك
أنت بتحاسب نفسك عليهو قبل ما زول يحاسبك 💙
أنت بتحاسب نفسك عليهو قبل ما زول يحاسبك 💙
((7)) وعشان أبسط الموضوع الشركات الكبيرة والمؤسسات العريقة والأندية العندها أسم وسوق عالي وهوية لما تغلط ما بتعامل نفسها زي الشركات والمؤسسات والأندية العادية ولما ترد على حاجة ما بترد زي المؤسسات والشركات والأندية ودة لأنه قبل ما يمثله أفعال وتصرفات فهم بيمثلوا هوية كبيرة جدآ
((8))الخلاصة إنه:-الإنسان بدوره لازم يكون واعي ويعامل نفسه معاملة الناس الكبيرة والمميزة سواء في طريقة الكلام في أسلوب الرد في أسلوب التعاطي مع معطيات الأمور المن حواليهو فولا يمثل أفعال وأقوال إعتيادية عادية ولا يجحد حقه في إنه يتميز ويدي لنفسه ثقل وهوية ودة ما بتحقق إلا بالوعي
جاري تحميل الاقتراحات...