عايز أقولكم كلمة حق ... الحياة من غير "إيمان" مالهاش طعم و لا لون و لا ريحة ! مش الإيمان بتاع الخناقات إياها ،و مش إيمان المظاهر ... مش الإيمان بتاع مين فينا صح و مين غلط ... لأ ، أنا باتكلم عن الإيمان الحقيقى اللى ممكن يخليك تتخطى الأيام الصعبة اللى بتعدى فيها
الإيمان اللى يخليك تتغلب على الألم و المرض و المشاكل!الإيمان اللى يخليك تحب الناس و تقدر تسامح ...مش الحاجات اللى بترددها زى البغبغان ، و لا الأشياء اللى بتحرص على إظهارها عشان الناس تعرف إنك بتعمل اللى ربنا بيقول عليه ..لكن أنا باتكلم عن اللى إنت فعلا مؤمن بيه و إختبرته فى حياتك
و مش باتكلم عن إيمان أو عقيدة محددة ... لكن اللى مش مؤمن بحاجة فى حياته .. اللى شايفها مجرد أيام و بتعدى ... و مش قادر يشوف فيها أعمق من كده ... هاتبقى الحياة صعبة و مُرة ... إبحث و إقرأ ... حاول تفهم معنى حياتك ، و رسالتك على الأرض ... حاول تفرح إنك موجود
حاول تلتقط الرسائل الكثيرة اللى كل يوم بتناديك ، و إنت يمكن مش قادر تشوفها ... حاول تعرف إنت معاك إيه ، و ممكن تعمل إيه ... إستمتع بعلاقاتك و الناس الموجودين فى حياتك ... حاول تعيش أيامك و إنت سعيد ، الحزن ما بيخلصش ... فكرة الإيمان مش مفروض تخليك شخص كئيب ، بالعكس
مفروض تعطيك أمل فى الحياة رغم إنك عارف و متأكد إنك ماشى منها ... إختار الحاجة اللى تناسبك و تخليك مرتاح من جواك ... مافيش حد هايعيشلك حياتك...إفتكر دايما إنك عندك حرية الإختيار مهما كان اللى حواليك بيبثوا الخوف و الذعر فى نفسك ... هاتعدى بمرحلة "شك" ،و هاتضرب مسلماتك بعرض الحائط
مش مشكلة ! المهم إنك تتوصل للحقيقة اللى تريح ضميرك الإنسانى ... و تلاقى الإيمان الحقيقى اللى يناسبك ! بس لو إيمانك كل متمحور حول فكرة إرضاء من حولك ، أو الخوف من "القطيع" .. هاتخسر كتير ! هاتدفع ثمن غالى ... حياتك !
جاري تحميل الاقتراحات...