تدرون كم ساعة ممكن تضيع من حياتك في وظيفة متوسطة الدخل او وظيفة عادية ؟ لو حسبنا ان السنة فيها 365 يوم وانت تداوم 8 ساعات باليوم مع اجازاتك و الويكند والاعياد تقريبا يصفى لك 224 يوم ..
لو حسبنا انك تداوم 8 ساعات خلال 224 يوم راح تقضي 1792 ساعة في السنة ولو حسبنا بتبقى على وظيفتك وامانك الوظيفي لمدة 30 سنة راح تقضي من عمرك على هذي الوظيفة 53 الف ساعة من عمرك وانت تشتغل بوظيفة طول عمرك تكرهها وتتعب وتجهد نفسك فيها ..
السؤال هو ماذا لو قضيت نص هالفترة من حياتك في مشروعك الخاص في شي تؤمن فيه ومتاكد انك بتبدع فيه لو بس قبل كل هالسنين الضايعه قررت تفتح شركة صغيرة براس مال صغير ايش ممكن راح توصل له بعد كل هالسنين ..
بدون مبالغة لو فشلت في الف مشروع وقضيت نفس هالفترة اللي قضيتها بعملك متاكد 100% انك راح تنجح في نهاية المطاف في اي مجال بالنهاية لو تكرس كل هالسنوات بالمحاولة راح تنجح باذن الله ..
انا ماقول استغني عن وظيفتك الان وروح ابدا مشروعك انا اقول لازم يكون عندك هدف بالوظيفة لا تضيع عمرك كله فيها حاول تبدا مشروعك وفكر بالمستقبل فكر بعد 30 سنة كيف بيكون وضعك فكر بمستقبل عائلتك هل راح تبقى على الديون والقرف نهاية كل شهر ولا بتغنيهم عن كل هذا بعد توفيق الله ..
لك الخيار بالنهاية الحياة حياتك اذا ودك تقضي عمرك تحت مدير مايرحم او ناس ماتقدرك او تكون انت مدير مشروعك وتكون انت صاحب العمل ، كلام بداخلي من زمان حاب اقوله واتمنى يجي اليوم اللي اترك فيه الوظيفة عشان مشروعي الخاص ولا تحرمونا من دعواتكم ..
جاري تحميل الاقتراحات...