٢٠١٢ كان عندي لاب في الجامعه بتاع فحوصات الحليب شربت الشاي وشلت معاي من البيت رطل حليب افحصه وصاحبتي جابت رطل برضو بعدما فحصنا عينات الحليب طلع حقنا فيه_فورمالين!_ وهي ماده ممنوعة عالميا لانها مسرطنة وتحفظ بها الجثث للتشريح وصاحبتي برضو طلع حليبهم فيه فورمالين الموضوع أتعبني شديد

تقريبا على مدى أسابيع اي زول من عائلتنا جاب لي عينات وصاحباتنا جابو عينات من بيوتهم وفحصنا العينات جزء منها سليم وجزء منها فيه فورمالين وكانت متوزعه في أنحاء مختلفه من الولاية كلمت وحده بعرفها صحفيه كتبت عن الموضوع وقتها والسلطات برضو ما اتحركت

الغاظني انو المكان البنشتري منه كان مشهور بالحليب الكويس وفيه شيء خطير جدا قادرين تتخيلو الأكل والحليب والخضار البستهلكه السوداني وما سليم!! لو كان عندنا data عن مرض السرطان وانتشاره في البلد حتى في الشباب؛ ممكن نعرف خطوره الوضع ودا الشيء العرفناهو بمحض الصدفه

حمايه المستهلك وناس المواصفات والمقاييس محتاجين يطورو من شغلهم ويزيدو الرقابة والفحوصات العشوائية ويكون عندهم ارقام تبليغ عشان المواطن يقدر يوصل صوته #تحديات_الفترة_الانتقالية #ربنا_يحمي_الجميع