اشي مش هيّن نهائياً انو يكون عندك شخص ما بيكمل يومك بدونه،وما بتحس بلذة الافكار يلي بتخطر على بالك الا لما تشارك هاد الشخص بهاي الافكار،وفجأة هاد الشخص يروح ويمشي بغض النظر عن السبب يلي اجبره.
خلينا نسأل حالنا سؤال،شو يلي ممكن يدفع هاد الشخص انو يمشي؟
+

يمكن خوفنا الزايد وايماننا القوي بانو كل الاشخاص عبارة عن فترات في حياتنا منعنا نقدم لهاد الشخص كل الاشياء يلي بيستحقها،طيب لو هاي المرة بغض النظر عن مسمى العلاقة خلينا نآمن انو هاد الشخص غير،ونهائيا ما راح يسيبنا،نخلي هاد الشخص يشعر بانو حياتنا معاه اجمل بكتير من حياتنا بدونه
+

طيب قبل ما نبدا علاقتنا بحد معين،خلينا نسأل حالنا سؤال،احنا راح نفوت بهاي العلاقة ليش؟
هل لأنو في داخلنا نقص معين وبدنا نتخلص من هاد النقص بهاي العلاقة؟
ولا لانو حياتنا راح تكون اجمل بكتير مع وجود هاد الشخص في حياتنا؟
+

راح يكون ناتج طبيعي انو الناس تسيبنا او احنا نسيب الناس اذا كان الهدف هو السبب الاول.
اما اذا كان الجواب هو السبب التاني،ف ما اعتقد حد ممكن يرضى يتخلى عن احد اسباب سعادته،مهما تعددت المشاكل راح يضل الهدف من العلاقة اقوى بكتير من هاي المشاكل.
+

طيب خلينا نسأل حالنا كمان سؤال،هل فعلاً دائما النهايات موجودة؟
فعلياً احنا بقراراتنا بنصنع البدايات،وبقراراتنا بنمنع النهايات،عشان هيك خلينا نآمن انو مش دايما النهايات موجودة،واحياناً ان كان لازم تكون موجودة لازم تكون هاي النهاية هي بداية اشي اعظم واجمل.