نفتقد فى اوطاننا العربية لـ النقد البناء و تقبل الأخرين "ثقافة الإختلاف" ،مافيش حد بيكتب كلمه او بيقول رأيه الخاص سواء كان نقد او تحليل الا ويكون مصمم عليه ، حتى فى الارتباط الغالبية بتفرح بالانسان اللى بيشبها فى كل شىء مع ان ده فى حد ذاته وهم ،مافيش حد شبهك فى كل حاجه ..

لكن مش معنى إلتقاء افكاركم فى نقاط عديده انكوا كده متشابهين ، بالعكس انتوا قررتوا الارتباط وانتوا ما عشتوش مع بعض قدر كافى من الحياه،فى يوم هيجى هتتفاجئوا فيه بإختلافكم اللى كان "مستتر" خلف الاعجاب وبدايات الحب المتوهجة ..

لكن لو كنتوا منطقين من الأول كنتوا عرفتوا ان الحياه ماينفعش تتعاش من غير قطب سالب وقطب موجب ،فبلاش تبنوا حياتكوا على أساس غلط ،سُنة الكون الاختلاف ، فصول السنه مختلفة ألوان الزهور مختلفه ومتعدده ، اختلاف الليل والنهار ، الأيام أيضاً لا تدوم على حال ومتداولة ..

الانسان نفسه بيتبدل من حال لحال خلال ساعات اليوم الواحد ،لازم هدوء وسكون ثم ضوضاء وضجيج ،لازم امل ويأس وغروب وشروق ،أنماط كتيره وعبر ومواعظ حوالينا،لكن مصرين اننا ما نحترمش ثقافة الإختلاف وتنوع الاختيارات،لازم الانسان يفهم انه مش عشان هو بيحب الموز ان الناس كلها بتحب الموز كمان..

لازم وانت بتتعامل مع الأخر تكون حاطط فى اعتبارك انه هو هو مش انت ، هو له افكاره وقنعاته واراءه ،هو بيحب الأهلى موت وانت بتعشق الزمالك بجنون ،هو بيسمع دروس دين وانت بتسمع اغانى، لازم نحترم افكار بعض واختلاف بعض عشان نعرف نعيش مع بعض.