لازم تفهم كيف المخ يرتب الأفكار عن الأشياء والأشخاص اللي حولك عشان تعرف تحلل الرسايل والمدخلات اللي تجيك وتفهم فعلا كيف تؤثر عليك وعلى غيرك .. سابقا كانوا يعتقدون إن الأفكار مرتبة بالذاكرة مثل الصناديق وكل فكرة منفصلة عن الأخرى إلا إذا ارتبطوا برابط ولكن هالفهم خاطئ
الفهم الحديث بعد عدة دراسات هو إن الدماغ يرتب الأفكار مثل الشبكة ويعامل بعض الكلمات ككلمات مركزية "trigger words” ترتبط فيها كلمات ومعاني أخرى أقل أهمية ، اللي يخلي الكلمات تكون مركزية هو مرتبط بمدى تعرضك لها بشكل مستمر وبالمعاني اللي ترتبط فيها
مثلا لو أخذنا كلمة "أحمر" ممكن تكون عندك بمعنى سلبي إذا دماغك رابطها بالدم والجريمة والقتل نتيجة مدخلات تعرض لها مسبقاً أو بشكل إيجابي إذا ارتبطت بالحب والورد والوئام
الأدهي من ذلك إن التغير هذا دينامك بمعنى إن هالارتباط بين المعاني والكلمات هاذي ممكن يتغير على حسب المدخلات اللي أنت تتعرض لها بشكل إرادي أو لا إرادي وبالغالب بشكل لاواعي ، وللأسف إن التأثير غير ملاحظ ويبان عليك وعلى غيرك بعد فترة
الأعجب من ذلك أيضا إن الارتباط هذا ممكن بشكل لاواعي يؤثر على السلوك ، عملت تجربة بأحد الجامعات بحيث حطوا بالكافيتيرا مكينة قهوة وحطوا بجنبها صندوق وكتبوا عليه "حط الفلوس بالصندوق ، لايوجد كاشير ، حنا نثق بك" وكان فيه شاشة كبيرة فوق المكينة ، الاسبوع الأول الشاشة كانت تعرض صورة ..
..صورة ورود ثم الاسبوع الثاني كانت الشاشة تعرض صورة شخص فاتح عيونه😳 كأنه يراقب ثم اللي بعده ورود وهكذا .. الاسابيع اللي فيها صورة العيون تدفع الناس فيها أكثر من اللي فيها ورود .. وفي دراسة أخرى بجامعة ييل المعروفة قسموا الطلاب لمجموعتين ، الأولى عرضوا عليهم صور شباب والثانية ..
.. صور شياب ، وراقبوا سرعة خروجهم من الغرفة ، المجموعة الثانية كانت تمشي ببطء بشكل ملحوظ ..وغيرها من الأمثلة بكيف إن دماغك يربط الأفكار بطريقة شبكية معقدة أنت بكثير من الأحيان غير واعي فيها .. تلقاك أحيانا حزين وماتدري ليه والسبب شفت موقف أو سمعت كلمة لها ارتباط لاواعي بمعنى محزن
الأمر يشمل السلوك والإحساس والسمع والبصر والخيال والمدخلات اللي حولك والمسلسل اللي شفته أمس ووو الخ .. كلها يحاول مخك يربطها ويجمعها ويحط لها كلمات مركزية حتى يخلي فهمك للعالم اللي حولك أسهل ..
من أكثر من استوعب هذي الحقيقة وجالس يشتغل عليها لمصلحته اللي يشتغلون بالإعلام ، أي أحد يراقب الطرح الإعلامي أو قد استغل بالإعلام يعلم يقينا كيف صانع المحتوى يحاول يركز ويبحث عن الكلمات المفتاحية لتمرير فكرة ما أو تشويه صورة ما أو تحسين منتج ما ..
الرسالة المباشرة حاجة قديمة ولى عليها الزمن .. الحقيقة ذي قديمة وترجع لحتى ماقبل الثورة الفرنسية ، أول خطوات الثورة بدأت بصنع النكت عن الكنيسة بالحانات وإسقاط الهيبة والهالة الدينية ثم توالت بعدها الأفكار لم أعلنوها حرب صريحة .. والأمثلة الحالية أكثر من أن تعد
المصطلح العلمي لهالشيء هو Priming .. وهاذي لمحة بسيطة عنه
ودمتم بخير
ودمتم بخير
إضافة أخيرة :
من أكبر الكذبات اللي تكذبها على نفسك إنك تقول [ أبشوف هالفلم وماراح يأثر علي أو أبقرأ هالكتاب وماراح أتأثر ] ممكن مايتأثر عقلك الواعي ولكن البرايمنق وربط المعاني جالس يشتغل بالخلف بدون ماتدري وستخبرك الأيام وفلتات اللسان عن ذلك
من أكبر الكذبات اللي تكذبها على نفسك إنك تقول [ أبشوف هالفلم وماراح يأثر علي أو أبقرأ هالكتاب وماراح أتأثر ] ممكن مايتأثر عقلك الواعي ولكن البرايمنق وربط المعاني جالس يشتغل بالخلف بدون ماتدري وستخبرك الأيام وفلتات اللسان عن ذلك
جاري تحميل الاقتراحات...