اللي شاف البوست بتاع المستشفي بتاعتنا عالفيس وشاف تعليقات الجمهور السلبية علي شخص الطبيب المصري... الحقيقة هي مش سلبية علي اد مهي واقعية ومواجهة صريحة ... واقع الطب في مصر هو ان فعلا الدكاترة اللي بتتخرج من كلياتنا دكاترة ال١٠ بقرش بما فيهم انا لان مفيش تعليم في الكلية فعلا
وده عامة مش بيضايقني شخصيا ولا باقعد اتقهر واتعصب عليه ...عمري مهحل المشكلة لو مش هواجه نفسي... انا عرفت الحقيقة دي من بدري وحطيت خطة ليها وبدأت اشتغل عليها عشان احاول اصلحها وابقي ب٢ قرش عالاقل بدل قرش واحد
وده منطقي يعني انت علي اد فلوسك هتاخد ... احنا مدفعناش مليم ودخلنا تعليم مجاني واعلي مجال في تخصصات العالم فيعني عادي كانك روحت تجيب رغيف حواوشي ب ٢ جنيه ... اكيد هيبقي لحم حمير يعني ولو كنت مستني غير كده او الوقت نساك يبقي انت مغفل
العملية بالظبط زي الصين ... لو روحت تستورد من هناك هيتقالك عايز السلعة بكام .. حطله اي سعر وهو هيتشقلب وهيعملهالك ممكن يكلفها جنيه وممكن يكلفها مليون جنيه ... احنا بنروح نقولهم اعملوا ام جنيه ونيجي هنا نشتم في صناعة الصين ... اشتم المستورد وبلدك الفقير يا حبيبي الاول .
فانت وانا مشروع طبيب صيني من ام جنيه وقرش ده وبعدين محدش مصدق انك ذو قيمة اصلا غير اهلك وشلة صحابك ... الشعب كله قبل الدولة بتتعامل معانا كعبيد ومواطنين درجة تانية وبيتضرب بينا المثل في الرضا بالذل اساسا .. بردوه لا يحزنك ده .. ده الواقع .. ستف المعطيات صح عشان تعرف تحط خطة حل
علي راي صديق ليا واحنا بنكلم هياخد تكليفه فين في النظام الجديد ... مسمهاش زمالة ونيابة ... اسمها عبودية باطنة ..عبودية اطفال..عبودية رمد ... اللي هو نخلي المكروفون بتاع الاستدعاء في دور المستشفي يقول "علي عبد الجراحة فلان الفلاني التوجه لغرفة الطوارئ للأهمية"
فالمهم يعني دي كانت ارخص طريقة للحصول علي بكالوريوس الطب والجراحة وبما انك مدفعتش المعلوم كله في الكلية فلنت هاتدفعه برا الكلية كورسات ومعادلات عشان تبقي طبيب بجد ... الخلاصة هتتدفع الفلوس كلها واللي حصل ماهو الا تأجيل للدفع وتقسيطه علي مراحل ..ده اذا كنت بتفكر تبقي طبيب كويس
وطبعا هتدفع مجهود زيادة لان زي حال اي حاجة في الحياة ... اي تأخير في الدفع عن معاد السداد المستحق لازم بيبقي عليه غرامة ... ومتبقاش مخدوع بهيصة وتطبيل من حواليك من اهلك وصحابك اللي كلهم طب زيك اساسا وينسوك ... علي راي دكتور النمر دايما افتكر انت مين وجاي منين
وعامة كل اللي بيهيصلك ده حتي اهلك مع اول موقف ليه مع طبيب في مصر قصر معاه بالفعل وما اكثرهم يعني ....هتلاقيه بيلعن ويشتم ويسب فيه وفي الطب كله في مصر وهيقولك لا انت غيرهم انت حبيبي ... ?بامارة ايه غيرهم؟ دخلت كلية غيرهم؟? .. دي بس الحقيقة بس احنا اللي دايما double standards
او هيكون بيقولك كده عشان يجبر بخاطرك شخصيا ولاسيما لو اهلك يعني ... لكن لو قالهالك صراحة في وشك حتي لو ضايقك شخصيا وحسيت باحتقار من تحت لتحت تشكره فعلا لانه بيفوقك ومش بينافقك وبيديك اول طريق الحل وهو الفوقان من الغيبوبة والتخدير
جاري تحميل الاقتراحات...