طيب لا سمح مرضت وداير تمشي المستشفى واقرب شي الحكومي مثلا بتدخل الحوادث بتلقى مجموعة من الدكاترة غالبا ناس امتياز تحت التدريب بكون معاهم نواب وعموميين ومرات للاسف ما بكون في نواب لسوء التوزيع
مفترض قبل ما تخش يكون في تقسيم للحالات الباردة والحرجة وشبه الحرجة لكن مع عدم الامكانيات كل الناس بخشو سوا والحكاية بتكون زحمة شديدة لو الحالة حرجة أزمة ذبحة طعنة بكون ليك الاولوية ولازم تلفت انتباه الدكاترة لانو ممكن يكون ملخوم وماشايفك
الهدف من الحوادث انو العيان يتم اسعافه لو ألم ياخد مسكن لو ضيق نفس ياخد اوكسجين وري الدكتور الموجود التاريخ المرضي واداكد عليه انو يسعفه العيان قبل تحويله للقسم يعني ما يقول ليك دا باطنية. يمشي يخليك يسعفه لغاية حالته تستقر حتى يتم تحويله ما تخلي عيان يتحول وهو متالم
مرات بكونو الدكاترة الصغار ما معاهم سنير فخليك صبور ومتفهم لو لقيت زول فاتح تلفونه ما معناها انو بلعب أو غيره مرات محتاج براجع جرعة دواء أو يحسب الجرعة حسب الوزن
من حقك انو الدكتور يشرح ليك طبيعة المرض والعلاج وأعرف اي معلومة وتختار طريقة علاجك كمان ما تخليك مغيب وفي نفس الوقت الكلام دا بعد تمشي العنبر في الحوادث بكون شي مختصر
لو داير تقيس الضغط مثلا مافي داعي تجي الحوادث في عيادات خارجة لانو الزمن دا بكون في زول احوح للدكتور وبرضو لمن تكون مرافق مافي داعي تسأل الطبيب يقيس ليك الضغط لانو الزمن دا في ناس تاني أولى بيه
وبرضو من الاخطاء أنو الزول بقى يمشي يقابل الاخصائي مباشرة مع كامل الاحترام لكن في سلم معين فانت ما بتقدر تحدد نوع الاخصائي اللي بقدر يعالجك لانك طبيعة المرض قد ما تكون فاهمها وتمشي لي اخصائي بكون شغال في تخصص معين سنين فبكون بعاين ليك من منظور التخصص حقه
فالافضل والاصح الزول يقابل العمومي هو بقدر يقيم الحالة تقييم خالي من التحيز لانو ما بعاين ليك بمنظور تخصص معين وبحولك الاخصائي المطلوب فدور الطبيب العمومي مهم جدا
لو احتجت تمشي اخصائي وبتشوف الاسعار غالية جدا مافي داعي نقابل الاخصائي في المستشفى الخاص نفس الاخصائي بكون متواجد في العيادات المحولة المستشفيات الحكومة برسوم بسيطة فما تتكلف عشان تقابله في المستشفيات والعادات الخاصة
لو اتقررت عملية أو علاج وكان غالي في كمية منظمات وشباب متطوعين اسال عنهم بتلقاهم جنبك وباذن الله بساعدوك
الجرعة في العنبر بيديها الممرض ما الطبيب انت خليك حريص على الزمن ولو الممرض كان متسيب بلغ المدير الطبي في المستشفى
نقص الدواء عدم توفر الأسرة والنقالات الموية القاطعة اللمبة المحروقة دي ما من مسؤوليات الطبيب نقدر انك شايفه قدامك لكن دي مسؤوليات الادارة لو في شكوى أمشي الادارة الجوطة والكواريك مع الطبيب ما حتفيد بشي
الارهاب والاعتداء والتكسير اسلوب همجي مامنه فايدة ومضر والوزر بتاع اي زول كان ممكن يستفيد حيكون عليك انت
لو انت شايف الطبيب اخطا الاجراء تمشي الادارة الطيبة تشتكيه وتشتكي في المجلس الطبي وتفتح بلاغ في الطبيب هناك بيتم التحقيق واتخاذ العقوبات المجلس الطبي بياخد ليك حقك كمواطن ما عشان آيمه المجلس الطبي تفتكر انو بس الطبيب لا برضو ليك انت
ختاما ربنا ان شاءالله يصلح الحال ويكون في وضع صحي نفتخر به ودمتم سالمين
جاري تحميل الاقتراحات...