رتبها

في الـ Thread ده هتكلم عن [ الحجاب ]..
- - -
- -
-

- مشكلة [ لبس الحجاب ] أو [ صعوبة لبس الحجاب ] هي مشكلة جديدة ظهرت في القرن اللي فات ، الدين بقاله ١٤٠٠ سنة مكنش فيه خلاله أي مشكلة تخص الحجاب ، ماعدا أخر ١٠٠ سنة ، و الموضوع بقا أشبه لأننا بنرجع لأيام ما قبل الإسلام و بنحاول نقنع الناس بالحجاب

- ده راجع لـ عوامل كتير أبرزها الإنفتاح ، كان زمان البنت دائرة المعارف حولها قليلة ، يعني [ أمها ، خالتها ، عمتها ، المدرسة ، .. ] فكان قرار الحجاب سهل و بيلبسوه لوحدهم بدون تدخل الأهل ، لكن مع بداية القرن اللي فات و الإختراعات اللي غيرت البشرية ، الموضوع إتغير

- مع إختراع التلفزيون ، الدايرة اللي بنت بتشوفها وسعت و ضمت [ الفنانات ، المطربات ، .. ] ، فـ ظهر أشكال جديدة للناس اللي بتشوفهم ، و بالتالي قرار لبس الحجاب بقا أصعب ، لحد إختراع [ السوشيال ميديا ] و الإنفتاح علي العالم فالبنت بقت بتشوف دواير أوسع ، و ده خلي قرار الحجاب صعب أكتر

- الإحتشام ما قبل القرن الـ ٢٠ [ ١٩٠٠ ] كان موجود في العالم كله ، و الإحتشام المقصود به إن الملابس تكون واسعه و طويلة و مش بتبين مفاتن الجسم ، فضل يتطور لحد [ الثورة الجنسية ] في أوروبا و أمريكا في الستينات ، و بدأ يظهر الملابس [ العريانة ]
- تطور اللبس

- الإحتشام أصلاً معروف من زمان إنه من صفات [ الملوك و الملكات ] و من صفات أولاد الذوات و الأغنياء زي ما بيقولوا ، ده فيديو لملكة بريطانيا و هي بتفرض اللبس المتوافق مع الأعراف الملكية علي العائلة المالكة و علي المدعويين في زفاف الأمير هاري و ميغان

- حاجة مهمة كمان ، و هي إن الإحتشام بيفرض الإحترام علي غيرك و خصوصاً الرجالة ، لأن مفيش راجل هتظهري له مفاتنك و جسمك و هيحترمك ، مستحيل تحصل ، لكن بالعكس مفيش أسهل من العُري و ده اللي خلي الإحتشام من صفات و أعراف الملوك و الملكات و الأسر المحترمة

- نيجي لنقطة تانية و هي التحرش ، أمريكا [ اكتر دولة بتدعم الحريات ] هي أكتر دولة فيها تحرش في العالم ، أكتر دولة في معدلات الإغتصاب ، طبعاً أنا مش بربط الحجاب إنه بيمنع التحرش لأن المنتقبات بيتم التحرش بيهم ، لأن الموضوع ده له أسباب كتيرة تانية

- ما تيجوا نعمل تجربة ، هنخلي بنت تنزل في مكان عام بلبس قصير و ضيق و شوف كام واحد هيتحرش بيها ، و اليوم اللي بعده نفس البنت تنزل بلبس محتشم أكتر و نشوف كام واحد هيتحرش بيها ، اليوم اللي بعده تنزل بلبس مغطي كل جسمها و واسع لكن بدون حجاب و نشوف كام واحد هيتحرش بيها

- و اليوم اللي بعده تنزل محجبة بلبس واسع و محتشم و شوف كام واحد هيتحرش بيها
——
تحدي إن الإجابة هتكون إن كل ما الإحتشام بيزيد التحرش بيقل

- الراجل غريزته هي الشهوة لما يشوف الست ، ربنا خلقها عشان تكون المثير الطبيعي للراجل ، مستحيل الراجل يشوف بنت مش محتشمة إلا و هتحرك غريزته الجنسية ، خصوصاً و إن الغريزة الجنسية هي من الغرائز الأساسية للإنسان

- هسألك سؤال : في رمضان و أنتي صايمة لو شوفتي واحد / واحدة بياكل أو بيشرب قدامك ؟ هتضايقي صح ؟ و لو مكنتيش متحكمة في أعصابك و نفسك ممكن تشتميه ، لأن ده بيحرك غريزتك في حب الأكل و أنتي صايمة ، ده بالظبط اللي بيحصل مع الراجل لو شاف واحدة مش محتشمة

- الفكرة إن الإنسان له تحكم محدود في شهواته و غرايزه ، فمستحيل تطلبي من الراجل إنه لبسك ميحركش غريزته الجنسية تجاهك و إلا هيكون الراجل ده مش طبيعي أصلاً ، الإسلام أمر الراجل بـ [ غض البصر ] ضد غريزته ، و المرأة بـ [ الاحتشام و الحجاب ] ضد غريزتها في حب الزينة

طب ما في أمريكا و أوروبا مش بيحصل تحرش !
—
١- قولنا قبل كدا إن أمريكا أعلي دولة في نسب التحرش في العالم
—
٢- مجتمعنا مع تأخر سن الزواج بسبب الظروف الإقتصادية و طلبات الأهالي بقا مريض بـ [ الكبت ] تلاقي الشباب مستني ١٠ سنين أو أكتر من بعد بلوغه عشان يتزوج ، و ده بيزود الكبت

و مجتمع زي أوروبا و امريكا غرقان في الشهوات و المعاصي و بيحصل علاقات جنسية بدون زواج من بعد سن البلوغ ، و الناس هناك معندهاش حدود تلاقي الشاب عنده ١٨ سنة و مارس الجنس أكتر من مرة ، في حين إن هنا بيوصلوا للـ ٣٠ بدون ما يمارس الجنس

- مينفعش أصلاً أقارن مجتمع مريض بالكبت ، بمجتمع تاني مريض بالشهوات .. عشان كدا الإسلام حط الحل في علاج ده عشان يكون المجتمع سوي ، و هو غض البصر للرجل و الحجاب و الإحتشام للمرأة

- بستغرب من البنات اللي تنزل مش محتشمة ، و لما حد يتحرش بيها [ بغض النظر إنه ملوش حق لو ماشية عريانة ] ، تقول أنا البس زي ما انا عايزه و ربنا أمره بغض البصر ، ليه عايزه تخالفي أمر ربنا في الإحتشام و في نفس الوقت عايزه كل الناس تكون ملتزمة بغض البصر مهو أكيد في ناس مش ملتزمة زيك

- طب أنا مش مقتنعة بالحجاب ؟
——
عدم قناعتك بالحجاب ده بينقسم لـ جزئين
—
١- عدم إقتناعك بالحجاب إنه مش فرض أصلا !
—
هنا يبقي لازم تراجعي نفسك و عقيدتك من تاني ، الحجاب تم ذكره في موضعين في القرآن ، ده غير إن الفروض ملهاش علاقة بمقتنعة بيها و لا لاء ، الفرض مش هيسقط عشان مش مقتنعة

- ربنا كفل لكل إنسان حرية العقيدة و الإيمان به ، و نزل الأديان عشان تكون طريقة و دليل للعبادة دي ، أنتي إخترتي تكوني مسلمة يبقي لازم تلتزمي بفروض الإسلام و تجتنبي نواهيه ، مش هنختار اللي إحنا عايزينه و نعمله بس ، الدين Package بتتاخد علي بعضها ، مينفعش أخد منه اللي يعجبني بس

- و إلا لو مش مقتنعة ببعض الفروض دي و منهم الحجاب يبقي أنتي محتاجة تراجعي نفسك في إختيارك للدين ، لأن الدين مش لعبة هنلعب بيها و نقلل منها ، دي أوامر ربنا ، مش أوامر الشيخ فلان ولا الأستاذ فلان عشان تكوني مش مقتنعة بيها

٢- مقتنعة إنه فرض لكن مش عايزة تلبسيه بسبب شهوة
——
- يمكن أبرز شهوة بتجاهد ضدها البنت هي حبها للزينة و إنها تكون جميلة ، فالحجاب الطبيعي إنه بيقلل من جمالها لأن ده الغاية منه أصلاً ..

- لكن اللي بعيد عن بعض البنات و هو إن الجمال نسبي ، لو جبت ١٠ بنات و ١٠ رجالة و قولنا لكل طرف منهم يختار أجمل شخص في الجنس الأخر ، فالإختيارات هتتختلف ، فيه اللي بيحب الرفيع و فيه اللي بيحب الكيرفي و في اللي بيحب اللي بشرتها بيضا و في اللي بيحب العين الملونة ، و العكس

- فلو بتعتقدي إنك كدا هتكوني جميلة عشان قطاع من الناس بيقولوا عليكي إنك جميلة كدا ، فمتنسيش إنك لما تتحجبي في قطاع تاني هيقول عليكي إنك جميلة ، لأن الموضوع نسبي ، لكن الفكرة في إختيار الناس اللي هتقول عليكي جميلة

- ده غير إن فيه نقطة مهمة ، و هي إن الناس دايما بتضحي بحاجات بتحبها عشان حاجات بتحبها أكتر منها ، فكونك إنك مش قادرة تضحي إنك تلبسي الحجاب عشان بتحبي شكلك بدونه ، عشان ربنا ، يبقي أنتي بتحبي جمالك أكتر من ربنا و دي نقطة تانية

- الأم و الأب بيضحوا بحاجات كتير بيحبوها قصاد حبهم لولادهم ، أحيانا في أمهات بتضحي بـ الـ Career بتاعها عشان خاطر ولادها ، فكونك مش قادرة تضحي بحبك لجمالك بدون الحجاب عشان خاطر ربنا ، يبقي حب ربناراللي في قلبك قليل لأنك ضحيتي بيه في سبيل جمالك

- من تجارب البنات اللي جاتلي عن الحجاب ، فكان واضح إن اللي بتقدر تاخد قرار صعب و تجاهد نفسها في ظل كل المغريات اللي حولها ، و بتلبس الحجاب عن إقتناع تام ، فجاهدها لشهواتها عموما بيزيد و بيزود من قوتها الداخلية إنها تقدر تبعد عن كل الشهوات

- هل أهلك ليهم الحق في فرض الحجاب عليكي ؟
—
التربية السليمة هي اللي بيتم فيها البُعد عن الإجبار ، لو أجبرت بنتك علي لبس الحجاب بدون ما تقنعها فأنت بتربي [ منافقة ] لأنها هتلبسه ظاهرياً لكن في قلبها عكس كدا ، هتلبسه قدامك لكن في عدم وجودك هتقلعه لأنها خايفة منك مش من ربنا

- التربية السليمة هي إنك تعود بنتك و تزرع فيها حب ربنا ، و تحببها في فروضه اللي منه الحجاب ، لكن أسلوب الإجبار ده مش بيدل علي حاجة غير الفشل و الضعف ، الإجبار ده أخر حل تلجأ له في التربية

- يعني المفروض عليك إن تبدأ تعلم بنتك و تقنعها مرة و ٢ و ٣ و ٢٠ ، مقتنعتنش يبقي في حل إسمه العقاب و هو إنك متتكلمش معاها ، متديش لها مصروف ، و هكذا ، مفيش نتيجة هنا مضطر تلجأ للإجبار لأنك مطالب إن بنتك تلبس الحجاب و مسؤول عن ده أمام الله

- قال رسول الله ﷺ [ ثلاثة لا ينظر الله عز وجل إليهم يوم القيامة: العاق لوالديه، والمرأة المترجلة، والديوث ]
فالديوث هو الرجل الذي لا غيرة له على أهل بيته ، عشان كدا الأب مطالب إنه يفرض الحجاب علي بنته ، لكن الإجبار يكون أخر حل يلجأ له

- ده غير إن أعتقد لو البنت بتحب أبوها ، فهي متحبش إن أبوها يدخل النار و ربنا ميبصش له يوم القيامة عشان مش محجبة ، فده دافع للأب إنه يحبب بنته فيه و يستخدمه في لبسها للحجاب

- في نقطة مهمة أخيرة هتكلم فيها و هي إن الموضة زمان كانت بتخدم العفة و الإحتشام ، لكن دلوقتي الموضة بتتعمل و الناس تمشي وراها ، يعني دلوقتي طالع موضة الملابس الـ Oversize للبنات و بنات كتير ماشيين وراها و علي قلبهم زي العسل

- لكن من فترة لما تكلمها عن الإحتشام واللبس الواسع،كانت تقول إنه بيقلل من جمالي و شكله وحش !! ، لكن اللبس الواسع لما بقا موضة بقا جميل وشكله حلو ، و ده يقولك إن البنت اللي بتعمل كدا بدون مبدأ لأنها ماشية ورا حاجات مش من دماغها ، و ده يعتبر من تصرفات القطيع

- لكن لما تيجي تكلمها عن إن الدين بيؤمرها باللبس الواسع ، هتقولك مبررات ضد اللبس الواسع ، لكن وقت الموضة تمشي وراها ، أي حاجة لها علاقه بالدين وحشة و بتقلل من الحريات ، دايماً القطيع ملوش رأي القطيع بيتحطله الخطة و يمشي وراها ، و اللي معندوش رأي معندوش مبدأ يدافع عنه

هنهي الثريد بالبوست ده

تقييمك للثريد

- بالمناسبة فيه ناس مرضى نفسيين هتاخد الكلام اللي هي عايزاه من كلامي و تشتمني عشان مبيخدمش اللي عايزينه ، لكن أظن إن الكلام واضح قدام الأعمي

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد