هاكتب فى الثريد دة شوية نصائح مالية بصفة عامة وبخصوص التعامل مع البنوك لان تويتر لغى التغريدة المثبته من سنة مش عارف لية وياريت تستفادو منها هاقول النصايح من خبرة مالية فقط ولست فقية دينى او اجتماعى فيما يتعلق من خلافات بهذا الخصوص وايضا نصايح بخصوص الناس الى حابة تعمل بزنس صغير
بصفة عامة حاول بقدر الامكان ان لاتوقع على اى من المستندات التالية طالما لاتملك قيمتها المالية فى جيبك ( قائمه عفش قبل الزواج / كمبيالات اقساط اجهزة منزلية / شيكات بدون رصيد / ايصالات امانة ) حتى لو محتاج الحاجات دى بشدة لان فى حالة اى خلاف ممكن تتعرض للسجن والبهدلة بدون داعى
لو حابب تشترى عربية ومش معاك ثمنها ياتشترى عربية مستعملة رخيصة او تلغى القرار العربية مش سلعة اساسية ولو عندك وديعة او شهادات فدى افضل طريقة لشراء عربية بضمانها حتى لو معاك قيمتها لان العربية معرضة لفقد او تلف وشراؤها بالتقسيط بيدخل البنك والتامين معاك ضامن لقيمتها فى كل الاحوال
حاول طالما مش غنى او عندك املاك تخلى تعاملك مع البنوك فى اضيق الاحوال ويكون تعاملك دايما ( تحويل راتب / حسابات توفير / وديعة / شهادات استثمار ) وابعد خالص عن القروض الاستهلاكية وكروت الائتمان لان طالما مش معاك فلوس اصلا ماتدخل نفسك فى مشكلة اكبر منك
لو اضطرتك الظروف لاخد قرض او سلفة فاختار دايما قرض نقدى ويتم تسديدة على فترة لاتتعدى سنتين ويتم دفعة بقسط شهرى ثابت لان كروت الائتمان مش هاتسددها وهايزيد المبلغ بشكل مضاعف لاتتخيلة وهاتظل طول عمرك تدفع فوايد فقط ولا هاتسددها خالص
كارت الائتمان لو ماعندك رصيد يضمنة فى البنك فخ لايمكن الفرار منة والفوايد الحقيقية الى بتتحسب علية بتكون فى حدود 2% شهرى ودة بيوصل ان الفايدة السنوية بتوصل 25% بخلاف مصاريف تاخير السداد ورسوم الكارت ورسوم سحب الكاش وكل دة بيتحسب علية فوايد برضة يعنى كل مبلغ بيزيد 25% سنويا
لو معاك مبلغ ثابت بالدولار تحويشة شيلة فى البنك وديعة او شهادة لان لو خليتة فى حساب جارى هايتم خصم مصاريف منة شهرى وسنوى وهاتلاقية بينقص باستمرار وانت مش عارف لية لان البنوك بتخترع مصاريف اسمها ادارة الحساب وبريد ومراسلات واوراق وقهوة ماشربتهاش ?
طالما ماعندك شركة او بزنس اوعى تفتح حساب جارى افتح حساب توفير او ادخار علشان يتحسب لك فايدة باليوم لكن جارى مالوش اى فايدة ليك وبيتخصم منة مصاريف كثيرة جدا مالهاش داعى خالص ولو حساب راتب خلية يقتصر عالراتب بس ماتودع فية فلوس وافتح حساب ادخار لفلوسك
لما تشترى عربية او تعمل كارت ائتمان او قرض لازم تقرا كل بند بحرص شديد وتاخد وقتك فى القراية وخصوصا البنود الى مكتوبة بخط صغير لان فيها المشاكل كلها وفى الواقع للاسف ماحد بيقرا اى حاجة وبيعتمدو على كلام المندوب او الموظف ودة كل قصتة انه يقفل الديل ويلبسك السلطانية والبس يامعلم
كارت الائتمان تم تصميمه بحيث ماتدفعة خالص ويظل فى رقبتك ليوم الدين ان امكن والفاتورة بتطلع بعد 45 يوم من استلام البطاقة ولو دفعت كل الرصيد قبل تاريخ الدفع الى حددة البنك مافيش مشكلة خالص لكن الناس بتفرح بدفع 5% فقط وتدفعة فقط وتلاقى خلاص كدة الدوامة اشتغلت ومش هاتخرج منها تانى
ناس كثير بتسال انا معايا مبلغ بالدولار اغيرة ولا اخلية وممكن الدولار يعلى تانى او ينزل ونصيحتى ان طالما مش محتاج تسافر خارج مصر فالدولار مالوش لازمة فى بلد كمصر سعر العملة فيها بيتحدد بقرارات يبقى احسن لك تخلية وديعة بالجنية او تحولة لسبائك دهب كمخزن للقيمة لاولادك او للظروف
الاحتفاظ بسبيكة دهبية او جنية دهب احسن من المشغولات الذهبية لانها مش بتخسر مصنعية وموديل وقيمتها بتكون محددة دايما حسب سعر الذهب بدون مصنعيات فبلاش الغوايش والانسيالات والخواتم هاتخسر فيهم هات زينة ماشى قطع محدودة لكن مش كأدخار
لو اشتريت سبايك ذهب او جنبهات حاول تحتفظ بيهم بعلبة حديد او خزنة صغيرة وتشيلها فى مكان امان فى البيت ومايعرف مكانها سوى الام والاب فقط وتكون فى مكان صعب للحرامى العادى ان يجدة بسهولة لو تعرضت الشقة لاقدر الله للسطو او للحريق مثلا وبلاش دواليب الهدوم لان دة اول مكان الحرامى بيروح
لو عندك عدة اولاد ومش عاوز يحصل مشاكل بينهم بعد لاقدر الله الوفاة اكتب لهم املاكك العقارية باسمهم مجتمعين علشان يظل تربطهم ببعض ويبقى صعب تحويلها لفلوس الا لو دفع احدهم القيمة العادلة للاخر والافضل عقارات تدر ريع نقدى شقق يمكن تاجيرها وخلافة
لو بتتمنى لاولادك يسافرو خارج مصر اعمل حاجتين تحوش لهم بالدولار او باليورو باستمرار فى حساب ادخار او توفير او ودايع وتعلمة لغة اجنبية من صغرة والمستقبل لالمانيا واليابان والدول الصناعية الغربية بصفة عامة والافضل لو تخلية يتعلم تعليم صناعى مهنى سيبك من الكليات النظرية والجامعة
المانيا والدول الاسكندنافية واوروبا عموما بتواجة مشكلة انخفاض المواليد وبتغير قوانين الهجرة والعمل والمستقبل للصناعات المهنية مع لغة كويسة ومبلغ مالى يبدا بية حياتة هناك فى حدود 5 الاف دولار او يورو يعنى حوالى 100 الف ولو لقى عمل هايجيبهم فى اقل من 6 شهور ماتخافش ودة احسن استثمار
حاول ماتتاخر بسداد القرض او افيزا اكثر من شهرين ماتوصلهم ابدا ل3 شهور حتى لو اتحول الامر للقضاء ادفع اثناء القضية باستمرار اى مبالغ لان وجود ايصالات دفع معاك هايدحض القضية والمبلغ الى بيطالبو بية ومش هايكون صح وهايثبت حسن نيتك للمحكمة او النيابة واطلب مهل للسداد وادفع اى مبلغ
البنك عموما مايهمة سجنك او حبسك لكن دى مجرد ورقة ضغط عليك غالبا بتكون ناجحة فحاول تستغل النقطة دى لصالحك باظهار حسن نيتك بدفع مبالغ صغير دايما خلى ادارة التحصيل تحس انك متجاوب وبتدفع لكن هروبك من التليفونات وعدم استجابتك بيحول الموضوع للقضاء وبيدخل فى سكة تانية مافيها مساومة
لو عندك بنات بس وماعندك اولاد حاول انك تكتب اى املاك ليك باسمهم بيع وشراء فى حياتك حتى لو سنك مش كبير وماعندك امراض كهبه منك لهم تفاديا لان يشاركهم بالميراث احد افراد الاسرة ( مش عارف دينيا دة مقبول ولا لا ) بس البنات بتحتاج كل قرش وهما اولى من الاخوات او حتى الام والاب
لو ماعندك اولاد خالص من وجهة نظرى لازم تكتب وصيه وتحتفظ بيها عند محامى موثوق فية وتخطر كل افراد الاسرة بوجود وصية مكتوبة وممكن تعملها صحة توقيع من بنكك او الشهر العقارى وتوصى فيها بمعظم املاكك لعمل الخير مثلا مع منح جزء للورثة الشرعيين لصلة الرحم برضة
لازم افراد الاسرة يكونو عارفين كافة املاكك يعنى ماتروحش تشترى شقة تمليك فى مكان تانى وتخبى عليهم وتقول يمكن اتجوز فيها او تعمل وديعة او حساب ببنك وتقول مش هاقول لحد لو لاقدر الله وحصل حاجة صعب حصر الموضوع فى بلد كمصر ولازم يكون اهلك عارفين او تسيب ورقة مكتةب بها كل دة
جاري تحميل الاقتراحات...