كان فيه واحد سخيف جدا فى القعدة ... أول مرة أتعرف عليه ! بيشتغل مهندس فى مكان ما ، شكله كده فى أوائل الخمسينات ، معاه نضارة شكلها غريب ، قعد يكلمنا عنها شوية و عن الموديل بتاعها و يلبسها و يعمل حركات بوشه عشان يضحكنا ! أنا ما كنتش شايف حاجة تضحك! 1
كلامه كله يندرج تحت بند الهزار ، بس من نوع الناس اللى ممكن ما يفكرش قبل ما يتكلم ، اللى بيقولوا عليه بيهبد الكلام ... إتعرفت عليه فى الخروجة عن طريق واحد صديقى ... صوته كان عالى و ضحكته فيها حاجة مبالغ فيها ، و الناس كلها بتبص علينا كل ما يضحك ... 2
المهم فى الأخر ، هو من الشخصيات اللى ما تمشيش معايا ، و خصوصا فى الأماكن العامة... بعد ما مشينا من المكان ، روحت البيت و دماغى فيها مزيكة حسبالله ... كنت منزعج و حاسس إن وقتى ضاع فى أى كلام ، حتى يعنى لو عايز قعدة خفيفة و فيها ضحك ! 3
مش ده نوع الشخصيات اللى ممكن أقعد معها ... عدت الأيام و كنت رايح المستشفى مع واحد قريبى و إستقبال المستشفى بيقولوا إن مافيش غرفة شاغرة ... ألاقى حد بيخبط على كتفى و بيضحك بصوت عالى ... مين ؟ طلع الأخ المهندس أبو دم تقيل ... قلت فى نفسى ، أنا مش فى حالة تسمح بالكلام معاه ! 4
إبتسمت بالعافية ... سألنى عن سبب التواجد فى المستشفى ، شاورتله على قريبى ... المهم حكيتله إن مافيش غرفة و هانضطر ننقله بالإسعاف لمستشفى تانية ... طلب منى أنتظره ... و بعد دقيقتين رجع و قالى إنه فيه غرفة فاضية و هايدخلوه فورا !! شكرته و سألته "عملتها إزاى دى ؟ إنت تعرف حد هنا ؟" 5
قالى إنه مدير المستشفى !! يا عم مش إنت مهندس ؟ طلع كان بيهزر و دى كانت من ضمن الإشتغالات بتاعة القعدة ! المهم ، بعد الصدمة ... شكرته تانى ، و عدى اليوم بسلام ! بس الموضوع ما إنتهاش لغاية كده ... كان عامل توصية على قريبى و إهتمام من كل الممرضين و الطبيب اللى بيتابع الحالة ! 6
فى النهاية تخفيض فى رسوم المستشفى تقريبا 30%!..كلمت صديقى اللى كان جايبه معاه فى القعدة إياها و حكيتله القصة،و قلتله يشكره تانى لأنى ما عرفتش أقابله و إحنا ماشيين من المستشفى!ضميرى كان بيؤنبنى جدا على إنطباعى الأول عن الشخصية دى..بعد فترة ، صديقى كلمنى و إتفقنا على خروجة تانية 7
لما روحت لقيت الدكتور قاعد معاهم ... نفس الطريقة و نفس الهزار و الصوت العالى ... و إتعامل معايا عادى و ما جابش سيرة حكاية المستشفى خالص و لا إتباهى باللى عمله معايا قدام الناس ... حاولت أفكر فى الجانب الكويس بتاع شخصيته و عصرت على نفسى ليمونة عشان أقدر أتقبل هزاره و كلامه 8
بعد القعدة طلب منى رقم تليفونى ... و لقيته كل يوم بيبعتلى حاجات المفروض تكون مضحكة ... كان فيه مبالغة فى طريقته .. بيبعت حاجات كتير طول الوقت ، و إحنا مش أصحاب ! المهم جيت فى يوم و كلمت صديقى و قررت أسأله عن قصة الدكتور ... قالى أنا عارف إنه "مهيبر" شوية 9
بس صدقنى هو شخص طيب جدا ، قريبى من بعيد و أصحابه كلهم مسافرين ، بيخرج معايا على طول ! من ناحية تانية ، قريبى اللى كان تعبان ، دخل على سايكل تانى للعلاج الكيماوى على أمل الشفاء ... و فى مرة كان رايح ياخد جلسة الكيماوى فى عيادة فى مصر الجديدة ! 10
و طلب منى أوصله ... دخلنا العيادة ، زحمة رهيبة ... المهم ، دفعنا تمن المحاليل و الأكياس و كل حاجة و إنتظرنا دورنا ... و أسمعلك صوت ضحكة عالية طالعة من المكان اللى المرضى بياخدوا فيه الجلسات .. و إتكررت تانى و تالت ... لا يمكن ، هى ضحكته ! إيه اللى جابه هنا ؟ 11
الراجل ده ورايا ورايا ، طالعلى فى البخت ! بعد شوية ، الممرضة ندهت علينا و دخلنا ... لقيت الدكتور قاعد و أول ما شافنى جالى و أخدنى بالحضن ... قعد يسأل قريبى شوية أسئلة عن صحته و حالته ... و طبعا بين كل كلمة و التانية يضحك و يهزر ... 12
و بعدين جه دورى أسأله بيعمل إيه هنا ... شاورلى على بنت صغيرة بتاعة 11 أو 12 سنة، مرَكِبة محاليل و بتاخد جلسة كيماوى ... كان شعرها رايح خالص و فيها شبه منه .."دى بنتى أميرة ، عندها كانسر فى العظام" و أخدنى يعرفنى عليها و قالها ده فلان اللى حكيتلك عليه! 13
كانت جلسة الكيماوى كلها عبارة عن ضحك و هزار ، لأول مرة أشعر إنى بدأت أستظرفه ... و لأول مرة ضحكت من قلبى ، و قريبى كان بيضحك على كلامه و طريقته .. و بنته أميرة فطسانه على روحها ! 14
و عمالة تقولى "ده بابا ... شوف إنت بتستحمله ساعة و لا ساعتين ... أنا بقى مستحمله القلش بتاعه طول الوقت" ... كلمت صديقى بعد ما رجعنا و عاتبته إنه ما جابليش سيرة عن قصة أميرة بنت الدكتور ...بقينا أصحاب ، و بيكلمنى و باشوفه مرة أو مرتين فى الأسبوع ! 15
لما عرفته أكتر ، فهمت إن الهزار الكتير و الضحكة المبالغ فيها ، وراها حزن كبير بسبب مرض بنته ، خصوصا إن الدكتور بيكون عارف حاجات أكتر من أى شخص عادى ... و المعرفة فى الحالات دى بتكون سلاح ذو حدين ... 16
مهما الواحد عاش فى الدنيا و إتعلم ، دايما فيه دروس جديدة بنتعلمها من حياة الناس حوالينا ... و لما تفهم ظروف الشخص ، ممكن تلاقى عيوبه بقت مقبولة ... بل محبوبة ! 17
جاري تحميل الاقتراحات...