بما إن الناس هنا مبتتأخرش فالنصائح الصراحة وبتحكي تجاربها، فأنا هحكي تجربتي سريع سريع كده مع الـ Ielts وخاصة الـ Computer delivered للناس اللي عاوزه تجيب سكور في الرينچ بتاعي ده، عسى يعني تتفادوا الخوازيق بتاعتي وتجيبوا سكور أحسن
أنا بصراحة أول مرة امتحنه، في ناس دخلته أكتر من مرة فيعرفوا يدوا نصايح أحسن ومتنوعة يعني، الفكرة إن الموضوع مش تقييم لـ اللغة بس، لا ده عن طبيعتك في الامتحانات يعني وثباتك الانفعالي وتركيزك والحوارات دي، فده شق مهم برضه، المهم من غير تجويد، من أهم الحاجات إنك تحدد مستواك فاللغة
بكل صراحة مع نفسك، مش وقت فشخره يعني، عشان تعرف إنت محتاج قد إيه تحضير للامتحان، أنا بصراحة كنت واثق فنفسي شويتين إني طول عمري بحب الانجلش ومدمن أفلام فده ساعدني في السماع والقراءة جامد، وإني سافرت وكده شهور كتيرة اللي هو بتكلم إنجلش بس مع أجانب كتير فساعدني فشخ فكسر رهبة الكلام
الخطة العامة اللي مشيت بيها إني نويت أخش على موقع اسمه Ieltsliz.com دي واحدة عسل جدًا عامله نصائح كتير للايلتس فكل الأجزاء، فخطتي كانت هاخد كل جزء وأقرا النصائح بتاعتها وأحل التمارين اللي عندها وبعدين أحل تمارين من موقع ieltsonlinetests.com
الموضوع كان بالنسبالي متمحور في الموقعين دول قررت أبدأ Listening مثلاً، أخش عند ليز أسمع نصايحها فيه وأحل تمارينها وبعدين أروح لموقع الامتحانات، موقع الامتحانات ده بقا تحفة الصراحة في امتحانات كتير سابقة، وفيه timer عشان تاخد جو الامتحان وتتعلم تحل بسرعة، وبيراجعلك الإجابات
وأسبابها ويصلحلك غلطاتك وحاجة آخر دلع يعني، في كتب بتاعة كامبريدچ دي ١٤ كتاب فيهم امتحانات السنين اللي فاتت، كل كتاب فيه ٤ امتحانات، جيبلك مثلاً آخر ٤ كتب وحلهم هيفيدوك برضه، المهم مسكت كل جزء لوحده وقعدت فيه ٤ أيام مثلاً، وبعدين بدأت أحل امتحان كله على بعضه بقا
عشان اخد سينس الامتحان كله وضغطة وقته وتركيزه وكده، أنا كنت بمتحن Academic المهم، السماع مش هيجي غير بالممارسة محتاج تسمع كتير، أفلام، في podcasts جميلة ممكن تسمعها وانت فالمواصلات على موقع الـ british council برضه، ومع حل تمارين امتحانات وتلتزم بالوقت، هتتعلم تقرأ الأسئلة بسرعة
وتعرف المعلومات المهمة اللي عاوز تسمعها وتنفض للباقي، وتركز عشان ساعات بيقول حاجة ويرجع يغيرها وكده، فانت تكون مركز ومفتح دماغك يعني متبقاش جهاز تسمع حاجة وتجري تكتبها، السماع بيبقى ٤ أجزاء كده بيتدرج فالصعوبة للآخر يعني، المحادثات بتبدأ من حاجات بسيطة للحياة اليومية، لحجوزات
وحد بيدي معلومات لناس، تالت واحدة بيبقى كذا واحد بيتناقشوا فلازم تركز وتفرق بينهم عشان بيسألك ساعات على أراء ناس محددة فيهم، وساعات بيبقى في خريطة ويقولك حدد الأماكن، فلازم تركز معاه أوي وانت بتسمع وتمشي معاه وهو بيتكلم كده عشان تعرف تحدد الأماكن، باختصار في نوعيات أسئلة كتير
لازم تدرب عليها كلها عشان متتخضش لما تشوفها، جزء الـ reading بقا مرهق الصراحة، ٣ قطع محترمين كده بأسئلتهم فساعة، كل واحد تلت ساعة كده، بيتدرجوا فالصعوبة برضه، تظبيط الوقت مهم جداً هنا عشان الوقت مش بيكفي فعلاً، ممكن تبدأ بآخر قطعة عشان أصعبهم وممكن تخليها للآخر براحتك
نصيحتي هنا أقرأ الأسئلة الأول وحدد الكلمات المميزة فكل سؤال عشان عينك تلمحها وانت بتقرأ القطعة، القطعة بحر ولازم تركز مجهودك ومينفعش تقراها كلها، لازم تتعلم تمسحها بعينك كده بسرعة، الموضوع ده مهم، في نوعية أسئلة مهمة true,false,not given اتمرن عليه عشان تعرف تظبطه واعرف امتى تقول
كل واحده فيهم، لو عاوزك تحط عناوين للأجزاء فالقطعة، أقرأ أول وأخر سطرين فكل جزء، متضيعش وقتك دي الخلاصة، أعرف الأسئلة عن إيه وحدد مجهودك، جزء الـWriting ده أسوأ جزء بالنسبالي بصراحة وبالنسبة لناس كتير، مدتهوش وقت كتير ومحضرتلوش صح، فانت فعلاً لو السكور بتاعه مهم عندك حضره كويس
اسمع نصايح ليز، واكتب كتير وشوف حد يصححلك كتابتك ويحسنهالك، اعرف كلمات كتير تستخدمها، راجع الجرامر بتاع زمان كده، الامتحان بيبقى جزأين، في الـAcademic الجزء الأول بيديك حاجة زي رسم بياني كده ومعلومات ويقولك حللها واكتبها، ليه كذا شكل هتخش موقع ليز وتتمرن عالأشكال وتعرف الاسطمبه
وتتمرن عليه كتير، ده بيبقى عليه تلت الدرجة بس بتاعة الكتابة، فمتحرقش فيه مجهودك كله يعني، الجزء التاني موضوع تتكلم فيه وتقول رأيك، بقول تاني ركز ف الـwriting واتمرن كتير وشوف حد يصححلك ويساعدك، آخر جزء هو الـSpeaking ودي مشكلة أزلية عند ناس كتير يعني، اللي هو عمر مجالك فرصة
تتكلم إنجلش أساساً يا إما متعرفش تتكلم فحاجة برا نطاق دراستك أو شغلك، لازم تبدأ تتكلم لازم، أنا لما كنت بحل لما باجي لجزء ال speaking ببتدي أكلم نفسي وأسألها وأتناقش، ألعب دور الممتحِن يعني، لازم تبتدي تتكلم وتعرف كلمات المواضيع الدارجة، وتستخدمها ويبقى عندك سرعة بديهة كده تهري
فأي موضوع يتفتح قدامك، حصيلة كلمات كويسة هتساعدك جامد تتناقش فأي موضوع، لو تعرف حد كمان عاوز يمتحن كلموا بعض، اتفقوا على ساعة في اليوم تتكلموا فيها إنجلش بس وتتناقشوا كل مرة فموضوع، لازم تواجه رهبة الكلام دي ملهاش حل تاني، اغلط فالأول عادي ومتتكسفش وتأتأ وخد وقتك
دي مش لغتك الأم ده شيء طبيعي، مفيش حد بيتولد دكتور بس بيتعلم فكذا سنة يبقى، فانت دايمًا اعرف إن اللغة زي أي حاجة محتاجه وقت وتمرين وممارسة مش أكتر، الامتحان ٣ أجزاء، الأول هتدردش كده معاك عنك وعن سكنك أو أهلك، التاني هتديك ورقة فيها موضوع تتكلم عنه دقيقة أو اتنين
التالت هيبقى نقاش في مواضيع مرتبطة شوية بالجزء التاني وكده، نيجي بقا لجزأية الـ Computer delivered هي لسه جديدة شوية ومش ناس كتير بتمتحنه زي الامتحان الورقي، أنا ذات نفسي كنت مقلق الصراحة، بس الدنيا طلعت ظريفة بجد، الامتحان كله عالكومبيوتر طبعاً، بس برضه بيديك ورقة وقلم عشان
لو حبيت تكتب أي حاجة زي مانتا عاوز، بس طبعاً اللي عالكومبيوتر بس هو اللي بيتصحح، موقع IDP منزل نسخ وتمارين لامتحانات الكومبيوتر دي عشان تبقى عارف شكل الامتحان اللي هيجيلك، السماع مفيش اختلاف أوي هتركز وتكتب إجاباتك، القراءة جميل جداً، هتلاقي الشاشة مقسومة الأسئلة عاليمين والقطعة
عالشمال، هتقدر تعمل highlight وتعمل notes كمان للحاجات المهمة اللي عاوزها، تقدر تعمل copy paste كمان من القطعة وبالتالي هيقللك غلطاتك وانت بتنقل مثلاً، فهو لطيف الصراحة، الكتابة بقا وده المهم لو انت مبتعرفش تكتب عالكيبورد أو بطيء فشخ يعني، فمنصحكش بالكومبيوتر، إنما لو سرعة كتابتك
كويسة، خش يا معلم، فيه ميزة إنه بيعملك word count قدامك فبالتالي مش محتاج تضيع وقت فعد الكلمات، تقدر تمسح وتنقل الكلام بسهولة مش هتشخبط وكده، المنظر مريح نفسياً عالشاشة هتعرف تلقط غلطاتك فالـspelling وتصلحها كده والكلام يفضل شكله لذيذ، فهو كويس جداً جداً فالكتابة، الفرق بس صحيح
في السماع فالامتحان الورقي كان بيديك ١٠ دق تنقل إجاباتك لكراسة الإجابة بس عشان هنا فالكومبيوتر ومفيش نقل بيديك دقيقتين بس في الآخر تراجع كل إجاباتك، الكومبيوتر بيبقى نضيف والسماعة صوتها كويس وواضح وعالي جدا، فااا لاتقلق، مممم ده كل اللي عندي أعتقد، متزهقش ومتيأسش، زي ما قلت
اللغة زي أي حاجة في الدنيا، محتاجه ممارسة وتمرين كده عشان تظبطها، احفظ كلمات كتير وشوف أفلام وحل امتحانات واتكلم مع صحابك مع نفسك، اتشقلب يعني عشان تؤدي المهمة .. وبالتوفيق يا شباب.
جاري تحميل الاقتراحات...