رتبها

- إزاي نحرر القدس ؟ ??
- إزاي نكون أقوياء ؟
—
شوف الـ Thread ..

- قبل ما أدخل في موضوع الثريد ، القدس مش هتتحرر بالسوشيال ميديا و بوستات التنديد ، العالم أصلا ً مش هيسمعك لأن دول عالم تالت ليس لك كلمة و غير مؤثر ، عشان تحرر فلسطين لازم تكون دولتك [ قوية، عادلة، .. ] و ده مش هيتحقق إلا بالإنسان نفسه

- القرآن و التاريخ بيعلمونا إن مفيش يأس ، التاريخ بيكرر نفسه و بيعيد حاجات كتير ، لكن للأسف إحنا مش بنتعلم من التاريخ ، [ وتلك الأيام نداولها بين الناس ] ، التاريخ بيقولك دايماً متيأسش ، في الثريد هحكي قصتين مهمين جدا بيتعادوا دلوقتي

١- قصة صلاح الدين و تحرير القدس
——
كل الناس تعرف قصة تحرير القدس و معركة حطين و كل الأفلام اللي إتعملت بتحكي الفترة دي فقط ، لكن قليل اللي يعرف إزاي أصلاً ظهر صلاح الدين و إيه السبب في كل ده و إزاي حصل و ده اللي هنعرفه

- في عهد الدولة السلجوقية ، ما قبل عام ٤٥٥هـ ، إنتشرت الفتن و المجاعات و الإنحلال الاخلاقي في بلاد المسلمين ، لحد ما في عام ٤٥٥هـ ، عين السلطان [ ملكشاه ] الوزير [ نظام الملك ] ، و بدأ نظام الملك خطته في الإصلاح الثقافي و التعليم قبل الإصلاح السياسي

- إهتم نظام الملك بالتعليم و أسس [ المدارس النظامية ] ، صرف نظام الملك مبالغ هائلة في المدارس، وحرص على أن توفر راحة كاملة للطلاب، فخصص سكناً للمدارس لكي يُقيم به طلابها، وأعطى كل واحد منهم أربعة أرطال من الخبز كل يوم لإعالته، وبنى في كل مدرسة مكتبة ضخمة تشبع اهتمامات الطلاب

- إهتم بالعلماء و كان بيشجعهم و أبرزهم [ أبو حامد الغزالي ] و [ عبد القادر الجيلاني ] و الشاعر [ عمر الخيام ] ، في الوقت ده إرتفع شأن الدولة السلجوقية ، لحد ما قتل [ نظام الملك ] سنة ٤٨٥ هـ علي يد عضو من فرقة الحشاشين و بعدها بـ ٣٥ يوم مات السلطان [ ملكشاه ]

- بعد موت السلطان ، تفككت الدولة السلجوقية إلي ٥ دول بسبب خلافات بين القادة و هم [ سلاجقة العراق والروم والشام وكرمان وخراسان ] ، و بعدها حصل خلافات و صراعات بين قادة الجيوش ، لدرجة إن الجندي في الجيش بعد ما كان بيحمي الأمن ، بقا بينهب و يسرق الناس بالعافية

- في ظل كل الخلافات و الصراعات دي تجمع ٤ جيوش أوروبية سنة ٤٩٠ هـ ، و قرروا الإستيلاء علي الشام ، و في سنة ٤٩١ هـ إستولوا علي [ أنطاكيا ] و في سنة ٤٩٢هـ إستولوا علي القدس

- بعد اللي حصل بعد موت [ نظام الملك ] ، في سنة ٤٨٨ هـ قرر [ أبو حامد الغزالي ] إعتزال العامة ، و بعد ١١ سنة من العزلة درس من خلالهم الفلسفة و المنطق و. تعمق في الدين و العلوم في ٤٩٩هـ ، قرر تأسيس المدرسة الغرالية و ركز فيها علي بعض المحاور الاساسية

- المحاور هي
—
١- انشاء جيل جديد من الطلاب و العلماء يحصلوا العلوم النافعه و يبعدوا عن المشكوك فيه
٢- حط منهج جديد للتربية و التعليم أساسه العقيدة و تهذيب النفس
٣- احياء الأمر بالمعروف و النهي هن المنكر في نفوس الجيل الجديد
٤- نقد الحكام الظلمة و تحريم التعامل معاهم

- في سنة ٥٠٥ هـ توفي الغزالي ، و بدأ يكمل ما بدأه الغزالي واحد اسمه [ عبد القادر الجيلاني ] و أسس المدرسة القادرية في أكتر من مدينة و بدأ الخريجين منها يفتحوا مدارس في المدن اللي يروحها و كان الإصلاح الفكري و الثقافي معتمد علي المدرسة الغزالية و القادرية في ظهور جيل صلاح الدين

- مع الإصلاح الفكري و الثقافي بقيادة الغزالي و الجيلاني ، كان الإصلاح السياسي بقيادة [ عماد الدين زنكي ] حاكم [ حلب ] و بدأ في بناء الجيوش و الإستعداد و الإتحاد مع المدن اللي حواليه ، و لما عرف الصليبين باللي بيعمله ، هجموا علي حلب سنة ٤٣٢ هـ ، لكن تصدي لهم عماد الدين زنكي

- و كان الإنتصار اللي حققه عماد الدين زنكي علي الصليبين أول إنتصار عليهم و بداية الرحلة في استرداد القدس
—
سنة ٥٣٢ هـ ، ولد صلاح الدين الأيوبي و بدأ رحلة تعلمه بعد الإصلاح الفكري اللي قام به الغزالي و الجيلاني

- بعدها مات عماد الدين زنكي ، و تولي القيادة بعده ابنه [ نور الدين ] و حقق المزيد من الإصلاحات السياسية ، و جهز الجيوش بمعسكرات تدريب بتقوم علي الإداد النفسي و الروحي قبل الجزء القتالي و غير عقلية الجنود ، و ده كان عامل رئيسي في تكوين عقلية صلاح الدين و جيله

- في سنة ٥٥٩ هـ دخل صلاح الدين مصر و أنهي الخلافة الفاطمية ، تولي حكم مصر سنة ٥٦٥هـ و بعدها حصل خلافات بينه و بين نور الدين زنكي لحد ما توفي نور الدين و بدأ صلاح الدين في فتوحات الشام و بدأ في توحيد مصر و الشام و الحجاز و تجهيز الجيوش بمساعدة العلماء

- لحد ما في سنة ٥٨٣ هـ صلاح الدين يهزم الصليبين في معركة حطين و يفتح القدس ، و يتوج جهود الاصلاح الفكري و السياسي في تحرير القدس

٢- حرب أكتوبر و تحرير سيناء
——
برضو كل الناس تعرف عن حرب أكتوبر و إيه اللي حصل و العبور ، لكن الأغلب مش عارف إيه اللي حصل علي نستعد لحرب أكتوبر و إيه أحوال الجيش قبل نكسة ٦٧ و بعدها إيه اللي حصل و ده اللي هنعرفه

- إيه أحوال الجيش المصري قبل ٦٧
—
مين كان ماسك الجيش وقتها [ عبد الحكيم عامر ] و كان برتبة مشير ، اللي محدش يعرفه إن عامر كان رائد و بعدين وصل لمشير بعد ٥٢ ، و هو ممرش بالدراسة و القيادة و الخبرة اللازمة ، بالاضافة لعدم وجود خطه في قيادة الجيش

- بالإضافة كان المنتشر وقتها ، زواج عبد الحكيم عامر من برلنتي عبد الحميد و انشغاله في المشاكل بالاضافه لصراعات السلطة بينه و بين عبد الناصر
—
كمان الجيش وقتها كان بيقام فيه حفلات لام كلثوم و عبد الحليم ، ده غير حرب اليمن

- كمان الجيش وقتها كان جزء كبير من الجنود اللي فيه هما من الغير متعلمين و ده اللي تم تجسيده في فيلم البرئ ، كل العوامل دي كانت سبب رئيسي و نتيجة حتمية للي حصل في ٦٧ ، التاريخ مبيرحمش

- بعد النكسة تم تعيين الفريق [ محمد فوزي ] و الراجل ده كان له الفضل الأساسي في إعادة بناء الجيش و خوض حرب الإستنزاف ، و بناء حائط الصواريخ ، و بدأت حرب الإستنزاف اللي ارهق اليهود ماديا و معنوياً و كانت بداية لرفع الروح المعنوية قبل حرب اكتوبر

- بعد موت عبد الناصر و تولي السادات ، بدأ الإصلاح السياسي بدستور ٧١ و بعض القرارات زي حرق شرايط التصنت و غيرها ، عين بعدها الفريق سعد الشاذلي ، الراجل اللي كان له الدور الأهم في التخطيط للعبور

- مين هو الفريق سعد الشاذلي
—
شارك في حرب فلسطين
شارك في حرب الكونغو
شارك في حرب اليمن
مؤسس قوات المظلات في الجيش المصري
قائد منطقة البحر الأحمر
قائد كتيبة [ نجت ] أثناء النكسة
قائد قوات الصاعقة
——
و دي كانت إهم خطوة في الإصلاح

- بدأ الفريق الشاذلي في رفع الروح المعنوية و تغيير العقيدة للجنود و وضع توجيهات تم توزيعها علي الجنود ، و توزيع توجيه عقيدتنا الدينية طريقنا للنصر ، و اللي فيه بيربط الدين و العلم بالنصر ، و أهمية الحرية و الكرامة للجندي ،ًبعد ما كان الجندي بيتهان قبل ٦٧

- بدا الجيش بالإهتمام بتجنيد المتعلمين و طلبة الجامعات و الإهتمام بالإعداد النفسي و الروحي
—
و في مارس ٧٣ قام الفريق الشاذلي بوضع التوجيه ٤١ و توزيعه علي الجنود و التوجيه ده كان ٧٥٠ صفحة فيه كل حاجة عن الحرب من أول نوع القماش لحد بعد الوصول لـ ٢٠ كيلو

- و توجت الإصلاحات السياسية و العسكرية بالعبور و تحرير سيناء في ٧٣ برغم ما انتهت عليه الحرب و اللي حصل في كامب ديفيد

- المخزي من القصتين حاجة واحدة ، إنك مستحيل هتكون قوي غير لما تكون قوي فكريا و ثقافياً قبل ما تكون قوي بالسلاح ، التعليم أهم سبب لتحرير القدس التعليم هو اللي بيبني المجتمعات و الحضارات ، التعليم يعمل ممكن يخلي [ وطن ضايع ] في أعلي مكانة

- الثريد ده بالتزامن مع كلام شيخ الأزهر إمبارح عن التراث ، مستحيل هتكون قوي و أنت بتقلد غيرك ، عشان تكون قوي لازم تتمسك بهويتك و عقيدتك مش تتخلي عنها و تقلد ، اللي بيقلد هو المنهزم و الضعيف فقط مش ده مش حداثة أو تجديد ، لكنه تقليد

- إحنا أكتر شعوب سلبية و ضعيفة في العالم ، احنا ضعاف لدرجة اننا عايشين في ظلم جوا بلادنا المسلمة اللي بيحكمها مسلمين ، بل بالعكس كل اللي بنعمله كام بوست علي السوشيال ميديا و نعبر عن غضبنا و بعدها بيومين ننسي

هنهي الثريد بكلام ابن خلدون
——
الأيام الصعبه تخرج رجال اقوياء
الرجال الاقوياء يصنعون الرخاء و التقدم
الرخاء يخرج رجال ضعفاء
الرجال الضعفاء يصنعون ايام صعبه

تقييمك للثريد ؟

ريتويت يا جماعة لو عجبكم بعد اذنكم عشان الثريد متعوب عليه

فهمت ايه من الثريد ؟

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد