١. صعب تلاقي شخص يثير فضولك ويحيرك زي الشخص اللي عنده اتصال بين عطارد ونبتون في خريطة ميلاده اياً كان نوع الاتصال (اقتران، تربيع، معاكسة، تسديس، تثليث او حتي عدم اقتران) الشخص ده هتسمع منه القصة او الموضوع بطريقة مختلفة وممتعة جداً حتي لو كنت سمعتها مليون مرة قبل كده.
٢. اي شخص عنده اتصال بين عطارد ونبتون طريقة استيعابه و تحليله للأمور مختلفة عن الغير كأنه شايف حاجة محدش غيره قادر يشوفها ولذلك اغلبهم من سن صغير معرض لسوء الفهم وبيتم التسرع في الحكم عليهم، خاصةً لو الشخص نشأ في اسرة يغلب عليها العنصر الناري او الترابي سهل يعاني من النقطة دي.
٣. لو هنفترض ان نبتون وعطارد اشخاص، فنبتون شخص لا يؤمن بالنهايات ولا بالواقع وعطارد شخص مرن وعنده فضول فصعب يقاوم سحر نبتون. يقوم نبتون بمكر كل ما يلاقي عطارد في حالة ملل يقوله تعالي ورايا هتشوف مكان محدش شافه. نفس الفكرة اتصالات عطارد ونبتون بتخلي الشخص يتخطي حدود الزمان والمكان
٤. اتصالات عطارد ونبتون بتمنح الشخص مساحة كبيرة مليئة بالخيارات يقدر من خلالها يفكر بالطريقة اللي تعجبه ويحلل الامور علي كيفه وكأنه غير مقيد بأي وقت او مكان. تخيل يبقي عندك مساحة وحرية كاملة تفكر وتتصرف بالطريقة اللي تريحك في الوقت اللي يناسبك بدون قيود، قواعد او التزامات! جنان
٥. عشان كده اغلب الاشخاص اللي عندها اتصالات بين عطارد ونبتون اياً كان نوعها تركيزها مش عالي وصعب تنجذب للمسائل الروتينية او اللي بتحتاج دقة عالية وده لأن ذاكرتهم مش قوية للغاية وفي حالات معينة طبقاً لوضع الخريطة دي بتكون دلالة علي الاصابة بالزهايمر او الانفصام او ضعف السمع.
٦. اتصالات عطارد ونبتون بتخلق المفكر المثالي اللي ثقته في قدراته مش كبيرة ولذلك سهل يتم استغلال افكارهم او استغلالهم من خلال مثاليتهم. وهتلاقي فيهم نسبة براءة وسذاجة تحيرك لأن ده الشخص اللي سهل تقنعه بتصنيع مادة سامة لهدف انساني نبيل وبعد كده يتم استخدام "فكرته" لأذية الغير.
٧. اتصالات عطارد ونبتون بتخلي الشخص يمزج الحقيقة بالخيال. كأن الكون مسرح كبير كل يوم بيتقدم عليه عرض مختلف يوم المشاهد ممثل ويوم تاني الممثل مشاهد فصعب الشخص ده يعرف ياخد موقف منك او ياخد قرار. هو بيحب النهايات المفتوحة، بيحب يلعب مع الدنيا واحتمالاتها، مرة تكسبه ومرة يكسبها.
٨. الحقيقة ان امكانيات الاشخاص اللي عندها اتصال بين عطارد ونبتون غير محدودة، يعني "موهبة خام" من وجهة نظري وممكن يستقبلوا رسائل ويتواصلوا مع الاخرين عن طريق الاحلام، التخاطر وبطرق لا تخطر علي بالك. هما ملوك العالم الافتراضي ونواياهم بتخلق واقعهم بجانب انهم اشخاص متسامحة جداً.
٩. التحدي اللي ممكن يظهر هنا ان الشخص يعيش في حالة انكار وندم ويتحول لانسان "موهوم" يصعب عليه التأقلم مع واقعية العالم فيهرب عن طريق النوم، المراوغة، الكذب او التكيف مع الفوضي. الخيال الواسع ممتع لأن من خلاله تقدر تخلق عالم مش موجود بس لو هتستخدمه للهروب يبقي هتعيش للأبد في الحلم
حقيقي اتصالات عطارد ونبتون شرحها يتطلب اكثر من ثريد ولكن من اشهر الافلام اللي بتمثل الطاقة دي بشكل مثالي هو فيلم inception مش ممكن يا جماعة! فلو عندك اي اتصال بين عطارد ونبتون او حد بتحبه او يهمك عنده اتصال مماثل اتفرج علي الفيلم وهتفهم تركيبة الاتصالات دي وركز مع شخصية Dicaprio
🌟 في النهاية خريطتك ليها الكلمة الأخيرة وتأكد ان مفيش بطل لحكايتك غيرك وان طول الوقت عندك خيارات وفرص ومفيش حدود لأبداعك وعطائك 🕊
اتمني للجميع يوم مبهج، مشرق و جميل 💛
غير كده وحشتوني وبحبكم أبطالي 🦄💜
اتمني للجميع يوم مبهج، مشرق و جميل 💛
غير كده وحشتوني وبحبكم أبطالي 🦄💜
جاري تحميل الاقتراحات...