رتبها

الثريد المنتظر
#تجربتي_في_زراعة_البرسيم
المعلومات الحأكتبها هنا ما أي زول حيقولا ليكم و بالاسعار ،نحن خسرنا قروش و وزمن عشان مافي زول ورانا ليها وعلما أنو دي أول تجربة زراعة بدون أي خبرة او تجربة سابقة عشان تتشجعو وتزرعو 😊
🌱
#يتبع 👇
#ازرعوا_السودان
#تعرف_على_السودان

طيب بداية لما قررنا نزرع كانت في اسباب كتيرة قوية تخلينا نختار الزراعة كمشروع لأنو فعلا هي مخرج البلد دي ودائما في احساس داخلي بيجبرك انك عايز تقدم شي للوطن وفي نفس الوقت تطور نفسك بدخل كويس فكان الاختيار واقع على البرسيم عشان سوقو وعائده كويس حسب دراسة الجدوى بتاعتنا

البرسيم من مميزاته انو لو زرعته ممكن يقعد معاك ٥ سنوات تحصده كل شهر ويقوم تاني بدون اي مدخلات جديدة يعني زي الموظف البياخد راتب كل شهر بس اهم شي تجهز ارضك صح وانا صراحة استعنت ب @nerinegroup الخبير والله ما قصر ابدا وعاجزة عن شكره خبرة مع علم ماشاء الله 🌱

اخترنا الارض طينية قريبة من البحر ولأنها المفروض تقعد حوالي ٥ سنوات ونحن محتاجين ل حماية من البحر وكمان كتسوير عملنا ترس ترابي حول المزرعة كلها فيهو بوابة للعربات والمزرعة فيها كهرباء ودي احسن ميزة ممكن تحصل عليها الكهرباء مهمة جدا للموية والاضاءة وتغنيك من صداع حاجات كتيرة

بعد خطوة التتريس جينا لموضوع تنظيف الارض ..الارض كانت مليانة عشر واشجار صغيرة بصورة مهولة ومخيفة فجبنا لودر نضفها لينا وقلع الشجيرات اللودر اشتغل بالساعة كانت ١٥٠٠ جنيه للساعة وانت ومكاسرتك بعد كدة

بعدها احتجنا نجيب عامل ينظف الارض من بواقي للاشجار والجذور لأنو ناس التركتورات ما ببشتغلو ليك والجذور قاعدة لأنها العامل اشتغل لينا الشغل كلو ب ٥٠٠٠ جنيه ل ٤ فدان كلها وهو شغل مقاولة وحسب نظافة الارض برضو يخضع للتقدير

قبل ما تبدأ تزرع اعرف حتسقي من وين و ميلان الارض كيف عشان الحاجة دي كلفتنا كتير شديد مهما كان ميلان ارضك انت اضبط الري عليهو عشان تقلل التكلفة بتاعة تصليح الارض وتغيير ميلانها خاصة اذا كنت مؤجر حتزيد تكلفتك شديد اول شئ اعرف حتسقي من وين ومسار الري واتجاهو في الارض

انتبهو لتاريخ التغريدة عشان الاسعار دي قبل شهر واكيد انها زادت 🤷‍♀️
الخطوة البعدها هي خطوة #حراثة الارض (حأستخدم مصطلح حراتة ) من اهم الخطوات عشان البرسيم محتاج يمد جذورو فالحراتة لازم تكون عميقة و كويسة

التركتر العادي بتقاولو اما بالساعة او بالشغل واكتر ناس خسرونا قروش وجهد وزمن ناس التركترات بالجد محتاجين متابعة شديدة ميزة المقاولة بالساعة انو حيتقل شغلو ويحرت ليك كويس عشان يزود عدد ساعاته والبيقاولك بالشغل مشكلتو انو عايز يخلص سريع ممكن يخلي ليك فرقات في الحراتة وما بتظهر

الحراتة اشتغلوها لينا ب ٤٠٠ جنيه للساعة علما اننا جبنا تقريبا ٣ تركتورات لأننا بنجيب واحد وما بيلتزم وما بيجي في مواعيدو اتخيل انك تجي من الساعة ٥ ص منتظر التركتر وهو يقول ليك الليلة انا عطلان 😭غيررالاسباب التانية زي جاز مافي انا واقف في صف الجاز ...الخ

وعندهم اعراف زي انو ما بيشتغل مكان بداهو زميلو يعني لو قررت تحرد وتجيب غيرو حيقول ليك ما بدخل مكان زول ، عااادي جدا انت تقول ليهو تعال لي يبدأ ليك والمساء يبدأ لغيرك عشان يضمن الشغل وطبعا ماحأعمم دي تجربتي الشخصية فانت من البداية خت شروطك وتابعو بنفسك عشان الموسم ما يروح عليك

في النهاية ربنا كرمنا بتركتور صاحبه ملتزم وممتاز وعمل لينا الشغل العايزنو ..وفي النهاية جينا اكتشفنا الكنز بعد خسرنا 😭 والله بالصدفة وفي صف الجاز شفنا التركتور دا واقف وسألناهم قالو بس تجي وتدفعو وتشيلوا ايصالاتكم ونجيكم
ديل صندوق تنميةالزراعة والثروة الحيوانية

وحدة تطبيق التقانات الهندسية الحديثة ديل عندهم آليات على مستوى عالي من القوة والمتانة والتركتر كبييير والشغل الصح والموظفين مدربين تمام على الشغل ديل بيشتغلو بالفدان ما الساعة وبنص السعر عديل الفدان ب ٣٥٠ جنيه و لو بالجاز ٤٠٠ جنيه بس لازم تمشي ليهم من قبل ١٠ ايام من شغلك

موقعهم حلة كوكو قريب من القنطرة عندهم الهرو والليزر والبتانات...الخ و وكبيرة بتختصر ليك الزمن تقطع ايصالك وتنتظر دورك يجي والاجمل انو الموظف السايق التركتر بيديك معلومات سمحة 💚
هم بيشتغلو الفدان ب ٤٠٠ جنيه ولو العادي بيشتغل ليك ٥ ساعات ب ٢٠٠٠ جنيه بالله شوف الفرق

نجي لقصة الجاز وما الجاز اذا انت زارع بالمولد برضو حتحتاج للمعلومة دي انو الجاز حتقيف ليهو صف وما بيدوك زيادة في برميل الا تدفع وكدة ما حتستفيد من قروش الدعم وبرضو ما حأعمم 😑 المهم نحن اخترنا نعمل تصديق عدييل ونمشي بالصح بداية تشيل شهادة البحث او الايجار وتمشي اقرب محلية

للمزرعة ومعاها اثباتات الهوية بعدها بوجهوك لادارة البساتين جمب حديقة عبود في اجراءات وموافقة اخر خطوة مكتب جهاز الامن في الصبابي ويصدقو ليك حسب المساحة بتاعتك ويحددو ليك الطرمبة

اها الخطوة البتتعمل بعد الحراتة وقبل التقصيب والتقصيب دا يعني يتم تنعيم الارض بالقصابية قبله بنضيف كومبوست معالج ومعقم يعني السماد الطبيعي بتحتاج ١٠ اكياس للفدان يعني حوالي نص طن الكيس ب ١٧٢ جنيه بدون ترحيل

خطوة القصابية مهمة اي زول ممكن يحرت لكن التقصيب محتاج خبرة عشان النباتات محتاج تربة ناعمة عشان تنبت وتطلع برة التربة فمحتاج شغل باخلاص بعد التقصيب نجي لعمل الاحواض بالبتانة وفتح الجداول بالناموسية وديل مقاولتهم بالفدان عشان شغلهم سريع ف الفدان ب ١٠٠٠ جنيه

بعدين حيجي يقفلو الاحواض بالواسوق نحن بصراحة عشان جبنا ناس خبراء من الشمالية وديل ما بشتغلو بالاليات بيشتغلو بالواسوق بس للاحواض والجداول ما عملنا الخطوة الفوق انتهينا بالبتقصيب وطوالي عملو الجدول الاسااسي بتاع الري ديل اشتغلو الفدان ب ٧٠٠٠ جنيه يسلمونا ليهو البرسيم مشتت

الناس الجبناهم ديل شغلهم ممتاز شديد اول شي عملو الجدول الاساسي عشان يعرفو ميلان الارض وبعدين تقسيم الاحواض وبيستخدمو عدد الخطوات ودي الزراعة التقليدية طبعا بس كانت النتيجة مرضية جدا 💚

الفدان بيعمل ١٠٠ حوض مساحة الحوض ٤٢ متر مربع نحن اديناهم اكتر من الاتفقنا عليهو عشان احتجنا نصلح الارض ونقلب اتجاه الري فانتظروا ايام كتيرة وقعدوا في المزرعة ودي دخلت في بند الخسارات بتاعتنا

يتبع يا جماعة😭تعبت بجي اواصل تاني

اها يلا نواصل 😁
في خطوة نحن نسيناها فعملناها مع البذور طوالي وهي اضافة سماد سوبر احادي الفوسفات مهم جدا لانبات البذور بصورة كويسة بتحتاج شوال للفدان بمعدل نص كيلو للحوض شتتناهو مع البذور طوالي
الشوال ٥٠ كيلو ب ١٣٥٠ جنيه افضل نوع هو السعودي بتلقوهو في محلات الزراعة

الخطوة بتاعة التشتيت دي حلوة خلاص 😍 وبرضو دايرة زول بيعرف عشان يوزع البذور او التيراب كويس وبعدها بيستخدمو فرع شجرة او عرجون عشان يغطو التيراب بالتربة

بعد التشتيت سقينا السقية الاولى واسمها المتعارف عليه #البوغة تكون في نفس يوم التشتيت عشان الطيور والفئران ما تاكل البذور والسقية الاولى دي حاجة كدة تحس بالانجاز فيها 😭😭والسقية دي بتكون تقيلة عشان الارض اصلا ناشفة وبرضو دايرة خبرة في فتح اللبقات (بوابة الحوض الترابية)

اهم خطوة والاهم على الاطلاق البذور لازم ولازم تكون من مصدر مضمون ونقية ومجربة للانبات لأنو اتخيلو تتعبو وتجو تشتتو حاجة ما مضمونة تقولوا عايزين برسيم حجازي نقي خالي من السيلكا والسيلكا دي عشبة بتجي دايما مع البرسيم عشان نلقى بذور كويسة اتصلنا على الشركات الكبيرة زي ctc وغيرها

كانت ما متوفرة في الوقت الطلبنا فيهو بس طوالي طلبناها من الشمالية من زول معرفة ومضمون ومعروف وكانت النتيجة تمام
قنطار البرسيم الحجازي ب ٤٠الف جنيه
الرطل ب ٤٠٠ جنيه
الفدان بيحتاج ٢٠ كيلو بذور
الحوض بيحتاج نص رطل بذور
🌱راعوا لتاريخ الاسعار دي 🌱

في نقطة مهمة في زراعة البرسيم بتحتاج لحارس مقيم يتابع ويحرس والحارس اما بالمقاولة بربع الانتاج او الراتب بي ٥ ل ٧ الف جنيه في الشهر يقوم برضو باعمال التنظيف من الاعشاب وطرد الحيوانات والري برضو بيفيدك فيهو وبيحتاج لغرفة انت وامكانياتك طوب او بالقش ....الخ

يلا بعد سقينا قعدنا ننتظر الانبات علما انو الري التانية (التيلان) بتكون بعد ١٠ ايام من الاولى واخف من البوغة بكتير خاصة انو النبات بيكون صغير

انا ما كنت قادرة اصبر😂😂 زرعت جزء في علبة صلصلة في البيت واول ما انبتت جري على المزرعة

ما حأقدر اوصف ليكم الفرحة يعني 😎 البرسيم ماشاء الله تبارك الله نبت والمجهود ما راح ساي احساس البرالمة في الزراعة حاجة ما بتتوصف💚💚💚

انتبهو شديد في الرية التانية حصلت لينا حاجة انو الحارس ربنا يهديه قرر انو يسقي البرسيم بدون ما يرجع لينا وغرقو تغريق بس ربنا كان لطيف وقدرنا نلحقو ونفرغ الموية ورغم كدة في اجزاء ماتت بس الحمد لله الامور مشت تمام

مرحلة النمو كانت حلوة كل يوم نمشي نشوفو وهو بيكبر

شوية صور 😁

زرعنا في طرف الجدول (التقاند ) ذرة صفراء وماشة كويس مع البرسيم و يا @AmroKhier و @Khalidsaad_1 متذكراكم وما نسيتكم 😁😁 زراعة عضوية

حاليا دا الطول الوصلنا ليهو ما عندي فكرة عن العائد لسة بس اكيد حأشارككم علما انو متعدي البرسيم جونا وطلبوه وهو لسة يادابو 😂سوقو حار

في ختام الثريد دا عايزة انبه انو نحن خسرنا كتييير وتكلفنا بس دي ما تكلفة حقيقية لأنو غيرنا زرعوه بأقل من كدة وانا حبيت اعرض اخطاءنا عشان تتجنبوها وانتو كمان لو اتعلمتو واخدتو بالنصائح حتلقو الموضوع بسيط شديد وسهل بس عايز صبر

جهز ارضك
الموية
احرت صح
قصب صح
الاحواض
التشتيت
السماد والبذور
وبس
تحياتي كمان للجندي المجهول البيحب البلد دي كتيير وخلى شغلو وكرس نفسه لخدمة البلد والبسسببو انا بكتب في الثريد دا وكان دافع لي اني احب الزراعة 😁 اتمنى ليك التوفيق والنجاح

عاااجزة عن شكركم كلكم وما قدرت ارد على الكل❤❤❤❤
المعلومة المهمة ...
التكلفة بتاعتنا ما حقيقية لأننا خسرنا كتيير ونحن بنحسبا بطريقة مختلفة وكان عندنا اخطاء
الطبيعي ...فدان البرسيم بكل شغلو ولو اشتغلتو بالاليات الوريتكم ليها تكلفة فدان البرسيم بين 40الف الى 50 الف جنيه

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد