(اكتفي بنفسك) عبارة بتخليني شك أنو قائلها متّزن نفسياً وفطرياً. ما في إنسان سوي بيقدر يقدم لحاله الحب النقي العذب اللي بيقدر يقدملنا ياه وجود كيان آخر بحياتنا. الأُنس والسكينة واللجوء النفسي والحُب غير المشروط والحنان والسند، هدول كلياتن مهما حاولت تقدمن لحالك، حيضل في شي ناقص..
فينا نقدمن لحالنا، لكن ما رح يكونوا بنفس درجة الدفا الي رح نحس فيه وقت يقدملنا ياهن شخص أو أشخاص عقدنا عليهم حبال قلوبنا ومودتنا. الكلمة والنظرة والصمت والحضن وإظهار الضعف والاعتراف فيه بلا خجل كلها أمور نحن بحاجتها لنعيش حياة طبيعية وسويّة وصحية. حياة تعترف بالاحتياج البشري..
أنك تشارك إنجازاتك البسيطة قبل المهمة مع عزيز ويفرحلك كأنك اخترعت الذرة، ويفخر فيك وقت تحقق أقل القليل من أحلامك وطموحاتك، كلا شغلات ما فينك تكتفي فيها بقلبك وتقبرها بين ضلوعك. الفرحة بتتكاثر وبتدوم بالمشاركة، والهم بضل يتقلص لحتى يتلاشى تماماً وقت ينقسم على قلبين أو أكتر..
لا تحرقوا جسور وصول الآخر إلكم، لا تنخدعوا بفكرة التفرّد والاكتفاء الذاتي المبالغ فيه. اكتفوا بذواتكم وبالآخرين معاً، لا إفراط ولا تفريط. الناس اللي بتنصحك بالكتمان دوماً والغموض والانغلاق هن فعلياً سبب دمارك الداخلي وتصدّعك وسبب كل نوبات الوحدة والاكتئاب..
نحن منكبر ونتطور ونحيا بوجود مين يعيش معنا الحياة بكل تفاصيلا، وبوجود الناس اللي بتكون معن بسيط وخفيف ونقي وصادق بدون ما تحس بمثقال ذرة من إحراج أو خجل أو وجل مهما كان. الاهتمام واللطف والعناية واللهفة كلياتا مشاعر طيّبة، وجودها نعيم معجّل وغيابها جحيم معجّل..
لا تسمحوا لمنحرفي الفطرة يسلبوا منكم فرص لا تعوض لتكوين ذكريات تكون زاداً لكم ومعين على الحياة، أو تكوين علاقات حبلها ممتد من وإلى السماء، لا تقبلوا تعيشوا وحيدين وتموتوا وحيدين. فكرة وجود ناس تبكي عليكم وقت تغادروا هالحياة وتدعيلكن وتذكركم بالخير، أمر لا يقدر بكنوز الكون..
سلسلة التغريدات أعلاه برعاية فنجان السحلب السعيد الذي أعدته لي رؤاي @rora_oa بعد أن كنا نشاهد المطر ونتسامر ابتهاجاً به ونتأمل عرائش الياسمين الهندي وأغصان الحبق المتمايلة يمنة ويسرة جذلاً بما يتساقط عليها من قطرات، وحتى نبثّ الدفء في دواخلنا بعد أن كانت أجسادنا ترتجف برداً..
جاري تحميل الاقتراحات...