رتبها

الجزء الاخير من تلخيص كتاب العادات الذرية atomic habits.
كنت اتكلمت عن كيفية تكوين العادات الجيدة وكسر السيئة.. أتكلمت كمان عن قواعد تكوين العادات ووقفنا في الhabit stacking او رص العادات..
ثريد مهم وجميل وlife changing!❤️ تابعوه للأخير.. ولو ما قريت القبله، تابع التغريدات التحت.

القانون التاني في تكوين العادات هو, "خليها جذابة"make it attractive “
احنا عارفين انه الدوبامين مسؤول عن المتعة في حياتنا والإدمان, لكن هو ما بس مرتبط بي إحساسنا بالمتعة, جسمنا بفرزه كمان لما نتوقع المتعة.. التوقع دا هو البخلينا نعمل الفعل أو العادة..

طيب كيف ممكن نستغل النقطة دي في صالحنا؟ temptation bundling أو تجميع الإغراءات.
احتمالات انك تنظر لي فعل ما على انه جذاب بتكون أعلى اذا كنت عارف انك أول ما تعمله حتعمل بعده حاجة انت بتحبها وبتستمتع بيها.. على سبيل المثال انا بحب العاب الفيديو أو البلايستيشن شديد..

فبقول لي نفسي انه انا لو عايز العب بلايستيشن, لازم أقرا لمدة 45 دقيقة.
معادلة تجميع الإغراءات ورص العادات كالتالي:
بعد (العادة الحالية:عادة انت ملتزم بيها من زمان) حاعمل (العادة المحتاج أثبتها: عادة جديدة).
بعد (العادة المحتاج أثبتها) حاعمل (العادة البحب أعملها مثال: البلايستيشن

لو عايز تقلل إستخدامك لي تويتر حتكون المعادلة كالتالي.
بعد ما (اطلع التلفون: عادة قديمة) حاعمل (10 تمارين ضغط:عادة جديدة)
بعد ما (اعمل 10 تمارين ضغط) حا(ادخل تويتر:عادة بحب أعملها)
أيضا مهم جدا اننا نكون ملمين بأهمية العائلة والاصدقاء، "انت متوسط الاشخاص البتقضي وقتك معاهم"

احنا ما بنختار عاداتنا المعانا من زمان، احنا بنقلدها.. كل ما كنا قريبين من شخص معين كل ما زادت إحتمالات تقليدنا لعاداته.
فرصة انك تكون مفرط البدانة بتزيد بنسبة 57% اذا كان عندك صديق مفرط البدانة.. وعلى ضوء الفكرة دي،

واحدة من الحاجات المفيدة البتقدر تعملها وتساعدك في انك تكون عادات كويسة هي انك تنضم لمجموعة او بيئة، يكون السلوك العايز تكونه دا سلوك طبيعي بينهم.. يعني لو عايز تكون رياضي وبتمشي الجيم.. خليك حول ناس بحبو الجيم ورياضيين حتلقى انك متحمس اكتر للعادة دي.

القانون الثالث: خليها سهلة: make it easy
الناس دائما بتسال كم بياخد الواحد عشان يكون عادات جديدة؟ 3 اسابيع؟ شهر؟ متين حأنتهي من تكوين العادة الجديدة؟
العادات بتتكون بناءا على التكرار وليس بناءا على الزمن.
السؤال ليس عن كم أسبوع محتاج؟ لكن عن كم مرة عملتها ودا البيعمل..

مع الوقت الموضوع بيزيد سهولة ولكن مافي رقم سحري معين (بعيدا عن الكتاب دا في دراسات بتقول انه العدد السحري تقريبا 66 يوم. يعني لو عملت حاجة كل يوم لمدة 66 يوم ممكن تبقى عادة.. نرجع للكتاب) بدلا عن جعلنا للعادة مجاهدة للنفس وتعب، لمن نحاول نقلل الإحتكاك والصعوبة الحاجة حيزيد فرصنا.

عشان نعمل كدا لازم نقلل الاحتكاك والمقاومة في بالعادات الجيدة و ونزيد الاحتكاك والمقاومة المرتبطين بالعادات السيئة.. ارجع للبيئة المحيطة بيك، زيد احتمالات انك تمشي الجيم بي انك تشترك في جيم في طريقك للشغل او الجامعة بحيث انه ما تكسل انك تمشي بعد ما ترجع البيت وتاخد مشوار زيادة..

وجهز حاجات الرياضة الملابس والشنطة واي شي من اليوم القبله.. إذا عايز تعمل فطور صحي كل يوم من الليلة القبلها جهز المقادير والصحن وخليها في المطبخ بحيث انك اول ما تصحى تلاقي كل شي جاهز.. لانه كل ما زاد الاحتكاك والمجهود كل ما قلت فرص تكوين العادة.. والعكس صحيح..

وحقيقةً حتندهشوا لما تعرفو مقدار المقاومة البسيطة المحتاجين تعملوها عشان تكسروا العادات السيئة.. على سبيل المثال انا زي ما ذكرت بحب البلايستيشن وانتبهت اني بضيع فيه وقت كثير وكل ما اشوف يد البلايستيشن بلعب.. قمت اخدت يد البلايستيشن وختيتها في شنطة فوق الدولاب..

كل ما اكون عايز العب بتذكر اني محتاج اجيب طاولة واطلع فيها عشان انزل الشنطة وبكسل في الاخير.. لازم نفهم كمان انه لازم في البداية نركز على تثبيت العادة قبل ما نفكر في تطويرها.. عشان ما نتعب او نكسل بي اننا نزيد المقاومة ونطور فيها..

يعني في البداية خلي العادة انك تجري 10 دقائق كل يوم, مش ساعة.. بعد ما عادة الجري ل10 دقايق تصبح عادة ثابتة عندك, ممكن بعدها نزيد المدة بس مش من ثاني أسبوع في الفترة بتاعت مجاهدة النفس نزيدها..
لو عايز تقرا يومياً وقلت عايز اقرا كل يوم ساعتين حتحس الموضوع اصبح وظيفة/شغل او روتين..

الفكرة انك تحدد هدف ما يحسسك انه دا شغل اضافي.. وحدد نص ساعة بحيث انها تكون دائما عادة خفيفة عليك، إلي ان تصبح عادة ثابتة وبعدها ممكن نزيد.. القانون الرابع والاخير: خليها ممتعة: make it satisfying.
ما يُكافئ عليه يتكرر وما يُعاقَب عليه يُتفادى..

للأسف احنا بنشتغل في بيئة بتأجّل الفوائد واغلب النتائج العايزين نحققها غير ممتعة على المدى القصير. الرياضة على سبيل المثال ما بتحقق نتائج ملحوظة الا بعد شهور من التدريب المتواصل ودي فوائد مؤجلة. وك بشر، نحن بنفضل الافعال البتحقق لينا متعة سريعة ووقتية، وبنفضلها على لنتائج المؤجلة

ودي بتكوّن مشكلة لأن اغلب العادات السيئة بتدي متعة سريعة في الحاضر و اغلب العادات الجيدة بتدي متعة في المستقبل..
طيب كيف ممكن نستخدم البرمجة دي لي مصلحتنا؟
ببساطة، ضيف متعة فورية ومحفزات للعادات النتيجتها ومتعتها مؤجلة.. والعكس.. ضيف جزء من الألم للعادات السيئة المتعتها فورية.

المحفزات بتبدأ العادات، والشخصية الكوّنّاها بتحافظ عليها.. واحدة من الحاجات الممكن نعتبرها كحافز هي تسجيل العادات.. اعمل جدول كل يوم تعمل فيه العادة الجيدة او تتفادى فيه العادة السيئة تعمل صح كبيرة قدامه.. دا بخلينا نتحمس كل يوم نقرا كتاب او نتريض نعمل صح ✔️

وكل يوم ما نشرب مشروبات غازية نعمل علامة صح✔️.. مع الوقت حنكون عايزين نحافظ على سلسلة الانتصارات وما نقطعها وبنطلع بمتعة فورية من الموضوع.. تتبع وتسجيل العادات في calendar مثلاً بحقق لينا كل قواعد تكوين العادات.. حيخليها ظاهرة، جذابة وممتعة..

وبخلي تركيزنا على التجربة نفسها وليس النتيجة او المتعة النهائية.. طبعا في جانب سيء لتسجيل العادات انه حتديك احساس مجهود اضافي او خطوة اضافية وعشان نتفادى النقطة دي حاولو تسجلو العادة فورا بقدر الامكان بعد الانتهاء منها.

ونقطة مهمة تانية لازم تعرفوها.. إنه حيجي يوم وما حتقدروا تعملو العادة لاي سبب، ودا متوقع جدا ولكن المهم انه مهما كانت الاسباب ما تفشلوا يومين ورا بعض. عادي انه يوم تكون تعبان جدا ما تقدر تقرا قبل ما تنوم او تتريض..

لكن اعمل حسابك انه بكرة يوم جديد وحتتفادى الغلط السبَّب فشلك في المحافظة على سلسلة الانتصارات.. تفويت يوم واحد هو شي عرضي, لكن تفويت يومين هوبداية عادة جديدة.

بتمنى تكونوا استفدتو واستمتعتو بالملخص.. ريتويت وانسخ الرابط التحت حتلقو فيهو pdf ممكن تنسخوهو في الواتساب واي مكان تاني.. ونشوفكم قريب في ملخص كتاب who moved my cheese.❤️❤️
وشكرا لحسن قرائتكم??

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد