رتبها

بتكلم لكم عن اطلق فريق تطوعي سجلت فيه،
الفريق اسمه " فريق سين التطوعي "
@seen_KSA_

فالبداية كنت اعتقد ان الفرق التطوعية مضيعة للوقت ودائما ما كنت اتجاهلها، الين جا اليوم اللي شفت فيه تغريدة تطلب الانضمام للفريق لانهم بحاجة لفزعة .. دخلت بروفايل الفريق وعجبتني الفكرة بل وآمنت فيها .. آمنت فيها بمعنى حسيت ان الهدف سامي جدا فقررت انظم للفريق.

اتصال بظهر يوم من الايام،
سلام عليكم ابراهيم معاك فلانة من فريق سين التطوعي نحتاج فزعتك بنجيب اغراض من ايكيا،
وطبعا ابراهيم مداوم لكن حس الفزعة اشتغل وقررت انحاش من الدوام 😂😂.
رحت ايكيا واخذت الاغراض ورحت لموقع البيت ع اساس انزل الاغراض وارجع لدوامي قبل انقفط ..

ادق على البنت ما ترد وحسيت اني توهقت تاخرت عالدوام وما ابي يصيدوني،
شوي اتصال من البنت الو احنا سوينا حادث 😭😭!
كانت هذي اللحظة اللي قلت فيها " انا وش خلاني اتطوع 😭😂😂"
لحظات وبدا الفريق يجتمع كل ساعة ينضم شخص شخصين الى ان اكتملنا ٢٠ شخص وانخرطنا باعمال الفريق ..

ناس تركب هنا وناس تكسر وتنظف هناك ناس تصبغ وناس تصارخ وتوجه ..
ابراهيم يطالع الساعة لقى انه سحب عالدوام ولان العمل وقتها ممتع قلت لهم بروح البيت ابدل ثوبي واجيكم ..
اللحظة هذي ايقنت اني ما سحبت ع دوامي الا لامر جلل ، لحظات ورجعت معهم ..

الساعة اللي رحت ابدل فيها رجعت لقيت اشياء تركبت واشياء تغيرت ع طول تحمست اشتغل معهم ..
احب اوضح ان اغلب الفريق ما يعرف الثاني لكن سبحان الله فعل الخير جمعنا ..
عمل متواصل وجهد كبير يبذلونه الشباب والبنات وكلمات تبعث فالنفس الحماس وماهي الا لحظات الا والبيت اصبح بمنظر آخر ..

مستوعبين انه بيومين البيت تغير عن بكرة ابيه؟
ما كانت هذي اللحظة المفاجئة بالنسبة لي ..
شششبببااابب بببنننااتتتت يلللااا عععجججللللوو اههلل الببييييت بيججوونن !!!
هنا نبضات القلب بدت تتسارع والكل اصبح مهتم لعمله انه يكون منجز ومتقن وكانه يعمل لبيته ..

اللحظة الحاسمة وصول اهل البيت:
دخولهم وصفقات الفريق .. كلمة مديرة الفريق "حنا عيالكم وهذا بفضل الله وما لحد منة" فرحة الاهل .. بكاء الابناء .. دعوات الام وثناء الاب .. الفريق يتابع بصمت .. الشعور ما بين فرح باتمام الحالة ومشاعر جياشة بعد المساعدة!

من هذه اللحظة وبعد ما شفت الاثر العميق بعد ساعات معدودة لا اكثر وما حسيت اني بذلت مجهود كبير لكن فرحة الاهل وكانك قدمت جنة الدنيا لهم شي خلاني افكر كثثثثثثير قبل انام.

قررت بعدها اني ما اتخلف عن اي حالة وهذا الشيء حاصل مع جميع المتطوعين والمتطوعات اللي قابلتهم ، كل حالة تكون المشاعر مختلفة ، كل حالة رضا للنفس اكثر ، كل حالة وحنا واخوان واصحاب لبعض اكثر.

ابراهيم اللي كان انعزالي، غير اجتماعي، وقته كله نوم، صار شخص ثاني مع الفريق ، صرت احرص اني اروح عشان ارسم البسمة ، اروح عشان اقابل اصحابي الجدد وضحكتنا اللي تملا المكان 😂..
حتى صرنا نتقابل برا كثييييير وشغلنا الشاغل الفريق .. فعليا اشياء كثييير تغيرت فيني ..

بكون دائما وابدا فخور لنفسي اني كنت جزء بسييييط جدا بهذا الفريق العظيم 💛💛.
بقلبي كلام كثييييير لكن والله كلماتي تعجز اني اعبر لحبي وامتناني للفريق واعضاءه 💛💛.

@hashem_zahra قائدة الفريق اللي جمعتنا ، شكر عظيييييييم لك ، جزاك الله كل خير وكتب الله اجرك ووفقك في الدارين هذا اقل شي اقوله لك 💛.

بوريكم شغل الفريق البطل اللي كله شباب وبنات طلاب وموظفين بمختلف التخصصات بدون اي خبرة ، ب ١٢-١٨ ساعة بس لا اكثر 💛💛.