قالت الجدة: ما ضروري تعرف اي حاجة في الدنيا لأنو مرات الضي الزايد بيعمي ...
وقالت كمان إنو رب الخير كان عدلا زول بعوجا مافي ...
وانو حيلك كان كمل فرحمة ربك ما بتكمل ..
والدمعه غالبها بالصنقيع .... بس دنقر واجبرها تنزل لما تشحد فرج الكريم ....

والدنيا لو كترت عليك صارعها بالرضى ....واعرف انو المقسوم ليك ما بختاك ....و الصبر طيب بس حلاتو فى نارو والداير طعم العسل ما يخاف النحل ....
واعرف اقيف مع ناسك فى ساعة الحزن عشان فرحك يجيك وانت بتلاوى الضيق و الحزن ..

وقالت الجدة: القروش رايحة والسماحة مع العمر بتروح... إختار القلب والروح وأمسك بالعشرة وخليك لين فيها ..... وقالت زي ما البيوت بتتجير والقلوب بتتغير
ومافي داعي للفكي عشان الله في.
وقالت السر لو شالوا أكتر من نفرين مابيبقي سر ...وقالت حق الناس إن بقى شجرة ماتشيل منو صفقه ...

وقالت البعزك جد بخاف من نفسه عليك... وبشيلك في عيونه ....وقالت الريدة الحقيقية في السند في الزول البشيل همك ويقسم معاك وجعك..