رتبها

علاقة الإبتلاء بـ النجاح ...
شوف الـ Thread ..

ليونيل ميسي ..
----
بدأ مسيرته و هو ٣ سنين في نادي نيو أولد بويز في الأرجنتين .. جدته كانت هي اللي بتشجعه لحد ما توفت و بعدها قعد فترة ميروحش التدريب لحد ما أبوه أقنعه ان يلعب عشانها .. لحد ما وصل ميسي لـ ١٠ سنوات و هنا حصلت مشكلة كانت هتدمره

- المشكلة هي نقص هرمون النمو و بالتالي توقف النمو عنده .. فكان لازم يتعالج بإنه ياخد جرعة من هرمون النمو كل يوم علي مدار ٣ سنين ..اهله مقدروش علي تكاليف العلاج و اتعرض علي برشلونة و اعجبوا به كان كل يوم بياخد حقنه في رجله علي مدار ١٠٠٠ يوم لدرجة ان رجله مبقاش فيها مكان متشكش فيها

- فقد جزء كبير من موهبته نتيجة العلاج و بعدها بدأ يجاهد في التدريبات و يبذل فيها أقصي جهدة .. لدرجة إن أهله بيقولوا انه مكنش بيروح من الملعب الا للنوم .. لحد ما تم تصعيده للفريق الأول و بقا نجم الفريق .. ميسي في كل احتفال لازم يفتكر جدته اللي شجعته بانه يشاور للسما

- من يومين ميسي بيحقق الكرة الذهبية السادسة كأفضل لاعب في العالم .. ده غير ان ناس كتير بتصنفه كأحسن لاعب في تاريخ كرة القدم .. تحول من طفل مهدد بالعجز الا احسن لاعب في العالم

د/ عصام حجي
-----
حصل علي بكالوريوس علوم الفضاء .. و تم تعينه كمعيد براتب ضعيف .. بعدها قرر يبدأ الماجستير فراسل جامعه في فرنسا و اتقبل فيها .. و يشاء القدر انه يعتذر عنها بسبب الجيش ، بعدها ياخد اعفاء من الجيش و قرر يراسل جامعات تانية و في لحظة يأس راسل معهد باريس و وافقوا عليه

بعدها يخلص الدكتوراه و بعد ما كان مهدد لسبب الخدمة العسكرية انه يفقد حلمه و ييأس و يتحول من معيد بكلية العلوم الي واحد من علماء وكالة ناسا و يكون مشارك في اكتشاف المريخ

محمد صلاح ...
-----
ناشئ في نادي المقاولون العرب .. تم تصعيده للفريق الاول في ٢٠١٠ .. بعدها ممدوح عباس رئيس الزمالك يرفض يتعاقد معاه بسبب انه مينفعش يلعب للزمالك .. بعدها يجي له عرض من بازل السويسري و يسافر و يلعب

بعدها ربنا كرمه لحد ما وصل لليفربول و أخد احسن لاعب في الدوري الانجليزي و افريقيا مرتين .. و اترشح لأحسن لاعب في العالم و خد المركز الثالث .. و فاز بدوري ابطال اوروبا .. ابتلاء انه يترفض من نادي كبير في مصر كان متشال وراه كل ده ..

و غيرها و غيرها من قصص النجاح اللي كانت بسبب ابتلاءات و لولا الصبر عليها و السعي مكنش هيكون لهم وجود

- خلينا متفقين ان الحياة صعبه و مش سهلة .. كل انسان لازم يقابل الابتلاءت في رحلته في الحياة ، لكن اللي بيفرق من شخص لشخص هو رضاه بالابتلاء و صبره عليه و سعيه .. و شخص تاني جاحد و يشتكي ليه اشمعنا انا .. كلنا متشابهين في تعرضنا لإبتلاءات كتير في حياتنا ،لكن مختلفين في التعامل معها

- لو كان ميسي تعامل مع ابتلائه بنقص هرمون النمو باليأس و الجحود و مصبرش عليه ، هل كان هيروح برشلونة .. هل كان هيكون احسن لاعب في العالم ..
- لو محمد صلاح وقف حياته علي عرض الزمالك و انه ازاي يترفض او كان راح الزمالك.. هل هيكون هو محمد صلاح بتاع ليفربول .. ؟

- لو كان حد من الناجحين وقف حياته و بص علي مشهد سئ من حياته .. مستحيل كان هيكون ناجح أو وصل للي وصله دلوقتي .. لكن اما تبص علي المشهد كامل .. تعرض لصعوبات ايه و كسب قصادها ايه .. هتفهم إن المشاكل دي بتكون جايه عشان تغير اتجاه حياتك لحاجة أحسن ، لكن مش هتشوفها الا بعدها

- نتفق كمان علي ان صعب جِدّاً أن نُدرِك حكمة القَدَر و إحنا في داخل الحَدَث ، الألَم يمنعك من الإدراك الكامل لترابُط القِصّة ، لكن حينما ننفصِل عن الحَدَث بعد فترة...تبدأ الرؤية في الوضوح لِمَن لديه عقل .. لكن هناك من يكون علي يقين انه برغم الالم سيكون سبب للخير فيما بعد

- الناس اللي بتتعامل مع ابتلائها بـ [ فَأَرَدْنَا أَنْ يُبْدِلَهُمَا رَبُّهُمَا خَيْرًا مِنْهُ ] هي الناس اللي بتقدر تصبر و اللي فعلا ده هيكون خير لها فيما بعد .. لكن اللي بيجحد و يشتكي هيفضل يشتكي و هيعاني في حياته لحد ما ربنا يكرمه و برضو يجحد علي ده

- الطبيعي عشان تنجح في الحياة الصعبة دي .. لازم تسعى و تجتهد .. لكن مع السعي تكون عارف حقيقة مهمة و هي ان كل واحد له وقت و ان الحياة خاضعة لقانون المحاولة .. انك متيأسش عشان وقتك لسه مجاش و لا إنك تقارن نفسك بحد

- قانون السعي و المحاولة بيقولك ان الأسد بينجح في ٢٥٪ من محاولات صيده ، معظم الأمطار بتسقط في المحيطات ، معظم بيوض الأسماك بيتم إلتهام و تدمير معظمها ، ملايين الحيوانات المنوية بتموت و بيصل واحد بس لتخصيب البويضة ، الطبيعة بتمشي بقانون المحاولة و عدم اليأس

- مع احترامي .. لكن مفيش حاجة هتجيلك و أنت قاعد بدون سعي .. و ٩٥٪ من الحاجات مش هتجيلك من اول مرة .. و ٨٠٪ من اللي عايزه مش هيجي من تاني مرة و ٥٠٪ من اللي عايزه مش هيجي بعد ٣ مرة .. كل ما تسعي اكتر كل ما فرصك كانت ازيد

- أبرز دليل علي إنك رزقك هتاخده في وقته ، هو [ أوباما ] اللي فاز برئاسة أمريكا و هو عنده ٤٧ سنة ، و [ ترامب ] اللي فاز بالرئاسة و هو عنده ٧٠ سنة ، بعد كذا محاولة للترشح لكنه كان بيخسر ..

- متقارنش نفسك بحد ، و حط في دماغك و اعرف ان [ كل شخص بـ يجري في سباقه الخاص و زمنه الخاص ، لهم توقيتهم و لك توقيتك .. فـ أنت مش متأخر .. ولا أنت سابق .. لكنك في زمنك المناسب و الخاص بك .. أنت تعمل في [ توقيتك ] الذي وقّته الله لك .. فـ أعمل في [ توقيتك ] و بس.. ]

- و اعرف انك عشان تحقق حاجة لازم تصبر علي اللي هيقابلك و تسعى و تجتهد عشان تحقق اللي انت عايزه .. لكن مفيش حاجة هتجيلك بدون سعى لها .. السعي لله اولاً و من بعده السعي للدنيا

- و اعرف انك تبقي غبي لو بصيت علي مشهد واحد من حياتك و وقفت حياتك عليه و حكمت انه شر لك ، لكن لما تبص علي مشاهد حياتك كلها هتعرف ان المشاهد السيئة كانت سبب في التغيير لمسار افضل .. العاصفة مش بيكون سببها الدمار لكن سببها تغيير مسارك

- و مستحيل تعرف تحكم علي المسار ده الا بعد نهايته .. فمتحكمش علي الابتلاء انه شر في بداية المسار لانك لسه في البداية .. و احنا في بداية حياتنا فالطبيعي و المنطقي ان لازم نتعرض لصعوبات و ابتلاءات و نجاهد و نعافر عشان نعديهم .. كله خير لك و كل واحد له وقته ✅

- متنساش تعمل لايك لـ بيدج الفيسبوك : facebook.com
- لو عندك أي Feedback إبعته هنا : curiouscat.me
- - - -
⭕️ تقييمك للـ Thread ؟ ⭕️

curiouscat.me/Bluurr11

facebook.com/bluurr11/

هو ثريد عشوائي شوية بس ده كلام كان جوايا حبيت اقوله

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد