تجربة قصيرة في المستشفيات امبارح والليلة علموني حاجات:
1. بمجرد انك لقيت غرفة عناية مكثفة في السودان لو -لا قدر الله- احتجتها، انت حرفياً اتكتب ليك عمر جديد
2. التبرع بالدم أهميته أكبر مما بتتخيل، كمية ناس مهولة محتاجين عمليات مستعجلة ومرات بيتوفوا لانه بنوك الدم ما فيها متبرعين

3. الأدوية: المستشفيات عندنا بتوفر ليك ضل وموية وحيط ما بتتلصق فيها البكتيريا لو بقيت محظوظ. أي حاجة تانية اتوقع يتطلب منك تركب الزلط وتفتشها براك. في العادة كنت حاقول ليك ما تلف كتير واكسب زمنك امشي الامدادات الطبية لكن حتى دي مافيها كل حاجة
فااا بس تقول يا لطيف تجيبو خفيف

لما الامور تكون تمام -وان شاء الله دائماً تكون تمام- الكلام دا ونسة زابطة ومادة كويسة لشتيمة السودان والكيزان إلخ.. لكن لما يحصل طارئ بالجد، التفاصيل دي بتبقى مسألة حياة أو موت فخليك جاهز

لحد ما القطاع الصحي يتعافى، شغل كتير شايلينه الناشطين الاجتماعيبن والدكاترة والصيادلة بمجهوداتهم الخاصة.. لو بتعرفوا أي مجموعة بتقدم دعم أو مشورة لتوفير الدواء، غرف العناية إلخ.. نزلوه في هاشتاق #عناية_مكثفة_في_السودان
مــــــــا تستهون بأي مجهود مهما كان بسيط

4. ابعدوا من الكورولات يا اخوانا.. بتاع الكورولا الطليق في الشارع أخطر على الصحة من ندرة الأدوية وجشع الشركات والتشخيص الخاطئ مجتمعين ?