شوية معلومات سريعة عن مرض السرطان، أول حاجة لازم الناس تعرفها، السرطان مش مرض واحد و لا له سبب واحد و لحد دلوقتي ملهوش علاج واحد و غالبا مش هيبقاله
أقدم تسجيل للسرطان كان في عهد الفراعنة، في البردية المشهورة باسم بردية إدوين سميث، و فيه لقطات كتيرة عبر التاريخ فيها تسجيل للمرض ده، لكن سبب انتشار خطورته و الكلام في القرنين الأخيرين هو إن الرعاية الصحية تطورت فالأمراض الخطيرة اللي كانت بتموت الانسان بدري بقت أقل خطورة و سمح ده
للسرطان إنه يظهر على الساحة كأخطر أمراض العصر، لأن تقدم السرطان بطيء جدا و فرص ظهوره في السن الكبير أكتر بكتير من السن الصغير، و سبب إنتشار السرطان الفترة اللي فاتت في السن الصغير هو التراكم المخيف لمسببات السرطان في حياتنا اليومية
مسببات السرطان ممكن تكون فيزيائية زي الإشعاع، كيميائية زي السجاير أو مواد حفظ اللحوم المصنعة، أو حتى بيولوجية زي الفيروسات و اللي اشهرها فيروس ابستين بار المتسبب الرئيسي في سرطان عنق الرحم على قدر ذاكرتي
جميع انواع السرطان بتتشابه في إنها نمو غير طبيعي للخلايا غير قادر على التوقف و عنده قدرة رهيبة على الانتشار و التنقل و بتختلف في طبيعة المرض اللي بتسببه و نوع الخلايا و طرق و بروتوكولات العلاج
علاج السرطان بدأ بالجراحة و استئصال الورم و ده فضل الأسلوب السائد لما يقرب من 100 سنة و اللي كان بيوصل لجراحات مدمرة لجسم الانسان علشان ضمان عدم تكرار عودة الاصابة بالسرطان، العلاج الكيميائي بدأ من اربعينات أو خمسينيات القرن الماضي (اللي هو القرن العشرين لو لسه مش واخدين بالكم?)
العلاج الكيميائي عموما بيستهدف إيجاد مواد ذات سمية عالية لكن تكون أكثر سمية للخلايا السرطانية من الخلايا العادية، و ده سبب معظم الأثار الجانبية لأن الخلايا السرطانية هي خلايا عادية لكن شديدة الانقسام، و بالتالي السم اللي هيأثر فيها لازم هيأثر على الخلايا الطبيعية
فيه دايما تطورات لتحسين ده، و فيه تطوير دائم لإيجاد تكنولوجيات كيميائية و فيزيائية جديدة لتحقيق المعادلة ديه، لكن مع ذلك فالتطورات ديه مش كافية لحد دلوقتي
فهم طبيعة السرطان ابتدا يصل لدرجات عالية بس بداية من تمانينات القرن الماضي، و بالتالي تطوير علاجات ممكن تساهم بشكل فعال اكتر و باعراض جانبية أقل نتيجة للفهم ده، ده ابتدى يحصل في خلال ال15- 20 سنة اللي فاتوا بس، فإحنا لسه في بداية الطريق نحو إيجاد "علاجات" فعالة لمرض السرطان
أحد الأسباب المذهلة لتأخر بدايتنا نحو طريق أكثر فعالية لعاج السرطان هو الغرور البشري اللي كان متصور إنه فهم السرطان، و كان التصور إنه مرض واحد بعلاج واحد فكان تركيز الابحاث على إيجاد العلاج اكتر من محاولة فهم طبيعة المرض بشكل أكتر كفاءة
أحد الاسباب التانية هو البحث عن الربحية فكان التركيز على الابحاث "المتصور" إن فرص إيجاد علاج أكثر فعالية (ربحية اكتر) فيها كبير و البعد عن الطرق اللي فرص إيجاد علاج فعال فيها أقل، لو حطيت ده جنب السبب السابق (عدم معرفة كل جوانب المرض) فهتفهم إن أصلا الطريق لإيجاد علاج فعال
مكانش واضح قوي و بالتالي فيه إحتمالات إنك تهمل ابحاث تؤدي لعلاج فعال و تركز في ابحاث بلا طائل و لولا إصرار بعض العلماء على المضي في طرق كان متصور إنها بدون فايدة مكانش بقى عندنا علاجات متخصصة زي الهيرسيبتن و التاموكسيفين، الأول علاج مناعي و التاني علاج هرموني
الاتنين علاجات مساعدة و ممكن يبقوا علاج بديل للكيميائي في بعض الأحيان و ده فتح أبواب جديدة للعلاج مكنتش متصورة و أدتنا في نفس الوقت فهم أفضل للسرطان
و حاليا في تطور كبير في العلاجات المناعية و الجينية ممكن يعمل خلال العشر سنين الجاية نقلات نوعية في العلاج، الحقيقة الأبحاث الحالية مبشرة بس محتاجين نبقى حذرين في التفاؤل
التراكم و التاريخ في العلم مهمين جدا علشان نعرف نوصل لتطورات حقيقية في المستقبل، علشان كده لما تسمع حد بيحاول يرجعك لما قبل التراكم ده و إن السرطان مرض واحد و له علاج واحد أيا كان إيه فلازم تعرف إنه كلام فارغ و إنه نصب غالبا و لعب بمشاعر المرضى و آمالهم
من فترة لقيت بوست عن علاج جديد متوافق عليه من الFDA و إنه العلاج السحري و النهائي لمرض السرطان، الحقيقة كان لازم ادور لأني عارف إن الكلما ده كلام فارغ، و برغم إن المعلومة حقيقة و إن علاج الVitrakvi علاج حقيقي فعلا إلا إن التفاصيل كلها كانت كلام فارغ، هو مش علاج نهائي للسرطان
لأن مفيش حاجة اسمها كده، لكنه تطور جديد في طرق العلاج و هيفتح أبواب جديدة للعلاج، هو علاج بيستهدف تسلسلات جينية خاصة ببعض انواع السرطانات ، و هو تاني علاج يتوافق عليه من النوعية ديه لكنه أكثر فعالية و فرصة كبيرة لبعض مرضى السرطان و مبشر كويس بالمستقبل
فإذا كانت المعلومات الخاطئة و الآمال الزائفة ممكن توصل للدرجة ديه مع علاج حقيقي، فما بالك مع العلاجات الغير حقيقية و المستندة على أفكار ملهاش علاقة بالمرض و طبيعته و إستنادها كله على نظريات مؤامرة خزعبيلة وهمية و كلها نصب و متاجرة بالمرضى بتوصل لحد التسبب في موتهم
الجهل في كل الأحوال وحش، لكن الجهل في حالة مرض زي السرطان ممكن يبقى قاتل فعلا خصوصا مع انتشار النصابين و الدجالين اللي بيتاجروا بمشاعر و آمال المرضى مش بس لأسباب التكسب من المتاجرة ديه،ده ممكن يبقى لسبب تافه
جدا زي إنه عايز الناس تتكلم عنه أو يعمل نفسه بيفهم دونا عن باقي الناس
جدا زي إنه عايز الناس تتكلم عنه أو يعمل نفسه بيفهم دونا عن باقي الناس
و ديه درجة من الإجرام عصية على استيعابي، إنك تتسبب في موت حد فقط علشان تدعم الإيجو بتاعك، مرة تانية الجهل قاتل فحاول تبعد عن الطريق ده و متسلمش دماغك لأي حد، دور و افهم و اسأل المتخصصين، شكرا و آسف على الإطالة
جاري تحميل الاقتراحات...