السياسة
التصوير الفوتوغرافي
وثائقي
الثورة
النشاط الاجتماعي
الحركات الاجتماعية
التعليق السياسي
تمكين الشباب
مرت على الصورة دي ٣٤٠ يوم لكن اليوم اقف بكل افخر و اعتز بي انو دي وحدة من اجمل الصور الصورتها في مسيرتي المهنية في مجال التصوير بالرغم من انها مصورة بي تلفون و في حال لا يحسد عليها صورة اختصرت وعي و توجه جيل كامل قام بثورة قالو عليها ثورة شواذ و عاهرات اختصر ليكم القصة ????
كجزء من ايمان الشباب بروح الثورة و اصرارها على المشاركة و لو بشئ بسيط تجاهها اتفقنا مجموعة مصورين و مصممين على توثيق اول موكب مسيّر من التجمع داخل ولاية الخرطوم يوم ٢٥ ديسمبر ٢٠١٨م تحت اسم "صفرجت" @safrjat
#موكب_٢٥ديسمبر
#موكب_٢٥ديسمبر
كأول موكب نطلعو في ثورة ديسمبر المجيدة ما كان عندنا تجربة ثورية كافية اتحرك الموكب الساعة ١ من شارع القصر شمال فندق رجنسي كنا بنحاول نختار اعلى زوايا عشان نغطي اكبر مساحة للموكب و للاسف من اول دقائق اتقمع الموكب لكن حماس الشباب و الشابات كان عالي و كل ما يتفرقو يرجعو من جديد
بعد مرور ساعة و نص بدأ فض الموكب من شارع القصر باستخدام البمبان و الرصاص الحي امام صدور المتظاهرين العُزّل و اتفرفت الناس داخل الشوارع الداخلية للسوق العربي هنا قررنا نغطي الموكب من الداخل و فجأة نسمع صوت رصاص حي جرينا و لحسن الحظ كان جمبنا (قراش) عربات حكومية
كمية كبيرة من الناس دخلت بدون ما نعرف ممكن نمشي وين و فجأة نلقى الطريق مسدود بدت الناس تتلب من فوق العربات لسطوح البيوت و الكل نفسي نفسي لفت انتباهي شاب انحنى و قدّم جسدو كبش فداء لكل شابة كبوابة عبور لما وراء (القرّاش) انحنى و لكن لم يزده الانحناء إلا إستقامة
و من هنا كما يقال نزلنا من شارع الزلط و ركبنا الردمية فجأة لقينا روحنا بنتلب من سطوح بيت للتاني
و هنا ظهر (سودان مان) للمرة التانية ساعد اي شابة عشان تقطع الطريق من سطوح لي سطوح ، عدد الناس كان كبير و الهلع مسيطر و الموقع محاصر ، و فجأة المكان كلو اتكتم بمبان و عينك ما تشوف الا النور
اتحاصر المكان من قِبل عناصر جهاز الأمن و بقى ما بي يدنا حاجة الا نتلب ، تلبنا حوالي ١٥ نفر من الطابق التاني في حوش و بدينا ندق في الابواب لحدي ما ود حلال فتح لينا الباب و بقينا مزنوقين في اوضة ٢x٤ لمن نسمع صوت ابوات المرتزقة ديل في الحوش قلوبنا بتوقف
طلع واحد كشف المنطقة و طلعنا بحالة يرثى عليها حفاية بناطلينا مقطعة اي زول في الشارع بعاين لينا بي طرف عينو ديل متظاهرين شماسة ساي ، اتذكر اي صاحب دكان اقول ليهو اديني سفجنة يقول لي ما عندي و انا شايفها قدامي في الرف عرفت ليه البشير حكمنا ٣٠ سنة
#
#
بالرغم من أن المرأة السودانية قوبلت خلال ٣٠ سنة ماضية بكل انواع التهميش ثم التعدي و الانتهاك لكل حقوقها تحت مسمى قانون النظام العام الا انها كانت الام العاطفة و الاخت الناصحة و الإبنة البارة للثورة و قدمت الغالي و الرخيص لهذا الوطن
فلتعلم دكتور عبدالله حمدوك أنك قد وليت علينا ولست بخيرنا فإن أحسنت أعناك وإن أسأت قومناك ، ان الشعب السوداني بشقيه قد تحمّل فظائع تطبيق قانون النظام العام و جميع القوانين المقيدة للحريات و أن أمثال هؤلاء
الشباب لم تنحني ظهورهم إلا ليستقيم الوطن كما قدم زمرة من فلذات كبد هذا الشعب دمائهم رخيصة للوطن ليس من اجل لقمة العيش فقط بل من اجل نيل الكرامة في اوطانهم تاركين لكم تركة ثقيلة و اعلم اننا كما تساعدنا من قبلكم سنتساعد معكم من أجل العبور فوق خطوط النار و إطفائها سوياً
- عثمان فزع
- عثمان فزع
جاري تحميل الاقتراحات...