لي شهرين ما حلقت وبما إني مطفر رحت خذيت من اخوي فلوس وما كان معه الا ٢٠ ريال ف يعطيه العافية العىد ما يقصر معي فديته وللأسف دخلت مع شارع بالغلط وأنا رايح للحلاق وضعت بين الحواري إلا وفجأة اشوف قدامي محل حلاقة
قلت يلا مالي خلق اكمل حوستي خلني احلق عنده وليتني ما حلقت ... دخلت عليهم وشفت شلة الباكستانية قاعدين وأنا احسبهم زباين طلعوا هم الحلاقين وبعد السلام جاء قعدني عالكرسي قال لي "ايش ابغى حلّق مودير؟؟"
قلت له حلق دقن وشعر ... واحلفلكم بالله لو تشوفون مسكته للجلي وضغطته بالكرتون تقولون هذا بنّاي ولا إنه مليّص بس اللي متأكد منه إن فيزته مب فيزا حلاق
المهم إنه قام يفرك في وجهي لين وصل لجبهتي وعقبها طلع الموس وقام يحلّق ... طريقته فالحلاقة جدًا مميزة ما قد شفتها الا يوم جبنا مقاول يلمع بلاط البيت
وقام يحك ويحك جلدي لين ما سمعت بشرتي تقعد تصيح والحمدلله خلص وفكي موجود في قشّه بالموس وبما إني متعود عالأتراك جيت قلت له مافي تنعيم؟ قال الا مودير قلت يلا وما دريت الا جايب المكينة بيكمل على بشرتي وبغى يطير رموشي ابن الكلب بس الحمدلله لحقت عليه وبعدت وجهي
جيت قلت يابن الحلال مكينة تنعيم مب حلاقة قال اوك مودير ... للي ما يدري انا عندي قطعة قزاز في وجهي من حادث قبل ٥ سنين واحب ابشركم ان الحلاق ما قصر وطحنها الله لا يعطيه العافية الظاهر عندي نزيف داخلي الحين
والحمدلله ما بغى يخلص من وجهي الا وجاء وقال لي "كيف حلاقة شعر مودير؟" قلت هنا مكينة وفوق تخفيف وقام يشيل الشعر بالمكينة جيت قلت له مب لازم تمسك الشعر اللي فوق عشان ما تشيله بالغلط؟؟ قال مافي مشكلة مودير انا معلوم كل شي ... قلت عز الله انك معلوم كل شي الا الحلاقة
ويوم خلص من تحديد المكينة جاء قال لي "ابغى خط زي كرستيانو" وانا وجهي كان ? ... قلت لا لا كرستيانو كافر وحرام التشبه بالكفار ايه كل شي الا الدين "طبعاً اخوكم بالله محلق قزع" جاء قال اوك
يوم خلص من الحلاقة قال "مودير ابغى اسكصاحذمايمر" قلت ايش؟ قال نسحبتيتكي ... قلت هذا وشو؟ قال هذا خلي شعر سيدا مية مية قلت يلا يلا سوي اهم شي لا تزعل علينا وما دريت الا ويطلع ذاك الصندوق واحلفلكم بالله ان الجلي اللي كان داخله ما شفته الا مرة وحده وكان مع راعي البوية اللي صبغ بيتنا
ويطلع لك ذيك الفرشة اللي ما تلقاها الا عند بويات الجزيرة وقام يدهن في شعري ويدهن ويدهن ويقعد يمشط لعشر دقايق بالتمام ... انا راسي تعب ويده ما تعبت بسم الله ما شاء الله
بس تحتسب له ان عطاني شاور وقام يفرك راسي وقتها حسيت بالحنان ? ... ويوم خلصت ونشف راسي الا وطلعت كأني من سوالب القصيم واعطيها فره مع عــبُّودي بالهلي عند دوار بريدة ... وقام يستشور شعري ويمشط ويوم خلص قلت له كم حسابك مودير؟
طبعاً انا مستانس بشعري الناعم صح انه راسي طالع مربع بس اهم شي الشعر الناعم ... جيت قلت له كم حسابك؟ قال ٤٥ قلت ههههههه الله يقطع سواليفك والله وصرت تمون يلا بسرعة كم حسابك مستعجل قال ٤٥ !!!! قلت هييييه انا منحاش من التركي عشانك ارخص يابن ال ****
قال حلاقة دقن و شعر ب ٢٠ و جصابايختي ب ٢٥ ... قلت يابو ذا اللي ما تعرف تنطق اسمه اغلى من حلاقني؟؟؟؟ قال هذا سعر مودير وشف اي حلاق ثاني، طبعاً ما احكيلكم عن وجهي وقتها منخرش منه وبرضو خايف يحط ال جصتبتيخثي في مك*** لو هاوشته
جيت قلت له شوف يا مودير انا مسكين ما معي الا ٢٠ ريال وطفران ويناظرني ذيك النظرة وقال "خلاص روح بس جب باقي فلوس بعدين" قلت ابشششر يا مودير وما صدقت على الله انحاش منه ويلا الحين ماسك الطريق عشان عيال القصيم يخقون على شعري الناعم ?
جاري تحميل الاقتراحات...