نعمل بقه الثرد اللي هيخسرنا الجميع ?
عمري ما عديت انا محجبه من اد ايه بس اه كان فيه كلام اني لازم اتحجب بس انا اللي اتحجبت لوحدي في اولى اعدادي ، كنت واخده هديه الصيف اللي قبله خمار صغير لما حفظت جزئين قرآن . لبسه اول يوم دراسه . بعدها بسنه فكرت بإستحياء كده اشيله لكن بابا قالي الناس هتقول عليكي ايه ، ما قاليش
ما تقلعيهوش ، كان ذكي جداً الله يرحمه لكن رمى الطوبه في ملعبي ، قلت ايه ده هبقه عيله لأ . بعدها اصلا الموضوع ماجاش في بالي لغاية ما نجحت مره في امتحان و كان مفروض اروح القاهره في مكان مشهور لكن ما حصلش و سمعت انهم ما بياخدوش محجبات . بعدها كملت عادي و الفكره ماجتش على بالي اصلاً
مرت سنين و ناس اصحابي بيشولوه و انا بستغربهم ، ايه اللي بيقولوه ده و ايه الحريه اللي بيتكلموا عنها ، مش مقتنعه اصلاً . بعد ما بابا اتوفي سنة 2018 جه وقت قعدت مع نفسي و بدأت اقرا و اقرا كتير لغاية ما اقتنعت اني مش عايزه البسه تاني ، بدأت فعلاً اتخنق منه و اشيله لما اسافر ، و بدء
قرايبي يكلموني و يحاولوا يقنعوني انه لازم ما يتشالش و انك لازم تقنعي مامتك الاول ما ينفعش تزعليها و اصبري ، بعدين بدء الكلام ان اصحابك هما الصحبه السيئه .كنت نزلت صور هنا ليا قريبتي بعتتلي تقولي دي مش انتي رجعيلي قريبتي تاني ، و الموضوع بقه درامي جداً مع ان قريبتي دي كانت لبست
النقاب و مش كتير كانوا موافقينها بس انا كنت محترمه قرارها جداً . بدأت احال اقنع و الوضع كان صعب ، خدت القرار و نزلت من غيره و اما رجعت غيرت صورة البروفايل في الفيس بوك للصوره دي و بعدها عينك ما تشوف الا النور
كمية ادعية و استنكار رهيبه ، واحده قريبتي بعتتلي تعليق ان لله و انا اليه راجعون ، واحده تانيه انا ساعدتها ترجع لجوزها بعد ما كانت سايبه بيتها بعتتلي تقول لاحول و لا قوة الا بالله ، الناس اللي ما شافوش مني اي اذى مسحوا كل ده بأستيكه ، ناس ماعرفاش شخصياً بعتولي دي ام ينصحوني
غير بقه الكلام في البيت ، شكلك وحش ، انتي الحجاب احلى ، كل ده لحد الوقتي ضغط يحتمل يعدي يومين و هيتعودوا و ينسوا ، لكن على مين ندور وراها بقه اه بتتكلم عن سبينوزا يبقى الحدت و لازم نلحقها
ما هو اي حد ممكن يفكر في ربنا بطريقه مختلفه او يحبه و يعبده و يصليله من غير خوف يبقى اكيد الحد و ابتدت الزيارات العائليه اللي مش جايه تشوف انا الحدت و لا لأ تتأكد زي ما الآيه بتقول 'ان جاءكم فاسق بنبإ فتبينوا' لأ كانوا جايين يحاكموني و القرار اصلاً في جيبهم ، و اهم حاجه شلتي
الحجاب ليه،يالا نروح مشيخة الازهر نسأل و تتحبسي في البيت لغاية ما ترجعي لعقلك و مش عايزه ترجعي نكلم اعمامك بقه ييجوا يتصرفوا معاكي،و الدنيا اتقلبت و انا كل يوم بقول يا رب يكون آخر يوم ،و كل اللي عنده كلمه يقولها هتخسرب اهلك ،هتموتي امك ، علي اساس ان انا اللي قلتلها بنتك الحدت ?
و الكل بيتدخل في حياتك بتصلي ? بتقري قرآن ، و هكذا ، قفلت تويتر و الفيس بوك ، بعدها هما تلت تيام و فكيت الحظر و نزلت ، طبعاً اما رجعت افلام تانيه ، و تعب و ضغط عصبي ، لكن برضو نزلت تاني كورساتي ، طولت كتير قوي لكن الموضوع لسه مش مستسيغينه مع ان مابقاش فيه كلام كتير بس بدؤوا
يتأقلموا ، طبعاً المحنه دي وريني حاجات كتير من ناس عارفاهم من زمان و طلعوا ينضفوا نفسهم على حسابي ، و ناس تانيه ماعرفهمش من زمان سألوا عني و وقفوا جنبي اروي و هوبا و نور سألوا عليا لما اختفيت هنا مع ان ساعتها ما كانش حد فيهم عاملي فولو او عارفني شخصياً ، هند و تختخ و منه وقفوا
جنبي، الخال و عصام و بيانو و كوستا سألوا و اتطمنوا ، سارو كنت بكلمها و انا مرعوبه و بعيط و كانت بتطمني و تشجعني اعز صحباتي جوزها قالها تقطع علاقتها بيا و ما رضتش ،اعز اصحابي كانوا بيكلموني من امريكا و تركيا و يطمننوني يا رب ما كونش نسيت حد عشان دول جميلهم و وقفتهم جنبي ف رقبتي
انا مع حرية كل واحده في انها تلبس اللي يريحها و مقتنعه بيه ، لكن ماحدش بيقف جنب اي واحده تشيل الحجاب و الموضوع بيكبر جداً جداً و الاتهامات بتترمى زي الرز كلها تسوء سمعه و تقتل نفسياً قبل جسدياً .
اوبس نسيت شوكس و اشرف ربنا يباركلهم ، فعلا المحن بتوريك الصحاب اللي بجد ، اتمني كل واحد يهتم بعلاقته بربنا لوحده ما يدخلش في علاقة الناس بربهم
و طبعاً نسيت حنان عزت ، حنه اللي من اول الناس الي بعتلها و قالتلي انها عمرها ما بتحكم ع الناس و ان انا صحبتها اياً كان شكلي ،ربنا يسعدك يا رب حبيبتي ، و على فكره الثريد ده و لا تبرير و لا اعلان اني شلت الحجاب ، فاللي بيفكروا بالشكل ده ياريت يسكيبوا الثرد او يعملوله ميوت
جاري تحميل الاقتراحات...