رتبها

بمناسبة الفيضانات الحالية في ڤينيسيا كنت عاوز احكيلكم شوية عن كنيسة سان مارك الشهيرة هناك…وهاقولكم بعد شوية ليه انا مهتم بيها وقريت عنها كتير جداً رغم اني للاسف مازرتهاش…واحدة من أغنى الكنائس …ومن احلى نماذج العمارة الإيطالو-بيزنطي في العالم…

بيسموها كنيسة الذهب Chiesa d'Oro من كتر الموزايك/الفسيفساء الذهب اللي مغطي اغلبها من الداخل…مش بس كدا دا بيتقال كمان من كتر بلاطات الذهب اللي فيها ان الهواء اللي جواها مشبع بذرات الذهب فعلا…عموما هي كنيسة نجح حكام فينيسيا القدماء في إظهار مدى رخاء وعظمة وثراء عهدهم فيها… *

حكام ڤينيسيا من سنة 726 لحد 1797 كان لهم لقب وهو Doge of Venice… الكنيسة نفسها أمر بإنشائها الحاكم سنة 828 (نفتكر التاريخ دا كويس) علشان تكون ملحقة بقصره وتكون خاصة به وكان كل حاكم يجيي بعده يكبر ويزود جزء او تمثال الخ المهم زي ماقلنا يبين ويثبت عظمة المدينة والعهد بتاع الحاكم…

طبعا حدث ولا حرج عن عظمة التماثيل والرسومات اللي بتحتويها الكنيسة من أول التمثال الشهير للقديس مارك (اللي سميت الكنيسة تيمناً باسمه والقبر بتاعه جواها) وتحت تمثال سان مارك فيه شعار القديس مارك(هو نفسه شعار المدينة)اللي هو الأسد المجنح ودا من الذهب الخالص برضه في واجهة الكنيسة…**

تحت الأسد المجنح في شرفة فوق الباب الرئيسي هاتلاقي واحدة من عجائب التحف في التاريخ وأطرفهم قصصاً…أربع أحصنة نحاس غاية في الجمال والروعة اسمهم الأحصنة البرونز بالمناسبة بس هم نحاس?دول بقى اتعملوا في القرن التاني او التالت ميلادي وكانو بيجروا عربية وراهم بتاعة الرومان المشهورة…

وكانوا معروضين لحد سنة 1204م. في مكان مشهور قوي اللي هو ميدان السباق في القسطنطينية (اللي هي إسطنبول حاليا) وقتها كانت عاصمة الإمبراطورية الرومانية لحد 395م وبعدها بقت عاصمة الإمبراطورية البيزنطية لحد ما جيوش فينيسيا المشاركة في الحملة الصليبية الرابعة ما احتلتها سنة 1204م.

الدوج بتاع فينيسيا "إنريكو داندولو" أمر بنقل الأحصنة (بالبحر طبعا) للكنيسة في فينيسيا واضطر المسئول عن النقل انه يقطع رقاب الأحصنة ولحمهم تاني بعد مانقلهم فينيسيا…طبعا الأطواق اللي في رقبتها دي اتضافت علشان تغطي القطع واللحام…في ناس بتشكك في قصة القطع دي عموما…

فضلوا معروضين في بلكونة الكنيسة لحد الأخ نابليون بونابارت ما احتل فينيسيا ونقلهم لباريس سنة 1797 وانهى حكم ال Doges بتوع فينيسيا…عمل بيهم ايه بقى نابليون؟ صمم قوس نصر صغير على قده اسمه Arc de Triomphe du Carrousel وحط الأحصنة فوق منه…(نخلي بالنا دا غير قوس النصر الكبير)

سنة 1815 بعد معركة ووترلو الشهيرة فرنسا سلمت الأحصنة للإمبراطورية النمساوية اللي ضمت ڤينيسيا ليها فالوقت دا ورجعت الأحصنة تاني للكنيسة وتقريبا سنة 1980 الحكومة الإيطالية دخلت التماثيل جوة الكنيسة علشان كانوا اتمرمطوا كفاية والجو بهدلهم وعرضت مكانهم نسخة منهم اللي هي موجودة حاليا

نرجع بقى للقديس مارك ونتكلم عنه شوية…بداية كدا هأقوللكم ليه انا اهتميت بالكنيسة دي اصلاً…وانا شاب غر ويافع كدا كنت اسمع أسامي ومصطلحات مسيحية انا كمسلم ماكنتش فاهمها ولا عارف اصلها ولا فصلها ولا علاقتها ببعض وكانت اكتر حاجة ملخبطاني موضوع ان البابا مقره في الكنيسة الكبيرة…

اللي فالعباسية بس هو بابا إسكندرية والكلام كله على كنيسة إسكندرية اللي هي في نفس الوقت الكنيسة المرقسية…سألت والدي الله يرحمه الأسئلة اللي فدماغي وهو بصراحة كان مثقف جداً ومطلع وحكالي قصة القديس مرقس الرسول اللي هو هو سان مارك صاحب الكنيسة في ڤينيسيا-اللي والدي طلع كان زارها…

قبل كدا- المهم شرحلي ان كنيسة الإسكندرية دا الرمز والكيان اللي بيجمع المسيحيين المصريين الأرثوذكس والفرق بينها وبين كنيسة روما والفاتيكان وان اللي أسسها في إسكندرية في اول الأمر االقديس مرقس الرسول اللي كتب إنجيل مرقس…(علشان كدا اسمه مرقس الأنجيلي)

وقالي ان القديس مرقس كان مدفون في فينيسيا ومصر استعادت رفاته في الستينات وكان حدث مشهور جداً سنة 1968 وتم الإحتفال بافتتاح الكاتدرائية بالعباسية بحضور عبد الناصر وسيلاسي حاكم إثيوبيا ثم اعادة دفن الرفات…دورت انا مؤخراً لحد مالقيت المقال (موجود في اخر الثريد) والصور دي…

المهم في الموضوع ان القديس مرقس استشهد(ودي قصة تانية) ودفن في إسكندرية سنة 68م في اول كنيسة اتبنت في مصر وأفريقيا اللي هي بيت أنيانوس أول مصري أمن برسالة المسيح عليه السلام…واختلفت الروايات على تاريخ دخول القديس مرقس إسكندرية بس عموما هو دخلها بين 55م و 61م جاي منين بقى…

من مسقط رأسه ليبيا…
كان في رحلة التبشير (الكرازة) التانية بتاعته انطلق من أورشليم لقبرص لليبيا لمصر…علشان كدا اول ما دخل مصر دخل إسكندرية يعني لو كان طلع من أورشليم العكس كان زمان الكنيسة بتاعتنا اسمها غير كدا خالص إنما هي أقدار ربنا بقى…المهم سنة 828 وصلت إسكندرية قافلة سفن…

تجارية من ڤينيسيا…عملوا ايه التجار اللي فيها…سرقوا رفات القديس الرسول الشهيد وطلعوا بيها على ڤينيسيا وأهدوها للدوج هناك اللي أمر ببناء كنيسة سان مارك تكريماً للقديس العظيم ودفنه فيها…وأضافوا عبارة شهيرة باللاتينية على شعاره PAX TIBI MARCE, VANGELISTA MEUS