ثريد عن الاندومي والنودلز سريعة التجهيز عامة، الثريد ده مش نقل منتديات لكن تناول للمواد الموجودة فيها والمكتوبة على العبوة ولو حد عايز يدور أكتر، الثريد ده مش للتخويف والتضخيم لو حد بياكلها مرة كل أسبوع مثلا، لكن للتحذير للناس اللي بتخليها جزء من نظامهم الغذائي اليومي بشكل ثابت
مبدئيا النودلز زي أي منتجات دقيق قمح مكرر وده سريع الهضم وبيرفع السكر في الدم وبيتحول لدهون على الكبد وكوليسترول، لكن الأسوأ ان بيتم تصنيعها باضافة زيت نخيل مهدرج عشان تبقى رطبة بسرعة لما يتحط عليها مياة سخنة، وده أسوأ أنواع الدهون لأنها بترفع الكوليسترول السئ LDL وتخفض الجيد HDL
المادة التالتة والأخطر وهي ال sodium polyphosphate وبرغم انها كانت متصنفة GRAS من الFDA يعني generally recognized as safe لكن دراسات حديثة كشفت ان التعاطي له بانتظام كجزء من نظام غذائي يومي بيسرع الشيخوخة ويدمر الشرايين والأوردة وخطر جدا للناس اللي عندها أمراض كلى وأوعية دموية
المادة الرابعة هي من أخطر المواد لأنها موجودة في كل الأكل المصنع تقريبا كمعزز ومكسب للنكهة من الشيبسي لمرق الدجاج وهي ال monosodium glutamate أو الملح الصيني ودي اضرارها بقى متعدش من الخمول والصداع لفرط الحركة عند الأطفال للتأثير على الذكاء بشكل عام للتأثير على الكلى والكبد
دي أهم المواد المكتوبة على العبوة، واللي بيزيد ضررها لو كانت جزء ثابت من النظام الغذائي اليومي، القاعدة العامة: كل ما كانت الأغذية مكررة ومصنعة "دقيق وسكر مكرر- عصاير بالسكر- لحوم مصنعة" كل ما زاد ضررها، وكل ما كانت أقرب لصورتها الأولية "حبوب كاملة- فاكهة - لحوم وفراخ" كان أفضل
المشكلة الأكبر الناس بتتعامل مع سناكس مصنوعة من مكسبات طعم ودقيق أبيض وزيوت أو سكريات وحلويات باعتبارها محسنة للمزاج، الحقيقة العكس تماما، الأغذية دي بتسبب تحسن مزاجي مؤقت بعده زيادة الخمول والاكتئاب، محسنات المزاج الأكل الصحي الأقرب لصورته الأولية، الأغذية المصنعة "مدمرة مزاج"
الاكتئاب والقلق والاضطرابات المزاجية أمراض عضوية بتصيب العقل زي أمراض بتصيب أي أعضاء تانية لها عوامل وراثية ولها أدوية متخصصة لكن زي أمراض تانية جزء كبير من أسباب الإصابة بيها والشفاء منها هو نمط الحياة وجزء أساسي منه طبيعة أكلك، متاكلش كل حاجة غلط وتعيش غلط وتتفاجئ بالمرض
ممكن تلاقي شباب كتير بينصح أهله ويلح عليهم لو مرضى ضغط بتجنب الملح ولو مرضى قلب بتجنب الكوليسترول ولو مرضى سكر بتجنب السكريات، لكن لو هو مصاب بالاكتئاب والقلق أو أي اضطرابات مزاجية نادر ما هتلاقيه بيبص لأكله وراجعه ويعتبره جزء من المشكلة، أنت ما تأكل، دي حقيقة بسيطة دايما بننساها
جاري تحميل الاقتراحات...