كنت مرة باتكلم مع مدير المبيعات فى الشركة ، و هو عضو فى نادى مرموق جدا فى مصر و راكب عربية أخر موديل و أولاده فى مدارس أجنبية بالشىء الفلانى ، و بيلبس شيك و مفروض إنهم من عيلة معروفة "إبن ناس" .. و حكالى حكاية عشان يظهرلى حكمة ربنا و الرزق اللى ممكن ربنا يبعته للناس
حكالى عن واحد كان يعرفه من المسجد لما كان بيروح يصلى ، و أد إيه الشاب ده كان عنده مشاكل و ظروف صعبة و بين يوم و ليلة إختفى و سمعه عنه بعد سنين ، راح أمريكا و أصبح رجل أعمال و معاه فلوس كتير زى الرز .. و من نجاح لنجاح ! سألته : طب إيه سبب التحول الغريب ده؟
قالى حكمة ربنا .. الولد ده لقى كام حتة أثار تحت البيت عنده ، و كلم ناس وصلوه بمشترى .. راح باع اللى وراه و اللى قدامه و سافر اميركا و باعها هناك ! و قالى : شوف حكمة ربنا ، يبعت الرزق للناس إزاى ! قلتله ، بس دى فيها كل الجرائم اللى ممكن أفكر فيها ، كدب و سرقة و تهريب !
ساعتها إستشهد بفتاوى الشيوخ بتوع التلفزيون ، وقالى طالما لقاها فى ملكه تبقى حلال عليه ! طبعا أنا كنت هاتناقش معاه ، بس لما لقيت عينيه سبلت تسبيلة الإيمان ، و وشه نور كده و هو بيقول الكلام بمنتهى الثقة ، عرفت إن النقاش مالوش لازمة أمام غسيل المخ !
الراجل ده "مدير المبيعات" بيصلى الفرض بفرضه و عنده زبيبة منوره على جبينه ، و دايما يقعد مع الموظفين بتوعه وقت البريك يوعظ فيهم عن الدين و ينتقد اللى صابغ شعره و يقوله حرام ، إصبغ بالحنة لكن الصبغة العادية حرام عشان بتغش اللى حواليك و بتظهر سن غير سنك الحقيقى !
هو نفس الرجل برضه اللى كان بعد ما يصلى و الإيمان منور فى وشه ، يطلب من النائب بتاعه يقول إنه نزل مقابلة شغل ، و هو فى الواقع مزوغ من الشغل ! مفروض إنه إبن ناس و مؤمن .. لكن زى ما حكيت ، بيحلل السرقة و الغش و التهريب لأنه شايفها حلال حلال حلال !
بعد كده لما ننتقد أراء الشعراوى و غيره ، يقولك إنتوا بتهدموا رموز الدين و عايزين تقودوا المجتمع للكفر و ضلال ! هو فيه ضلال أكتر من السرقة و التهريب و الغش و الضرب و القتل "الحلال"؟! المعركة هاتستمر بين العقول اللى بتحاول تفضل نضيفة ، و الضماير اللى بتحاول تفضل صاحية !
و بعدين مفروض إن الدين و رجاله يحثوا المؤمنين على العطاء مش إنهم يحرضوهم على "الهبش" ! مفروض يعلموهم إزاى يستغنوا عن الماديات ، مش إنهم يعلموهم التكويش على الأثار و أموال الغير !
لو الشيطان كان عايز يحط خطة عشان ينشر الشر بين البنى أدمين ، ماكانش هايعمل أحسن من كده! السرقة بقت حلال ، و التحرش مباح ، و القتل مبرَر ، و الغش و النصب و التهريب له أصوله ! بس فى الأخر مافيش تفاهم فى الخمور و لحم الخنزير و الحجاب .. !!!
و فى الأخر يقدمولك الأفيونة المعتادة بتاعة فتاوى النكاح ، عشان الشعب ينبسط و يتكيف .. نكاح حتى الثمالة ! و كده ما يكونش فيه حد محروم من حاجة ! و يمشى المؤمن وسط الشارع و هو بيرتكب جميع أنواع الجرائم ، و تلاقيه حاسس نفسه ملاك بيطير من على الأرض ، و ضميره مرتاح أخر راحة!
بس أهم حاجة إننا كلنا مرتاحين و مبسوطين عشان الدولة عندنا بتجدد الخطاب الدينى .. و على رأى الملاك اللى بجناحات ، القديس عبد الله رشدى لما بيقول ... الأزهر قادم !
جاري تحميل الاقتراحات...