طيب طالما الأمر وصل للتلفزيون وكبير اللي مع الرصين عمرو بذئ، فاحنا برضك نحب ننوه إلى الجانب الاقتصادي للموضوع (اللي هو الجانب الأساسي، وبصرف النظر عن بياعة الفجل)
يعني دي نبذة صغيرة عن اقتصاديات صناعة ضخمة بالمليارات، اسمها الطب الخاص (مع التشديد بشدة على خصوصيته، أي أن فلوسه بتدخل جيوب ناس مخصوصة) .. في مصر
الناس لازم تعرف إن نقص الأطباء وبالذات الشباب لا يمس وزارة الصحة والقطاع الصحي الحكومي وحده، لكن قطعا له تأثير على القطاع الخاص كمان .. ازاي؟
المستشفيات الخاصة كلها قايمة ومفتوحة على حس جنود مجهولين من الأطباء الشباب اسمهم النواب، بيشيلوا معظم الشغل اليومي الروتيني (بندلعه باسم الـ dirty work) في مقابل إن النايب "ربما" يتعلم حاجة من الاستشاري اللي بييجي "يبص" على عيانينه 5 دقايق في اليوم مثلا، إذا جه
النواب بيشتغلوا في المستشفيات الخاصة بنظام نوبتجيات (بندلعها برضه باسم شفتات shifts) وبيتحاسبوا بالشفتات دي .. بييجوا منين النواب دول؟
معظمهم من وزارة الصحة حضرتك، والنظام العجيب دة هو سر تمسك وزارة الصحة إلى الآن بنظام الشفتات 36 ساعة اللي بطل في العالم كله نظرا لخطورته المثبتة على صحة الأطباء (الناس اللي بنسمع عنها كل شوية، اللي بتموت في نهاية شفت من دول) ـ
وخطورته طبعا على صحة المرضى، لما يتعامل معاهم دكتور مش شايف قدامه حرفيا من التعب .. العالم كله (أو على العالم المتقدم على الأقل) لا يعترف بنوبتجية طبيب حاليا تكون أطول من 12 ساعة
وزارة الصحة متمسكة بيها بقى لأنها شايفاها صفقة رابحة: اديني شفت 36 ساعة ورا بعض، واطلع بقية الأسبوع لقط رزقك برة، في "البرايڨت"، تقدس اسمه وتشعبت مجالاته .. وكدة هنبقى كلنا مبسوطين
ليه نواب وزارة الصحة بيقبلوا على شفتات المستشفيات الخاصة دي؟ عشان الفلوس طبعا في المقام الأول (بأمانة يعني)، لكن كمان عشان فرصة التعليم والتدريب، والاحتكاك بالاستشاريين ولو بضعة دقائق في اليوم، لأن التعليم والتدريب هو مصيبة وزارة الصحة اللي هي رافضة الاعتراف بيها
الوضع دة مستمر بقاله سنين، والمستشفيات الخاصة مستمتعة بيه جدا، لأنه بيوفر لهم معين pool لا ينضب من حمير الشغل، بيخلوا المستشفى مفتوحة، وبيشيلوا عبء كبير عن أنصاف الآلهة الأساتذة والاستشاريين ـ
لدرجة أن بعض المستشفيات الخاصة "الأرقى" بترفض تعيين نواب من خريجي جامعات معينة بدون ذكر أسماء (لأنه زي ما فيه تفاوت حاد ومخجل في مستويات التعليم بين الجهات الصحية المختلفة، فيه تفاوت برضه بين الجامعات وبعضيها)
فهل لما المعين دة يضيق أو يتقلص بسبب إقبال الأطباء الشباب على الفرار من النظام المهين القذر دة، والفرار من البلد كلها، مش هتتأثر اقتصاديات التشغيل في الصناعة المليارية دي؟
وهل تقلص معين حمير الشغل بيشكل تهديد وجودي للصناعة دي؟ وبيمس أصحابها حيث يوجعهم المساس، في صميم الجيوب؟ التنبؤ صعب حاليا لكن فيه خطوط ممكن تتمد على استقامتها، والصورة عمالة تتضح سنة ورا سنة، فابقوا معنا
طبعا اللي هيبقى معنا دة اللي له غرض يشوف آخرتها، لكن لو حضرتك من شباب الأطباء، وعندك سكة تخلع فإياك ثم إياك أن تبقى معنا .. اخلع يا ابني وسيبهالهم مخضرة
جاري تحميل الاقتراحات...