اللي اكتشفته بعد سنوات من العلاقات الفاشلة، الناس اللي تنصحك بإنك "ما تحتاجه" وتعزز لك بـ"طز فيه" و"ما وقفت الدنيا عليه" هم أكثر ناس إذا دخلوا بعلاقة بيحتاجون الطرف الآخر وبيكتشفون إن مو طز فيه وإن دنيتهم وقفت عليه.

هالنوعية الساذجة في النصايح والسطحية في التعامل ما تنفع مع أي بني آدم عنده قلب واستثمر وقت وعواطف في أي علاقة كانت، علاوة على إنها تخلي الشخص اللي يشتكي ما يثق بالناصح لأنه يعطي انطباع انه مثالي.. الناس تحس ضروري إنها تعطيك نصايح في هالمواقف، بس ترى السكوت والاستماع يكفّون والله.

اللي يصير بعض الأحيان بالمواقف هذي إن الشخص يشوف جانب من نفسه في اللي يشتكي، وهالجانب هو يستنكره أو يحاول يوميًا إنه يخفيه، فتصير ردّة فعله قوية بالنصايح، زي "ياخي إنت حمار"، "إنت قاعد تذل نفسك"، "خلاص موڤ اون"... يصير الموضوع هجوم أكثر من إنه تعاطف لأنه ما يبي يتذكّر اللي أخفاه.

أفهم محاولات الأصحاب في إصلاح الموقف والشعور بالإخفاق لما يعطون نصايح وما تفيد، بس الموضوع مو عنكم، مو ضروري تحسون بالرضا عن نفسكم إنكم سويتوا شي عشان تغيرون من نفسية الشخص المتأذي. أفهم إنكم تنظرون للموضوع بعقلانية ومن الخارج، بس ابدوا بمحاولة الإحساس باللي يحس فيه المتأذي.